Drs. Suryana, Kepala SMAN 8 Kota Bandung
majalahsora.com – Aya 490 urang siswa SMAN 8 Kota Bandung, nu kacatet jadi peserta UNBK taun 2017 ayeuna. Jolna ti jurusan IPA 399 urang, sarta ti jurusan IPS aya 91 urang. Nepi ka poé ka tilu siswana hadir 100%, mangsa pelajaran basa Inggris. UNBK-na dibagi tilu sési.
Drs. Iyus Rustandi, Wakasek Kesiswaan
“Alhamdulillah, dina taun ka dua kagiatan UNBK di SMAN 8 Kota Bandung, pelaksanaanana langkung saé. Luyu sareng komitmen sakola, sangkan unggal taun aya peningkatan dina sagala widang. SMAN 8 Kota Bandung ge umajak siswa SMAN 8 sangkan langkung jujur, langkung berpréstasi. Kumargi SMAN 8 Kota Bandung, kenging pangajén janten salah sawios sakola nu beritegritas tingkat nasional, ku kituna jadi tatapakan sangkan jalujur,” saur Drs. Suryana, Kepala SMAN 8 Kota Bandung téh.
Drs. Abdul Latif, M.Pd., Staf Kurikulum
Basa Majalah Sora nilik ka SMAN 8, sacara umum kagiatan UNBK-na, lumangsung lancar (Rebo 12 April 2017), mangsa ngujikeun pelajaran basa Inggris sési kahiji asup sési kadua. Nya kitu deui mangsa poé kahiji jeung kadua euweuh masalah harita pelajaran basa Indonésia jeung matematika, nu diujikeunana téh. Boh jaringan listrikna, boh internetna lancar.
Persiapan, peserta SMAN 8 Kota Bandung, nyanghareupan pelajaran basa Inggris sési kadua
Peserta UNBK-na dibagi digenep rohangan. Jumlah komputer klienna aya 204, cadanganana 12 unit. 50 unit meunang nyéwa, sésana mah kapimilik sorangan. Jumlah serverna aya genep katambah cadangan dua. Salian ti éta di unggal rohanganana aya petugas proctor jeung teknisi saurang. Ari pengawas silangna mah jolna ti SMAN 12, SMAN 22, SMA Taman Siswa, SMA Budi Istri, sarta SMA Al Fitrah Kota Bandung.
Persiapan, peserta SMAN 8 Kota Bandung, nyanghareupan pelajaran basa Inggris sési kadua
Di sagigireun diiluan ku siswa SMAN 8, kagiatan UNBK di sakola nu pernahna di Jalan Solontongan No. 3, Kacamatan Léngkong téh, ogé katatamuan peserta UNBK ti SMA Kemala Bhayangkari Kota Bandung, jumlahna aya 39 urang. Ti jurusan IPA 16 urang sarta ti jurusan IPS 23 urang. Unggal poé ujianana ngilu dina sési katilu. [MS]***
