Ibu Iis Siti Aisyah, M.Pd., Kepala SMPN 40 Kota Bandung
majalahsora.com – Kagiatan Pre Lesson Study lumangsung di SMPN 40 Kota Bandung, poé Salasa 9 Méi 2017. Kagiatanana dilaksanakeun sapoé, ti pukul 10.25 nepi ka lekasan. Ieu sakola téh méméhna kapeto ku Pa Elih Sudiapermana, Kepala Dinas Pendidikan Kota Bandung, jadi Pilot Project Lesson Study, mangsa taun ajaran anyar 2017-2018.
Kabandungan ku Majalah Sora, guru nu nuju ngajarna téh keur dipeunteun tur dilalajoan ku kepala sekolah, pengawas, guru lianna, sarta dosén ti UPI. Jadi katempo plus minus-na téh. Salah sahiji nu meunteunna nya éta Prof. Sumar, Ph.D, dosen ti UPI (Universitas Pendidikan Indonésia)
Engkéna téh, lain saukur guru ti mata pelajaran IPA jeung matematika wungkul nu ngalaksanakeun kagiatan Lesson Study-na téh tapi ogé dilaksanakeun ku sakabéh MGMPS (Musyawarah Guru Mata Pelajaran Sekolah). “Insya Alloh mangsa taun ajaran anyar kira-kira ti sasih Agustus, Séptémber dugi ka Nopémber, minimal dina jero sataun para guru nu ngawulang di SMPN 40 Kota Bandung tiasa ngalaksanakeun Lesson Study,” saur Bu Iis Siti Aisyah, M.Pd, Kepala Sekolahna.
Prof. Sumar, Ph.D., Ketua Lesson Study ti UPI
Kagiatanana gawé bareng jeung UPI. Tujuan ayana Lesson Study téh salah sahijina keur ngupayakeun jeung nanjeurkeun proses hasil jeung pangajaran di jero kelas. Jadi condong nekenkeun kamampuh guru mangsa ngajar di jero kelas, salian ti éta guru nu ngalalajoanana bisa ngala élmu ti guru nu keur ngajar, sabalikna guru nu ngajarna dievaluasi mangsa aya kakuranganana. [MS]***
