Manajemen 11, poto kénca ka katuhu: Bapa Moh. Ganjar, S.Pd., Wakasek Sarana, Dra. Hj. Yani Yusnia, Wakasek Kesiswaan, Drs. Rodyana, M.M., Kepala Sekolah, Ibu Dhiah Kuswarini, S.Pd., Wakasek Humas sareng Drs. Dédé Sunaryo, M.M.Pd., Wakasek Kurikulum
majalahsora.com – Poé Rebo (12 April 2017) pasisiang, Majalah Sora ngadongdong ka SMAN 11 Kota Bandung, nu pernahna di Jalan Kembar Baru No. 23, Kacamatan Régol. Dina raraga nempo kagiatan UNBK poé katilu, nu ngujikeun pelajaran basa Inggris. Harita dibagéakeun ku Bu Dhiah Kuswarini, S.Pd, Wakasek Humas sareng Drs. Dédé Sunaryo, M.M.Pd., Wakasek Kurikulumna.
Drs. Dédé Sunaryo, M.M.Pd., Wakasek Kurikulum
Laju Majalah Sora, diajak nguriling ka sababaraha rohangan, pikeun nalingakeun kagiatan UNBK-na. Katempo siswana keur husu ngeusian jawaban soalna. Ku Majalah Sora kacatet yén di ieu sakola nu dipingpin ku Drs. Rodyana, M.M., téh aya 354 siswa nu jadi pesertana. Nu jolna ti dua jurusan, ti IPA aya 237 urang sedengkeun ti IPS aya 117 urang. Kagiatan UNBK-na lumangsung dua pluh. Méméhna basa UNBK taun 2016 mah dilaksanakeun tilu pluh, alatan jumlah siswana leuwih réa, nya éta aya 428 urang.
Ibu Dhiah Kuswarini, S.Pd., Wakasek Humas
Nilik jumlah komputer nu dipaké dina UNBK taun ayeuna, aya 177 unit komputer, nu disimpen dilima rohangan. Komputer anyarna aya 10 sét sarta cpu anyar 20 siki, sésana mah komputer nu dipaké taun méméhna. Serverna aya genep. Jumlah teknisina aya tilu urang katambah proktor genep urang. Sedengkeun panitiana aya salapan urang. Pengawas silangna ti SMAN 7, SMA BPI, SMA Pasundan 9, SMA Nehru, jeung SMA Nugraha Kota Bandung, jumlahna aya 31 urang.
Kagiatan UNBK poé katilu (Rebo 12 April 2017), sesi kadua, pelajaran basa Inggris di SMAN 11 Kota Bandung
Nepi poé katilu pelaksanaan UNBK di SMAN 11 Kota Bandung téh, bajalan lancar. Kitu ogé kehadiran pesertana, nepi ka poé Rebo 12 April 2017 hadir 100 persen.
Siswa SMAN 11 keur husu ngerjakeun soal basa Inggris
“Alhamdulillah pelaksanaan UNBK-na, teu aya masalah boh teknis boh non teknis, sadayana normal. Pami ngabandingkeun pelaksanaan UNBK-na, taun ayeuna mah, langkung saé ti batan taun kamari,” saur Drs. Dédé Sunaryo, M.M.Pd., Wakasék Kurikulum.
Aya lima rohangan keur kagiatan UNBK di SMAN 11 Bandung téh
Aya patalina kénéh jeung kagiatan UNBK, taun ayeuna 100 persen SMA di Kota Bandung téh, ngalaksanakeun UNBK. Sanajan can kabéh mandiri (ngayakeun sorangan). Salah sahijina dideudeul ku SMAN 11 Kota Bandung, nu méré nginjeum fasitasna, pikeun sakola nu can bisa ngalaksanakeun UNBK taun ayeuna sacara mandiri. Di antarana SMA Nugraha, SMA 11 Maret, SMA Nusantara, jeung SMA Medina Kota Bandung. Kacatet jumlah siswana aya 144 urang ti jurusan IPA jeung IPS, ujianana mangsa sési ka tilu. [MS]***
