Tim Futsal Guru tur Karyawan SMAN 18 Kota Bandung, saméméh prung maén, lawan tim futsal Majalah Sora Plus, kemis 20 April 2017, di Lapang Futsal Progresif Bandung
majalahsora.com – Kemis pasosoré, 20 April 2017, tim futsal Majalah Sora tanding lawan tim Guru tur karyawan SMAN 18 Kota Bandung. Dina raraga meungkeut tali silaturahmi. Di sagigireun éta jadi pertadingan eksebisi méméh diayakeunana Turnamen Sora Cup II, antar Guru jeung Tenaga Kependidikan sa-Bandung Raya, nu baris dilaksanakeun tanggal 15 nepi ka 20 Méi 2017. Tempatna di lapang futsal Progresif Bandung.
Tim Futsal Majalah Sora Plus, méméh maén ngagaya heula
Kepala SMAN 18 Kota Bandung, Drs. Iwan Setiawan, tadina mah badé sumping ka pertandingan persahabatan kasabit téh, alatan aya hahalang anjeunna nitip salam baé, ngalangkungan sambungan telepon.
Nilik jalanna pertandingan kadua tim téh, teu éléh raména jeung permainan tim profesional. Kitu ogé nu maénna, teu béda jauh jeung Essien. Garesit kénéh, skilna gé lumayan keur pantar para guru jeung karayawan nu geus umuran mah, kayaning Pa Jajang Sonjaya, Pa Sinaga, jrrd. Kitu ogé ti tim Majalah Sora Plus, aya Pa Ahmad, Pa Andi, Pa Ayi, saparakanca.
poto kagiatan eksebisi Sora Cup II:
Maénna gé serius, ka gabred jeung kabadug mah hal nu umum. Ngaranna gé olahraga lalaki. Silih susul ngagulkeun ka gawang lawanna gé, nepi ka ahirna mah maén imbang 11-11. Sanajan maénna serius kadua tim téh tetep nyepeng pageuh kana sportifitas. Mudah-mudahan ku ieu kagiatan, tali silaturahmi Majalah Sora jeung SMAN 18 Kota Bandung mingkin raket. Cag! [MS]***
