Pintonan tari Lenyepan (kelas X)
Sobat Sora, urang ngadongdon ka SMK nu pipimping ku Ibu Yani Heryani, M.M.Pd, nya éta SMKN 10 Bandung. Poé Senén nepi ka Juma’ah anu kaliwat, para peserta didik kelas X jeung kelas XI ti lima jurusan keur ceuyah manggung. Hal ieu maneuh tiap dua kali dina sataun. Luyu jeung ngaran programna uji leveling, dipungsikeunana keur ngaaprésiasi para peserta didik dina widang-widang kaahlianana salila ngalaksanakeun KBM-na.
Pintonan Tari Oray Welang (kelas X). Ieu tari téh dasar tina tari jaipongan ciptaan Pa Gugum Gumbira
Ngobrol téh jeung Waka. Humas, sakaligus guru karawitan, Bapa Januar Efféndi, S.Sn. Anjeunna wedalan ASTI taun 1991, nu nyangking S1-na dina taun 1997 ngadadarkeun impormasina ka Sora. Lulusan SMKN 10 Bandung taun 2016, jumlahna 333 siswa-siswi, lolobana ngalanjut ka ISBI sabagéan ka UNJ. Dina taun ieu, anu nuluy ka UPI mah teu aya sama sakali.
Pintonan Ibing Penca Plérédan (kelas X)
Kagiatan uji leveling dijadwalkeunana poé Senén keur karawitan, poé Salasa keur Seni Tari, poé Rebo keur Seni Musik, poé Kemis keur teater jeung poé Jumaah keur broadcast (kayaning filem péndék). Kapunjulan lulusan SMKN 10, nyatana sok pada ngahiap geusan ngahonor di SD-SD. Ku kituna kaharti pisan, kaparigelan ngawasa seni tari jeung seni-seni péntas séjénna kacida dibutuhkeunana di masarakat.
Peserta uji leveling kelas X, sabada réngsé minton
Warta ti SMKN 10 dilengkepan ku guru tari senior ti Kutaluhur Padalarang, Bapa Nana Munajat Dahlan, M.Sn. Uji prakték ahir seméster ieu dilaksanakeun ku para peserta didik kelas X, dua kelas jumlah siswana 59 urang pleus 3 urang peserta didik putra. Kelas XI, dua kelas, jumlah siswana 53 urang pleus 7 urang peserta didik putra. Kriteria uji prakték kelas X ngawengku dasar-dasar tradisi, tarian, dasar kursus, dasar genre jaipongan, dasar genre wayang, dasar genre tari topéng, jsté.
Sawatara uji prakték kelas XI ngaliputan genre wayang baladewa, tarian Betawi, Cikeruhan jeung genre penca tepak dua, tepak tilu jeung genre Cirebonan katut ka anu séjénna, anu mana saban kelompokna mibanda genre béda-béda. Tim peniléy sipatna internal, masing-masing guru pembingbingna. Udagan-udaganana nya éta geusan ngukur tur ngatik wawanén peserta didik dina dunya péntas.
Tari Badaya, salasahiji uji leveling keur kelas XI
Kriteria peunteunan (peniléyan) ngawengku kana téhnik gerak (wiraga), kasalarasan gerak jeung pirigan (wirahma), penjiwaanana (wirasa) katut wanda (kasalarasan, pembawaan tampilan) luyu reujeung gaya has masing-masing pleus nganiléy dangdanan ogé.
Guru nu meunteun
Kagiatan KBM SMKN 10 Bandung dimimitian ti pukul 7.00 tepi ka pukul 16.00 (tabuh 4 soré). Jumlah peserta didik dina saban taunna teu sarua, kadang-kadang dua kelaseun tampalana tepi ka tilu kelaseun. Para peserta didik anu pangjauhna aya anu datang ti Kalimantan, ti Lampung, ti Banten jeung ti Jakarta.
Waka. Humas, sakaligus guru karawitan, Bapa januar Efféndi, S.Sn
SMKN 10 ngadeg dina ping 1 Oktober taun 1958 anu harita kakoncara ku ngaran kokar (konserfatori karawitan). Taun 1978 robah jadi Sekolah Menengah Karawitan Indonésia (SMKI Karawitan). Dina taun 2002 jinek wéh jadi SMKN 10 Kota Bandung.
Pa Maman, Ketua Jurusan Tari
Sora ogé wawanohan jeung siswi anu rék ngalaksanakeun uji leveling, Vidi Demahestia, kelas XI Tari 2, nganjrek di wewengkon Buah Batu. Kaduana Annisa Nurfadilah, kelas XI Tari 1. Ieu dua mojang rancunit negrakkeun kamandangna ka Sora, cenah uji leveling dina taun ieu ningkat mesat, leuwih ramé jeung leuwih gebyar. Kriteria anu dioeunteunna ngawengku penguasaan gerak jeung hapalan/talaran. “Abdi duaan ayeuna badé tampil dina wanda tari genre putri, tari salimpang badaya,” cenah bari teu lésot arimut kareueut. Basa Sora ngolongan, naha tara kagok jeung geumpeur dina nyinghareupan kagiatan-kagiatan modél kieu? “Biasa-biasa wé, kulantaran ti awal seméster 1 ogé geus dibiasakeun ngawasa tampilan di luhur panggung,” kitu cenah cék maranéhna.
Vidi & Annisa
Pa Sawungbraja (kadua ti katuhu) orang tua siswa
Kabeneran deuih Sora ogé amprok jeung salasaurang orang tua peserta didik ti Komplék Margapuri, Bapa Sawungbraja rama ti siswi Raéna kelas X. Pa Sawungbraja kacida ngarojong kana kabébasan putrina dina milih sakola ka SMKN 10. Saperkara nyalurkeun bakat senina, kadua perkara neruskeun tapak-lacak kolotna, di mana mamahna ogé saurang manten penari karaton di Cirebon. [MS]***
