Drs. Iwan Setiawan, Kepala SMAN 24 Kota Bandung
majalahsora.com, Kota Bandung – Poé Saptu 2 Séptémber 2017, SMAN 24 Kota Bandung ngayakeun kagiatan pasanggiri PBB (Peraturan Baris Berbaris) antar SMA/SMK/MA sarta SMP/MTs sa-Jawa Barat. Nu jolna ti Kota Bandung, Kota Cimahi, Kabupatén Bandung Barat, Kabupatén Bandung, Kabupatén Indramayu, jrrd.
Poto kenca ka katuhu: Kompol, Andryan, Kapolsek Ujung Berung, Drs. Dede Amar, M.M.Pd., Kepala BP 3 Wilaya IV & Kombespol Reza, Humas Polrestabes Kota Bandung.
Dijejeran Generasi Muda 3 singgetan tina Gelar Aksi Baris Berbaris Muda. Taun ayeuna mangrupa nu ka tilu kalina, nu diayakeun saban dua taun sakali. Tempatna lumangsung di lapang ieu sakola, nu pernahna di Jalan A. H. Nasution No. 27 Kota Bandung.
Jumlah pamilonna aya 33 regu, keur tingkat SMA sadarajat aya 15 regu sedengkeun patandang keur tingkat SMP sadarajat aya 18 regu, marebutkeun piala bagilir ti Gubernur Jawa Barat jeung Kepala Dinas Pendidikan Prop. Jabar, sarta Ti Kepala Dinas Pemuda Olah Raga Prop. Jabar. Dijurianana ku anggota TNI.
Di sagigireun éta ieu kagiatan téh diluuhan ku Kepala BP3 Wilayah IV Disdik Prop. Jabar, Drs. Dédé Amar, M.M.Pd., Humas Polrestabes Kota Bandung, Kombespol, Reza, Kapolsek Ujung Berung Kompol Andryan, jsté.
“Abdi ngaapresiasi ieu kagiatan, alatan loba ajén nu hadé pikeun generasi ngora. Pangpangna dina nuwuhkeun sikep disiplin, jaga bangsa urang butuh jalma-jalma nu disiplin tur nyepeng pageuh kana komitmen keur kamajuan tur mertahankeun NKRI (Negara Kesatuan Republik Indonésia),” cék Dédé Amar téh.
Drs. Iwan Setiawan, salaku Kepala SMAN 24 gé nandeskeun, yén tujuan utama ngayakeun pasanggiri PBB di SMAN 24 Kota Bandung téh, salah sahijina keur nanjeurkeun kadisiplinan ti unggal pribadi nu ancrub dina unggal reguna.
“Katawis pisan lamun nu disiplin mah, keharmonisan gerakanana bakal éndah jeung geunah katempona, sabalikna lamun nu kurang disiplin mah gerakanana bakal teu kompak,” cék Iwan, Kepala SMAN 24 Bandung téh.
Salian ti éta, Iwan gé, miharep ku éta kagiatan pasanggiri baris berbaris téh bisa nuwuhkeun karakter jujurna, alatan maranéhna ngalakukeun latihan-latihan nu teratur jeung rapih, mangka bakal ngahasilkeun juara nu pantes.
“Insya Alloh ku ieu kagiatan karakter disiplin, jujur sarta sumanget bisa ditepakeun ka balaréa. Lamun éta karakter geus tumerap di diri generasi muda Indonésia, mudah-mudahan generasi emas di taun 2025 bisa tinekanan. Alatan hal kasabit téh geus diaplikasikeun ku nagara-nagara nu geus maju. Otomatis nu baris jadi juara dina pasanggiri Generasi Muda 3 gé, nu nyepeng pageuh kadisiplinan, jujur tur sumanget,” cék Iwan tandes.
Anjeunna gé, nganuhunkeun ka para pihak nu geus ngadeudeul kana kalancaran kagiatan kasabit, kayaning ka Guru, Komite Sekolah, Panitia, TNI, Kepolisian, para sponsor, jsté. [SR]***
