Drs. H. Lili Sukmana, M.M., Kepala SMK PGRI Kota Bandung
Buahbatu – Sobat Sora, SMK PGRI Kota Bandung, salah sahiji sakola swasta kejuruan nu aya di lelewek Kecamatan Buahbatu. Kamekaran tur pangwangunana kaasup mesat. Saméméhna kagiatan diangar ngajarna kungsi milu ka SMP PGRI 7 Kota Bandung, ayeuna mah geus boga wangunan sorangan nu representatif. Perenahna aya di Jalan Kencana Wangi 20 Komplék Pandanwangi, Kelurahan Cijawura.
Program keahlianana/jurusanana aya administrasi perkantoran (sekretaris), pemasaran/penjualan, multimedia sarta jurusan anyar nu dibuka taun ajaran ayeuna nya éta perbankan syariah. Pendaftaran keur siswa anyar dibuka ti anggangna kénéh, gelombang hiji dibuka ti 1 Maret nepi ka 31 Méi 2016. Gelombang duana di buka ti tanggal 1 Juni nepi ka 15 Juli 2016.
“Alhamdulillah dugi ka kaping 29 Juni 2016, tos aya 143 nu daftarna téh. Taun kamari mah nu katampi téh aya 90-an siswa. Taun ayeuna gé baris muka jurusan anyar nya éta jurusan perbankan syariah, siswana tos aya 15 urang,” saur Drs. H. Lili Sukmana, M.M., Kepala SMK PGRI Kota Bandung téh.
Poto istiméwa
Sarana & Prasarana di SMK PGRI Kota Bandung kawilang lengkep, aya laboratorium komputer multimedia, laboratorium pemasaran, internét, perpustakaan, wangunan anyar, lapang olah raga, jrrd. Salian ti sarana nu lengkep, ieu sakola gé dideudeul ku rupa-rupa ekskul pikeun ngawadahan bakat siswana, di antarana: pramuka, paskibra, seni tari, basket, voli sarta BTQ.
SMK PGRI Kota Bandung
“Mudah-mudahan pamaréntah Kota Bandung istiqomah numerapeun PPDB taun ayeuna. Ulah sapertos taun kamari sakola negri hayoh wé nampian siswana, sanaos PPDB tos ditutup. Karunya ka sakola swasta, dugi kakirangan siswa. Taun kamari mah ka SMK PGRI pendaftarna tos langkung ti 100 siswa ari hég téh, ngaralih ka SMK Negri nu hayoh nampian siswa, tungtungmna mah nyésa 90-an siswa. Tah taun ayeuna mah mudah-mudahan teu kajantenan deui. Mugia target 160 siswa anyar di SMK PGRI tinekanan, aminn,” saur Drs. H. Lili Sukmana, M.M., Kepala SMK PGRI Kota Bandung. [MS]***
