Dra. Hj. Adah Rodiyah, M.M.Pd., Kepala SMKN 1 Katapang Kabupatén Bandung, salaku juara kadua Kepala SMK terbaik tingkat nasional, taun 2016, nu dipasrahkeun ku Bapa Anies Baswedan, Mentri Pendidikan manten
Katapang – Poé Senén, tanggal 5 Désémber 2016, Majalah Sora ngadongdon ka SMKN 1 Katapang Kabupatén Bandung, salah sahiji sakola kejuruan unggulan di wewengkon Kabupatén Bandung. Pernahna di Jalan Ceuri Terusan Kopo KM 13.5, Katapang, Soréang. Harita tepung sareng Pa Ediya Muhsin, S.Pd., M.Pd., salaku Waka. Kurikulum tur Pa Milad Doso Ismoyo, S.Pd., S.T., M.M.Pd., Waka. Hubin Humas.
Pa Ediya Muhsin, S.Pd., M.Pd., salaku Waka. Kurikulum SMKN 1 Katapang
Sobat Sora, SMKN 1 Katapang téh ngadeg taun 1999. Harita ngaranna SMKN 4 Soréang. Laju muka tilu kompetensi keahlian, nya éta Teknologi Penyempurnaan Tekstil, Teknik Elektro jeung Mesin Perkakas. Kagiatan KBM (kagiatan Belajar Mengajar)-na ngilu di wangunan SMPN 1 Katapang. Basa éta jumlah siswana ukur aya 144 urang.
Pa Milad Doso Ismoyo, S.Pd., S.T., M.M.Pd., Waka. Hubin Humas SMKN 1 Katapang
Basa taun ajaran 2000/2001, KBM-na pindah ka gedong anyar, nu alamatna geus disebutkeun di awal tulisan. Lega lahan sakolana kurang leuwih 2.5 héktar. Ahir taun 2000 ngaran SMKN 4 Soréang resmi jadi SMKN 1 Katapang.
Drs. Suwandi, Kepala Kompetensi Keahlian TKR, dipoto di bengkel TKR
Ti mimiti ngadeg nepi ka ayeuna SMKN 1 Katapang geus dipingpin ku tilu Kepala Sekolah nya éta Drs. H. Carma Rahmat, M.Pd., H. Asép Rusmana, S.Pd., M.M.Pd., sarta Dra. Hj. Adah Rodiyah, M.M.Pd. Unggal Kepala Sekolah nu mingpin ieu sakola tangtu boga program andelan séwang-séwangan. Kiwari kamajuan SMKN 1 katapang beuki karasa, utamana fasilitas sakola kayaning wangunan sakola, bengkél paragi praktek, saranana, jrrd.
Bu kartini,S.S.IT., Kepala Kompetensi Keahlian Teknik Penyempurnaan Tekstil (tengah)
Kompetensina keahlinna gé terus nambahan. Ayeuna aya salapan kompetensi keahlian, nya éta Mesin Perkakas, TGM (Teknik Gambar Mesin), Elektronika Industri, Mekatronika, TKR (Teknik Kendaraan Ringan), Tekstil, TKJ (Teknik Komputer Jaringan), Multimedia jeung RPL (Rekayasa Perangkat Lunak).
Siswa SMKN 1 Katapang Kompetensi Keahlian TKR keur praktek di bengkel TKR nu representatip
Jumlah guru TU, karyawan jeung caraka ieu sakola kurang leuwih aya 145 urang. Jumlah rombelna aya 47 rombel nu ngawadahan leuwih ti 1700-an siswa. Jumlah rohang kelas adaptif aya 37, jumlah béngkél aya salapan luyu jeung kompeténsi keahlian. Sarana séjénna, nya éta aya lapang olah raga dua, pabukon/perpustakaan hiji, laboratorium kimia, fisika jeung bahasa masing-masing hiji. Diunggal kelas adaptif geus aya infokusna sarta sabagéan kelasna geus maké AC.
Siswa SMKN 1 Katapang ti kompetensi keahlian Elektronika Industri keur praktek di bengkel elektronika
Salah sahiji kaunggulan di SMKN 1 Katapang nya éta, kadisiplinana. Siswa di ieu sakola mah ulah wani-wani kabeurangan bising keuna sangsi, sangsina gé nu ngadidik. Lamun aya siswa nu kabeurangan, sok dihukum, kayaning mulungan tur milah-milah runtah, aya ogé sina lari. Kagiatan KBM-na, lumangsung poé Senén nepi ka poé Jumaah, husus kelas XII mah nepi poé Saptu. Asupna ti pukul 07.00 nepi ka pukul 15.00 WIB.
Salah sahiji mesin cnc nu dipimilik ku SMKN1 Katapang, hargana ratusan juta rupia
Kaunggulan lianna nya éta, boga alat-alat prakték nu memenuhi standar keur kabéh kompetensi keahlian. Eta téh keur ngali potensi siswana. Hasilna mah karasa pisan, mangsa aya LKS (Lomba Keterampilan Siswa) keur tingkat kabupatén mah, SMKN 1 Katapang mindeng jadi juara umum-na. Ti dinya remen ngawakilan ka tingktat propinsi, tur sok jadi juara, kayaning kompetensi keahlian mesin, mekatronika, fisika, kimia, bahasa. Samalah basa taun 2006 kungsi jadi juara nasional dina lomba CED (Computer Edu Designs) tur ngawakilan Indonésia di tingkat ASEAN. Dina widang olahraga gé dina taun 2016 ayeuna jadi juara umum tingkat SMK sa-Kabipatén Bandung
Leubeutna préstasi siswa SMKN 1 Katapang téh teu lésot tina apingan guru-guruna nu kompeten. Najan kitu di SMKN 1 Katapang tetep masih kakurangan guru produktif. Sakola miharep sagancangna bisa nambahan guru produktif keur unggal kompetensi keahlian. Udaganana salian ti leuwih efektif ogé préstasina leuwih munel.
Siswi SMKN 1 Katapang
Galeri, paragi mamerkeun hasil siswa kompetensi keahlian Teknik Penyempurnaan Tekstil
Préstasi Kepala Sekolahna gé matak pikareueuseun, dina sababaraha bulan kaliwat Dra. Hj. Adah Rodiyah, M.M.Pd., kapeto jadi juara kadua Kepala Sekolah terbaik SMK tingkat nasional, taun 2016.
Kaayaan rohang TU SMKN 1 Katapang
Ayeuna unggal taunna, ampir 60 % lulusan SMKN 1 Katapang katarima digawé, luyu jeung misi sakola kejuruan nya éta disiapkeun keur langsung digawé. Pausahaanana gé lain nu bantrak-bantrakkeun, Ieu yeuh sababaraha tempat digarawéna téh, aya nu di PT. JIAEC, PT. Pindad, Yamaha, PT. Dirgantara Indonésia, Honda, Astra Toyota, Astra Daihatsu, PLN, PT. LEN, Kahatéx, GMP, PT. CCA, jrrd. 17 %-na aya nu neruskeun kuliah, sarta nu 3% muka usaha sorangan. Pokona mah suksés jadi BMW (Bekerja, Melanjutkan jeung Wirausaha). [MS]***
