majalahsora.com – Tungtungna mah Persib Bandung hasil ngaraéh poin pinuh di Liga-1 Go-Jek Traveloka, satutas ngajongkéngkeun Sriwijaya FC di Stadion GBLA (Gelora Bandung Lautan Api), Gedébagé, Kota Bandung, malem Ahad ping 29 April 2017. Didua pertandingan méméhna, Persib ukur maén imbang, mangsa ngadu jajatén jeung Aréma FC (0-0) tur PS TNI (2-2).
Dina pertandingan nu katilu Pa Djadjang Nurjaman, pelatih Persib, ngarobah strategi jeung susunan pamaén nu teu ilahar dipaénkeun mangsa babak kahiji. Kayaning Tantan, Dedi Kusnandar jeung Maitimo nu kakara cageur tina cidera mata. Kitu deui Wildansyah nu mitembeyan maén di Liga-1 Go-Jek Traveloka, sabada ngaganti Hénhén di awal babak kadua.
Ti babak kahiji mula Maung Bandung geus maén agresif. Di dukung ku rébuan bobotoh, sumanget pamaén Persib beuki ngagedur. Nepi ka ngahasilkeun gol, dimenit ka-12. Sépakan sajorélat Atép, teu kabendung ku Téja Paku Alam, Kiper Sriwijaya FC. Gol-na téh, hasil gawé bareng apik, antara Tantan jeung Atép. Tantan suksés asup ka jero kotak pinalti lawan tur ngaliwatan sababaraha pamaén Sriwijaya FC. Operan Tantan ti katuhueun kiper Sriwijaya FC téh, langsung disepak ka juru kénca gul Sriwijaya FC. Dibabak kahiji Sriwijaya FC gé sababaraha kali ngancam pertahanan Persib Bandung.
Mangsa awal babak kadua, Persib ngasupkeun Wildansyah ngaganti Hénhén, sangkan pertahanan Persib leuwih tohaga. Sacara permaénan mah tetep agresif, teu méré lolongkrang keur Sriwijaya sangkan bisa ngarobah kaayaan. Sanajan di tengah babak mah, sababaraha kali pertahanan Persib téh diacak-acak ku pamaén Sriwijaya FC, utamana ku Rahmat Hidayat, Hilton Moriera jeung Beto Goncalves.
Nempo kaayaan kitu, Pa Djadjang Nurjaman, laju ngasupkeun Essien di menit ka-75. Kakara maén dua menit, Essien hasil méré operan ka Matsunaga laju neruskeun operan ka Febri, sangkan nyieun gul kadua Persib. Sépakanana ka katuhu gawang Téja Paku Alam teu kabendung. Nepi babak kadua lekasan, Persib hasil mertahankeun kaunggulanana 2-0. Ku kituna, ayeuna Persib nempatan posisi kadua di klasemen samentara Liga-1 Go-Jek Traveloka, ngumpulkeun poin lima, tina sakali meunang dua kali imbang .
Susunan pamaén Persib: I Made Wirawan, Vladimir Vujovic, Achmad Jufriyanto, Supardi Nasir, Henhen Herdiana (Wildaansyah 45′), Raphael Maitimo, Dedi Kusnandar, Gian Zola (Billy 66′), Febri Hariyadi, Atep (Matsunaga 47′), Tantan (Essien 75′). Cadangan: M Natshir Fadhil; Wildansyah, Hariono, Agung Mulyadi, Kim Jeffrey Kurniawan, Michael Essien, Shohei Matsunaga, Carlton Cole, Billy Keraf. Pelatih: Djadjang Nurdjaman.
Susunan pamaén Sriwijaya FC: Teja Paku Alam; Rudolof Yanto Basna, Firdaus Ramadhan, Gilang Ginarsa (Airlangga 78′), Yoo Hyun Koo, Hendra Sandi (Rachmad 46′), Slamet Budiyono (M Nur Iskandar 46′), Manda Cingi, Indra Permana, Alberto Goncalves, Hilton Moreira. Cadangan: M Sandy Firmansyah; Zalnando, Bobby Satria, Rachmad Hidayat, Marckho Sandy Merauje, M Nur Iskandar, Talaohu Abdul Mushafry, Maldini Pali, Airlangga Sucipto. Pelatih: Oswaldo Lessa. [MS]***
