Sobat Sora, Mahmud téh ngaran hiji wewengkon bawahan désa Mekar Rahayu, kacamatan Marga Asih, kabupatén Bandung. Kurang leuwih 6 KM ti Soréang salaku ibu kota kabupatén. Kampung Mahmud dikuriling ku Citarum jeung pasawahan kalawan dianjrekkan ku leuwih ti 1200 urang panghunina. Ciri khas adatna di sagigireun religius anu kuat ogé pakem dina nyepeng amanat karuhun. Contona baé imah kudu panggung, teu meunang ririaan tatabeuhan utamana nakol goong.
Sobat Sora, meujeuh mun para sobat ngalanto dina senggang waktu ka Kampung Mahmud lantaran di dinya aya situs makam penyebar Agama Islam tatar Bandung utamana Bandung Kulon. Makam kasabit diantara baé makam Eyang Syékh Abdul Manaf, makam Eyang Syékh Abdulloh Gedug jeung makam Eyang Syékh Zaénal ‘Arif. Eyang Syékh Abdul Manaf pisan anu ngadegkeun Kampung Mahmud kira-kira abad 15-16M laju ngababakan saanak-murid. Syékh Abdul Manaf téh masih katurunan waliyulloh Cirebon Syarif Hidayatulloh generasi ka 9. Samangsa Abdul Manaf mukim di Mekkah, anjeunna tirakat sangkan dina mulang ka sarakan aya dina pangaping Gusti Alloh lantaran harita keur meuweuhna penjajah Walanda. Anjeunna wirid di hiji wewengkon, Gubah Mahmud ngaranna. Sanggeus yakin aya dina panyalindungan Alloh, anjeunna mulang ka tanah Jawa(Bandung) laju ngawurkeun taneuh bawa ti Gubah Mahmud kana embel(rawa) anu dikuriling ku Citarum geusan piimaheun sareng pipasantréneun anjeunna. Nelah tepi ka ayeuna sabagé Kampung Mahmud.
Sabenerna Sobat Sora, pangna nyieun imah kudu panggung mémang keur kaamanan sabab taneuhna pan tina embel. Jadi sateuasna ogé embel, moal stabil lamun luhureunana aya wangunan témbok, mun teu barejad tangtu nungtutan rengat. Atuh pantrang ririaan utamana nakol goong, sacara pilsafat tatabeuhan téh gambaran ujub riya takabbur katambah ilang hormatan ka karuhun lembur anu jeneng Syékh Zaénal ‘Arif di mana gelarna dipikawanoh ku sesebatan Eyang Agung, gung dina tungtung namina. Sajaba ti éta, wewengkon Mahmud kakoncara paragi nyamuni(nyumput) ti Walanda, lamun téa mah aya sora raraméan utamana sora goong atuh matak ngabarubahkeun. Sakieu heula, Sobat Sora. [MS]***
