Drs. Iwan Setiawan, Kepala SMAN 18 Kota Bandung
majalahsora.com – Kagiatan UNBK poé kahiji Senén 10 April 2017 di SMAN 18 Kota Bandung, kaganggu ku ngajeprétna listrik ieu sakola. Saban 45 menit sakali listrikna ngajeprét. Lumangsung salila dua kali. Sabada éta, pihak ieu sakola nu aya di Jalan Madésa téh nelpon ka PLN, teu lila petugas ti PLN-na langsung datang.
Pa Uden, M.M.Pd., Wakasek Humas (kénca)
“Muhun ieu tos dua kali ngajeprét, mangsa kagiatan simulasi mah teu acan kantos sapertos kieu. Jigana mah pédah nganggo cooler di unggal ruangan janten ngajeprét. Mangsa simulasi mah mémang teu nganggo cooler. Alhamdulillah teu aya masalah da tos disiapkeun UPS (bateré cadangan) dina serverna janten mangsa hurung deui data sareng jawaban basa Indonésia ti siswa teu ical. PLN gé riket pisan, basa di telpon teu lami jol. Langsung di gentos NCB-na tos lemah, da pami ningal daya listrik mah tos nyekapan,” saur Drs. Iwan Setiawan, Kepala SMAN 18 Kota Bandung.
Pa Jajang Sonjaya, S.Pd., Wakasek Kesiswaan
Dina pelaksnaan UNBK nu munggaranana kacatet diiluan ku 357 siswa. Ti jurusan IPA aya 211 urang jeung IPS aya 146 urang. Jumlah unit komputerna kurang leuwih aya 144 unit, ngawengku 42 unit komputer nu geus aya, 32 unit komputer anyar, 60 unit meunang nyéwa sarta 10 laptop bantuan ti masarakat atawa orang tua siswa. Jumlah serverna aya tilu. Pengawas silangna, guru ti SMAN 11, 17 sarta SMA Nusantara Kota Bandung, jumlahna aya 13 urang keur opat poéeun.
Aya 32 unit komputer anyar bantuan ti pamarentah pusat
“Alhamdulillah sakola kénging bantosan Rp 200 juta rupia ti pamaréntah pusat. Ku sakola digaleuhkeun komputer 32 siki sareng unit pendukungna kayaning server, ups, jrrd. Mudah-mudahan atuh penyelenggaraan UNBK nu munggaran di SMAN 18 Kota Bandung téh lancar dugi ka réngsé. Ku UNBK téh dipiharep siswa SMAN 18 hususna sareng siswa sa Indonésia umumna janten generasi anu jujur, ngagurat batu dina manahna,” saur Pa Iwan nyawang harepan.
Keur serius ngerjakeun soalna
Nilik kana kehadiran poé kahiji, 100% siswana euweuh nu absén, kitu ogé basa Majalah Sora ngecék poé kadua, 11 April 2017, ngaliwatan sambungan telpon, , siswana hadir kabéh, éta téh mangsa pelajaran matematika. Sarta teu aya masalah ngajeprét kawas poé kahiji.
Jaga siswa SMAN 18 jadi jalma nu jujur
Kagiatan UNBK di SMAN 18 Kota Bandung lumangsung tilu sési, nu dibagi di tilu rohangan. Unggal rohangan dijagaan ku hiji proktor jeung téknisi. [MS]***
