Drs. Didi Sutardi, Kepala SMPN 48 Kota Bandung
Sobat Sora, urang nepangan Kepala SMPN 48 Kota Bandung, nya éta Drs. Didi Sutardi anu parantos sataun mancen pupuhu. April taun 2016, Pa Didi lekasan mingpin ieu sakola nu pernahna di Jalan Baturadén nomer 19 Ciwastra. Tah sateuacan Pa Didi purna tugas mingpin SMPN 48, Sora ngolongan rupa-rupa program jeung sawanganana sajeroning anjeunna ngaping ngajaring para peserta didikna, umumna warga sakola SMPN 48, warta lengkepna mah aos wé nya!
Drs. Endang Sudirman, Kepala TU SMPN 48 Kota Bandung
Di antara programna nya éta nargétkeun sakola anu natapakan kana titén lingkungan (berbasis lingkungan). Numutkeun Waka. Humas, Ibu Ida Widaningsih, S.Pd, M.Si, diréncangan ku Waka. Kesiswaan Téti Rochana Yulianti, S.Pd anu nyongcolang tur béda ti sakola-sakola séjénna sapanjang kapamingpinan Pa Didi nya éta interaksi reujeung para peserta didik, umumna warga sakola maké cara pendekatan hati, tegesna. Ngupayakeun kasadaran warga sakola kana nanjeurkeun aturan sakola utamana kana lingkunganana. Dina harti teu merlukeun diituh-étah, suhud tur harideng sorangan dina balap nyieun kahadéan geusan kamajuan sakola.
Ibu Ida Widaningsih, S.Pd, M.Si, (kénca), Ibu Téti Rochana Yulianti, S.Pd sareng alumni SMPN 48
Dina widang pisik atawa wangunan, Pa Didi ngupayakeun lingkungan sakola leuwih resik jeung genah merenah. Disagédéngeun ngahangkeutkeun gerakan adiwiyata, satutas naratas adiwiyata tingkat nasional taun 2015 kamari. Ngadu maniskeun warna taman sakola jeung wangunana ku anu leuwih pikabetaheun. Merenahkeun fasilitas WC, rohang kelas katut ka ngaréhab sakudak-sakedik wangunan masjid sakola. Ngabebenah bak-bak sampah sumbangan para alumni SMPN 48 angkatan 1985, ogé ngaoptimalkeun kagunaan 40 tablét bantuan Wali Kota Bandung.
Poto kénca ka katuhu, Bu Ami, Bu Sri, Bu Euis & Pa Mémén, TU SMPN 48
Dina widang akademis, ngupaya ngaronjatna mutu pangajaran saterusna dina widang non akademisi-na nu ngawengku kana 12 widang ékskul, ningkatkeun sarana-prasarana-na. Berekah saur Pa Didi, olah raga béla diri karaté geus nyangking juara 1 jeung 2 tingkat kota Bandung taun 2015 ahir. Dina widang kasundaan, Pa Didi kacida titénna kana nuwuhkeun kacinta siswa-siswi dina seni kacapi suling, degung, angklung utamana ngahirupkeun budaya seni alias piloting sekolah berbudaya Sunda.
Wacana Pa Didi geusan ngawanohkeun wayang golék ka warga sakola tegesna wayang golék bernuansa da’wah. Ku kituna dirarancang ka hareupna rék nabeuh wayang golék salila 2 jam di wewengkon SMPN 48.
“Naha bet wayang golék? Lantaran leubeut ku ajén papagah, tuladeun jeung tafakureun, anu buahna ngajadi spirit kaagamaan,” kitu saur Pa Didi.
Terus deuih ngupayakeun hirup maneuh sanggar seni ku cara pinton seni Sunda saban kelas dina mangsa istirahat, sacara bagilir unggal poé. Boh degung, calung, angklung, boh pintonan sajak atawa tembang pupuh.
Sobat Sora, taya salahna urna nyaho profil Drs. Didi Sutardi ti kadeukeutan. Anjeunna pituin Ciamis, lahir ping 29 Oktober 1959. Carogé ti Ibu N. Héryani, cikal ti dua sadulur pasangan kulawarga guru Ibu Tarsih sareng Bapa Suhandi (alm.). Rama ti Déwi Haryani (25 taun), Wisma (24 taun) jeung Intan (23 taun). Hobi mah geus pasti kana seni hususna seni Sunda. Tokoh inspiratifna di antarana téh Darso sareng Ki Dalang Asép Sunandar.
Pa Didi lulusan SDN Tambak Sari 2 taun 1971, SMPN Tambak Sari taun 1974, neruskeun ka SPGN Ciamis, lulus taun 1979. Kuliahna di UNPAS PKM Hum, lulus taun 1988. Mimiti ngajar di SD Sukarasa 3 Geger Kalong taun 1979, dina taun éta kénéh diangkat PNS. Terus ngajar di SMPN 7 Bandung ti taun 1993 tepi ka taun 2003 saterusna mancén kepala sakola swasta di SMP Plus Otista Kota Bandung, Cipamokolan ti taun 2008 tepi ka taun 2012. Ti taun 2012 nyangking kepala di SMPN 46 Kota Bandung, taun 2015 dialih pancén ngepalaan SMPN 48.
Kaayaan kelas
Dunya seni dipikawanoh tur dipikaresep ti mimiti sakola di SPG, hususna ngacapi, nyuling turta waditra degung. Sakabéhna ngalir dumasar sacara otodidak waé, ditambah bakat nu jadi sepuh nitis ka dirina. Emut cenah, upama sepuhna nuju ngacapi, anjeunna sok manco nengetan kalawan imeut. Lagu munggaran anu dipikatineung samangsa diajar ngacapi nya éta tembang perjoangan Karatagan Pamuda. Napel tepikeun ka ayeuna.
Kaayaan sakola
Basa Sora naroskeun, naon papagon hirup anjeunna salila ieu. Kalayan tandes ngawaler, Sunda Nu Urang, Maju Ku Urang.
“Di SMPN 48 téh teu kira reueus, ku sauyunanana para guru kalawan diwarnaan ku haliwuna barudak anu saban poé teu baroseun latihan seni kasundaan. Nineung ku nuansa kakulawargaanana, éstu teu aya panta-panta anu ngewag antara bapa sareng wakil kepala, antara bapa sareng para guru. Dina harti siligeuingna, conggahna jeung teu asa-asana tapi lain harti lésot bemakarama. Tetep wé hormat tilawat mah pakem dipaké,” kitu kamandang tur panineunganana ka SMPN 48, anu karék sataun ku anjeunna dipingpin.
Ekskul karate
Ku kituna, saur Pa Didi ka sing saha baé anu kabiruyungan mingpin SMPN 48 gaganti anjeunna engké, diharepkeun supaya leuwih ngaronjatkeun ajén kasundaan anu salila ieu dimumulé. Teruskeun malah ronjatkeun program-program anu geus aya utamana bag-bagan kasundaanana. [MS]***
