Pa Muharam Saripudin, S.Pd., Kepala SMPN 25 Kota Bandung, nu parantos ngadeudeul kagiatan Sora Cup II “Futsal Silaturahmi Pendidik & Tenaga Pendidik sa-Bandung Raya
majalahsora.com – Majalah Sunda Rumaja Sora, baris ngalaksanakeun Turnamen Futsal Pendidik jeung Tenaga Pendidik sa-Bandung Raya. Diiluan ku 32 tim SMA, SMK, MTs jeung SMP. Rencanana kagiatanana lumansung di Lapang Futsal Progresif, Bandung. Ti ping 15 nepi ka 19 Méi 2017.
Kang Andy Hafizh (nyepeng mix) Ketua Pelaksana
Bisa bajalanna ieu kagiatan téh teu lesot tina pangdeudeul ti Kepala Dinas Pendidikan Propinsi Jawa Barat, Dr. Ir. H. Ahmad Hadadi, M.Si, ogé Kepala Dinas Pendidikan Kota Bandung, Dr. H. Elih Sudiapermana. Disagigireun éta dideudeul ku para sponsor.
Sesi tanya jawab
“Alhamdulillah seueur nu ngadeudeul, boh ti Dinas Pendidikan Propinsi Jawa Barat, boh ti Dinas pendidikan Kota Bandung, ogé ti sponsor. Utamina ti para kepala sekolah nu tos ngintunkeun tim guru, tata usaha sareng padamelnana. Résponna saé pisan, hatur nuhun kasadaya pihak” saur Kang Andy, Ketua Pelaksanana.
Wawakil tim dina kagiatan technical meeting
Méméh prung tandang makalangan, aya kagiatan technical meeting heula poé Jumaah pasosoré, ping 12 Méi 2017. Tujuanana keur nyosialisasikeun aturan, masrahkeun persyaratan pamaén sarta undian tim nu baris tandang . Tempatna di Kampus SMPN 25 Kota Bandung nu dipingpin ku Bapa Muharam Saripudin, S.Pd.
Pa Ahmad, wawakil ti Majalah Sunda Rumaja Sora ditopi
“Hatur nuhun kana kasaéan Pa Muharam salaku Kepala SMPN 25 Kota Bandung, nu parantos nambutkeun tempat kanggo kagiatan technical meeting,” saur Pa Ahmad ti Majalah Sora.
Acarana lumangsung lancar sanajan rada mundur tina jadwal, alatan para pesertana kapegat ku hujan. Dina ieu kagiatan gé aya hal nu narik ati, mangsa pengundian timna, nya éta tim SMAN 16 Kota Bandung vs SMAN 18 Kota Bandung, nu jadi musuh bubuyutan tim siswana, ayeuna gé tim guruna langsung adu harepan dina pertandingan munggaran SORA CUP II.
Ieu yeuh pesertana téh; SMAN BPI Kota Bandung, SMAN 19 Kota Bandung, SMP Nusra Kota Bandung, SMP Kemah Kota Bandung, SMAN 1 Kota Bandung, SMAN 17 Kota Bandung, SMAN 14 Kota Bandung, MTs Attaufik Kota Bandung, MTs Al Irsyad Kota Bandung, SMA Swadaya Kota Bandung, SMA PGRI Kota Bandung, SMAN 18 Kota Bandung, SMKN 9 Kota Bandung, SMKN 12 Kota Bandung, SMAN 25 Kota Bandung, SMAN 16 Kota Bandung, SMAN 9 Kota Bandung, SMPN 33 Kota Bandung, SMAN 8 Kota Bandung, SMAN 11 Kota Bandung, SMKN 15 Kota Bandung, SMKN 5 Kota Bandung, SMAN 10 Kota Bandung, SMPN 25 Kota Bandung, SMPN 23 Kota Bandung, SMPN 53 Kota Bandung, SMK Merdeka Kota Bandung, SMKN 2 Kota Bandung, SMAN 24 Kota Bandung, SMKN 8 Kota Bandung, SMA YWKA Kota Bandung, SMAN 13 Kota Bandung jeung SMKN 2 Kota Bandung. [MS]***
