Pa Bambang Sudrajat, M.M.Pd. (kadua ti katuhu) Kepala SMPN 37 Kota Bandung
Sobat Sora, basa poé Salasa, ping 29 Maret 2016, Majalah Sora ngalanto ka SMPN 37, anu perenahna di Jalan Babakan Sari 1 No 188, Kiaracondong Bandung. Nepangan Kepala sekolah-na, Bapa Bambang Sudrajat, M.M.Pd urang Komplék Panghégar kalawan dipairan ku Ibu Hj. Iyan Suryani, M.Pd Waka. Humas.
Pa Budi Purwadi, S.Pd. Waka. Kurikulum
Program-programna mah nuluykeun hanca pupuhu ti saméméhna kayaning tadarrus Alquran sareng bacaan asma-ul husna saban isuk-isuk satacan kagiatan ngajar-diajar. Ieu program maneuh dipupuhuan ku saban kelas sacara bagilir. Satuluyna program Jumroh (jum’at rohani) dieusian ku tausiah Islami. Teu kaliwat ningkatkeun melak tatangkalan, ramah lingkungan (penghijauan) sakaligus ngahéjokeun warna cét témbok sakurilingna. Ngaronjatkeun ajén PTSP turta tatahar geusan nyinghareupan ujian nasional. Hal ieu berekah kéngéng aprésiasi ti dosén UIN SGD Bandung.
Bapa M. Hidayat, M.M.Pd. Waka. Sarana & Prasarana
Dina widang sarana, sakumaha pedaran Waka. Sapras, Bapa M. Hidayat, M.M.Pd sareng Waka. Kurikulum Bapa Budi Purwadi, S.Pd ngupayakeun rénovasi kamalir buruan jeung pipir sakola, Lab. komputer turta kelas IT. Keur ngimbanganana, para guru remen ditraining sangkan ngawasa téhnologi sarta program étmodo. Dina ngarojong kamajuan téhnologi, SMPN 37 meunang bantuan 40 tablét ti Wali Kota Bandung, husus keur kaperluan pangaweruh para siswa-siswi.
Pa Usin Sumdiana, S.Pd. Staf Kesiswaan
Kagiatan ékskulna nu nyongcolang salah sahijina nyatana Pajarpara alias pasukan pengibar bendéra. Ieu kagiatan anu ngarupakeun ékskul diiluan ku 35 siswa-siswi. Sakaligus diluluguan ku ketua OSIS-na Diva Oktaviana, kelas VIII-I. Latihanana saban poé Rebo, asuhan Kang Aléx kalawan binaan Bu Sulis Setiawati, S.Pd. Pajarpara SMPN 37 kungsi nyangking juara II tingkat Jawa Barat & Banten. Juara I Madya & Pemula tingkat Jawa Barat. Lian ti eta, SMPN 37 ogẻ ngahangkeutkeun ékskul olah raga, Baskét, Bola Volly, Futsal, taékwondo jrrd.
Kaayaan mangsa diajar
“Dina seni tur kasundaan ogé teu tinggaleun ngabina seni calung sareng vocal grup. Basa Saptu, ping 12 Maret 2016, manggung masal di alun-alun Ujungberung, husus kasenian calung mah dina kagiatan PPMBS (Peningkatan Mutu Berbasis Sekolah) sa-Kota Bandung, kitu saur Bu Hj. Iyan.
Penghijauan di SMPN 37 Kota Bandung
Sobat Sora, aya nu ahéng di SMPN 37, anu mungkin baé ékskul munggaran di satatar Bandung, nyatana ékskul olah raga tinju. Ieu ékskul diiluan ku kurang leuwih 15 siswa-siswi. Latihanana saban poé Rebo jeung Jumaah di Sasana 37. Pelatihna langsung guru olah ragana, Bapa Ahmad Salim. Keur ngahirupkeunana sok diayakeun turnamén tinju antar sasana. Di antara siswa-siswi anu ngiluan ieu ékskul nya éta Salfa kelas VIII-D, Kania kelas VII-D, Syahrul kelas VIII-J jeung Iqnal kelas VIII-G.
Salfa & Kania, anggota ekskul tinju SMPN 37 Kota Bandung
Basa Sora ngolongan ka ieu para nonoman pecinta tinju, naon kasang tukangna pangna resep kana olah raga tinju. Cenah tinju mah leuwih nangtang adrenalin turta irit jurusna. Paling anu karasa beurat téh pisik push up jeung lari-na. Teu kapalang favoritna ogé petinju urang Philipina, Manny Pacquiao.
Syahrul & Iqnal anggota ekskul Tinju SMPN 37 Kota Bandung
Sora ogé ngolongan deuih, naon baé harepan-harepan ka hareupna sahubungan reujeung olah raga tinju di SMPN 37. Boh Salfa, Kania, Syahrul boh Iqnal sapamadegan hayang boga sarana katut ka peralatan tinju anu lengkep, kayaning samsak, gamsil (pelindung gigi), hélem tinju ring tinju, jrrd. Ieu harepan téh dihaminan ku Waka. Kesiswaan Bapa H. Wirja, M.Pd jeung ku staf kesiswaan Bapa Usin Sumdiana, S.Pd.
Pajarpara SMPN 37 Kota Bandung
Saleuwihna Bu Hj. Iyan ngadadarkeun ageman SMPN 37 nyatana ngawangun generasi ASRI (Akhlak mulia, Sosial, Religius) kalawan mibanda wawasan cinta lingkungan. Turta ulah lésot tina papagon 3-S, Senyum, Salam, Sapa. Dipairan ku Pa Budi Purwadi, SMPN 37 anu mibanda 68 guru jeung caraka (karyawan), 32 rombel tur 1163 peserta didik mrioritaskeun akhlak anu luhung geusan cecekelan warga sakola, kakara wéh ajén akademikna nuturkeun. Mangkana saur Pa Budi taun 2013 (nalika dikepalaan ku Pa Aris) ngawangun masjid hasil réréongan infaq warga sakola hususna para siswa-siswi kalawan dikokojoan ku jariyah kepala sakolana. Nya ngajanggélék masjid dua lantéy, ukuran 6 méter ka 6 méter, masjid kareueus warga SMPN 37. [MS]***
