Sutan Ahmad Jaludin, S.Ag, Kepala MA. Ulul Abshar Cilaku Cianjur
majalahsora.com, Kabupatén Cianjur – MA. Ulul Abshar Cianjur salah sahiji madrasah aliyah swasta nu aya di Kabupatén Cianjur. Alamatna aya di Jalan KUA Kampung Tugu Desa Ciharashas Kecamatan Cianjur. Aya dina papayung tur dikokolakeun ku Yayasan Al-Azmi Cianjur.
Bisa ngadegna éta madrasah téh, teu lésot tina niat hadé tur perjuangan para pendiri yayasan kasabit, di antarana; H. Rubijanto (alm), H.M. Sopandie (alm) sarta Hj. Euis Sumarni. Kiwari Yayasan Ulul Azmi dipupuhuan ku H.M., Budiman, S.
Patalina jeung judul di luhur, MA Ulul Abshar nu pernahna di kiduleun puser Kota Cianjur téh, ayeuna keur sibuk ngayakeun kagiatan pelantikan calon Pramuka Penegakna. Acarana lumangsung tilu poé, ti Jumaah kamari nepi ka Ahad nu bakal datang, nya éta ping 22-24 Séptémber 2017, Tempatna di Kebon Raya Cibodas Cianjur.
Saur Kepala MA-na, Sutan Ahmad Jalaludin, S. Ag, éta kagiatan téh diiluan ku 68 urang, ngawengku peserta jeung panitia. Diaping ku 8 urang tur aya pemateri 4 urang. Kagiatan kasabit téh boga ajén tur tujuan nu luhung, utamana keur nuwuhkeun sikep disiplin, kamandirian, sakalian tadabur alam sukur ka Alloh SWT. Di sagigireun éta pikeun ngahangkeutkeun pendidikan karakter ka para santri/siswana, luyu jeung kepres No. 87 taun 2017. [SR]***
