Pa Anang Yahmadi, GM UIP (General Manager Unit Induk Pembangunan) PLN Jawa Bagian Tengah I, nuju masihan materi ngeunaan PLN.
Sumur Bandung – Program PLN mengajar di SMAN 5 Kota Bandung lumangsung Rebo 24 Agustus 2016, ti pukul dua pabeubeurang nepi ka pukul satengah opat soré. Tempatna di aula SMAN 5 Kota Bandung, diluuhan ku Drs. H. Tedja Soekmana, Waka. Humas SMAN 5 Bandung, wawakil Guru SMAN 5, sarta karyawan PLN. Ari pesertana mah perwakilan siswa ti kelas XII.
Angklung SMAN 5 Kota Bandung dina kagiatan PLN Mengajar.
Salian di SMAN 5 Kota Bandung, ogé dilaksanakeun di 66 sakola nu aya di kabupatén, kota, sa-Indonésia. Rempeg dina minggu ka-3 Agustus 2016. Kayaning di SMKN 4 Kota Bandung, SMAN 1 Kota Bandung, SMAN 1 Kota Bogor, SMA Methodist 1 Médan, SMPN & SMAN 2 Tasikmalaya, SMA II BOPKRI Yogyakarta, SMAN 1 Purworejo, SMAN 1 Sragen, SMAN 1 Purwokerto, SMAN 1 Padang, SMPN 1 Simo Boyolali, SMAN 3 Malang jeung réa-réa deui.
Pamilon kagiatan PLN Mengajar di SMAN 5 Kota Bandung.
Kagiatan kasabit téh keur babagi pangalaman tur motivasi para pajabat PLN dina widang profesional ka para siswa. Harita nu janten pemateri di SMAN 5 Kota Bandung téh, nya éta Pa Anang Yahmadi, GM UIP (General Manager Unit Induk Pembangunan) PLN Jawa Bagian Tengah I. Dina sela-sela kasibukanana anjeunna salin kalungguhan tina GM jadi Guru, katingal sumanget, ku kituna para siswa gé janten kahudang.
Pa Anang Yahmadi, jadi guru saheulaanan.
Salian ti materi nu didadarkeun di luhur, Pa Anang Yahmadi gé, ngajéntrékeun yén ketenagalistrikan di Indonésia téh, masih tinggaleun jeung nagara séjén, contona baé jeung nagara Singapura. Najan kitu anjeunna teu leutik haté, alatan dina mangsa kahareupna Indonésia bisa leuwih maju. Loba sumber énérgi nu can kagarap. Lamun nilik SDM-na mah Indonésia moal kakurangan. Ku kituna anjeunna méré sumanget ka siswa SMAN 5 Kota Bandung nu hadir sangkan cinta ka nagarana, salah sahijina ku cara ti ayeuna miara fasilitas umum sarta ngahémat énérgi.
Sési tanya jawab.
“Kelistrikan nu dikokolakeun ku PLN téh mangrupa bisnis anu bakal terus mekar. Kukituna masih loba hancaeunana. Utamana dina ngamalirkeun listrik sacara walatra nepi ka suklak ka siklukna. Alatan kitu PLN bisa jadi peluang gedé keur generasi penerus bangsa, kawas siswa SMAN 5 Bandung. Jaga gabung di PLN ngawangun Indonésia nu leuwih hadé,” saur Pa Anang.
Drs. H. Tedja Sukmana, Waka. Kesiswaan, ngawakilan Bapa H. Sugiharto, M.M, Kepala SMAN 5 Kota Bandung, nampi bantosan ti PLN UIN Pembangunan Jawa Bagian Tengah I, mangrupa alat musik & olah raga.
PLN Unit Induk Pembangunan Jawa Bagian Tengah I nu dipingpin ku Pa Anang gé, harita méré bantuan. Mangrupa peralatan kagiatan ekstrakurikulér, kayaning peralatan musik jeung olah raga. Lamun di rupiahkeun ngahontal angka 43 juta rupia. Jumlah bantuan PLN keur 66 sakola sa-Indonésia mah, totalna kana Rp. 3,6 miliar.
“Jadi kabuka, wawasan sim kuring, awalna mah teu apal ngeunaan PLN. Geuning PLN téh pausahaan nu sacara bisnis menguntungkan, salian ti éta janten apal lamun tugas PLN téh henteu sasederhana nu dibayangkeun. Komo ayeuna mah kedah milarian deui énérgi terbarukan, kerén ogé, sugan wéh tos lulus kuliah tiasa ka PLN,” cék Galih (kénca) & Nafi (kadua ti kénca).
“Ieu kagiatan téh ageung pisan mangfaatna. Pangpangna mah siswa SMAN 5 Bandung janten apal kana sistem ketenagalistrikan. Siswa gé kabuka wawasanana, jaga tiasa kagugah cita-citana sareng kabita gabung ka PT. PLN. Ngawakilan sakola sim kuring salaku Waka Humas ngahaturkeun séwu nuhun kana kagiatan PLN Mengajar di SMAN 5 Bandung sareng nampi pisan bantosan ti PLN Unit Induk Pembangunan Jawa Bagian Tengah I. Ieu téh salahsawios gawé bareng nu harmonis. Da kamajuan SMAN 5 Bandung kedah di deudeul ku sadaya pihak, kalebet PLN salaku BUMN ka hot di Indonésia,” saur Pa Tedja.
Saréréa dipoto satutas kagiatan PLN Mengajar.
Poto panitia ti PLN Unit Induk Pembangunan Jawa Bagian Tengah I (kénca ka katuhu), Bu Astri, Bu Vélina, Pa Fahri sareng Pa Satri.
Ku ayana Program BUMN Mengajar nu digoongan ku Kementrian BUMN téh, kabukti yén PLN téh hadir di tengah masarakat. Salah sahijina ku cara pelayanan nu optimal sarta ngabdi kana widang atikan dina kagiatan PLN Mengajar keur ngeusi kamerdékaan RI nu ka 71 taun. [MS]***
