H. Déddy Mizwar (kénca) basa ngalongok kagiatan UNBK di SMAN 8 Kota Bandung
Sobat Sora, Poé Senén tanggal 4 April 2016 pareng silaturahmi nepangan kepala SMAN 8 Kota Bandung, Drs. Suryana. Dina raraga nempo kagiatan UNBK dina poé kahiji. Poé éta pisan ieu sakola katamuan rombongan Wakil Gubernur Jawa Barat, H. Déddy Mizwar. Ngahaja ngalongok para peserta didik anu keur ngalaksanakeun UNBK. Satutas ngalongok ka sababaraha sakola nu aya di sabudeureun SMAN 8, saperti SMKN 4 Kota Bandung, SMKN 8 Kota Bandung sarta SMKN 3 Kota Bandung.
Drs. Suryana, Kepala SMAN 8 Kota Bandung
Sora sempet ogé ngawawancara Wakil Gubernur Jawa Barat, dina sela-sela kasibukanana. Kumaha kamandangna ngeunaan situasi jeung kondisi UNBK di lelewek Ibu Kota Jawa Barat.
Rombongan Wakil Gubernur Jawa Barat disarengan ku Pa Asep Hilman, Kadisidik Propinsi Jawa Barat (kagenep ti katuhu)
Saurna Alhamdulillah kondusif, lancar turta matak reugreug. Dilaksanakeun tilu pluh, isuk-isuk, beurang jeung soré. H. Déddy Mizwar ngawacanakeun yén dina waktu anu moal lila, sakola-sakola hususna di wilayah kota kudu geus “berbasis computer”. Tangtu dibarengan ku upaya pamaréntah geusan mantuan ngaronjatkeun kasejahteraan para guru jeung guru honorér-na. Teu kaliwat sarana pisikna ogé baris leuwih diperhatikeun, sarta ayeuna keur nungtut didata. Saurna deui, diharepkeun ka hareupna ngawujud sakola “satu atap” maksudna ti SD, SMP tepi ka SMA teu paburincay disakomplékkeun. Anjeunna nyawang yén teu nutup kamungkinan mun engkéna, para peserta didik moal gumantung kana rohang jeung wangunan, lantaran sakola-na bisa dibabawa di jero komputer (laptop, netbook atawa tablét). Diajarna bisa di kebon, di sawah atawa di alam terbuka.
Majalah Sora basa ngawawancara Pa Elih Sudiapermana, Kadisdik Kota Bandung
Nyarengan Wakil Gubernur Jawa Barat, nyatana Kadisdik Kota Bandung, DR. Elih Sudiapermana. Sora nyempetkeun wawancara. “Alhamdulillah UNBK anu digelar, ku 55 SMA sareng SMK, kirang langkung ngabaud jumlah peserta 15.500 urang, lumangsung dina kaayaan lungsur-langsar. Prak-prakanana leuwih rikip sareng éféktif, teu riweuh ngagugulung keretas. Nyakitu tanggapan para peserta UNBK-na, cenah leuwih genah jeung leuwih museur konséntrasi. Diharepkeun masing-masing sakola boh tingkat menengah boh tingkat tinggi tiasa ngaronjatkeun kualitas sakolana. Anu kagiatan UN-na nganggo tilu pluh, diupayakeun ka payunna mah tiasa disapluhkeun, ku cara silih mangpaatkeun rohang sareng wangunan sakola-na,” saur Pa Elih.
UNBK di SMAN 8 Kota Bandung, ujianana leuwih jujur
Sora teu tinggaleun ngadeheus ka Kepala SMAN 8 Kota Bandung, Drs. Suryana geusan ngorék informasi ngeunaan UNBK. Jumlah peserta UNBK SMAN 8, kacatet kurang leuwih aya 442 siswa-siswi. Ngagunakeun opat rohang, ± 40 unit laptop/kelas. Sa-unit server katut sa-unit cadanganana. Aya saurang proctor dina hiji ruanganana.
UNBK di SMAN 8 Kota Bandung, fasilitasna bisa minuhan pikeun kagiatan UNBK taun 2016
Sesi kahiji ti pukul 7.30-9.30. Sési kadua, ti pukul 10.30-12.30. Sési katilu, ti pukul 14.00-16.00. Kondisi peserta UNBK teu kudu hariwang lantaran geus pamilier reujeung perangkat komputer, encan deuih latihan program simulasi, jaringan, sinkronisasi komputer langsung ti pusat. Ku cara UNBK, leuwih karasa éfékti boh waktu boh sarana ujian.
Pa Dede Amar, Sekretaris Dinas Pendidikan Kota Bandung (calik di sapalih Pa Elih)
Pangharepan Drs. Suryana natrat SMAN 8 hayang leuwih mibanda karakter kajujuran, luyu jeung anu diprogramkeun ku Mendiknas. Hal ieu enggeus jeung eukeur dikeureuyeuh kiat-kiatna. Berekah dina awal taun 2016 kamari, SMAN 8 nyangking layang pangajén (penghargaan) ti istana nagara salaku sakola anu mibanda indék kejujuran. [MS]***
