Ibu Siti Aisyah, M.Pd. Kepala SMPN 40 Kota Bandung
Sobat Sora, pareng silaturahmi ka SMPN 40 nu perenahna di Jalan Wastukencana Nomer 75-A Bandung. Nepangan pupuhuna, Ibu Siti Aisyah, M.Pd anu nembé sataun jeneng kepala SMPN 40 Bandung.
Pa Sugeng Wardoyo, M.Pd, Waka. Kesiswaan
Ngeunaan program-programna, Ibu Siti Aisyah nétélakeun geusan ngamumulé tur neraskeun program ti sateuacanna, utamana ngawujudkeun binaan karakter religious. Saperti ngabiasakeun solat duha, ngaderes bacaan Alquran sateuacan kagiatan diajar jeung ngajar, tempatna di lapangan ieu sakola. Siangna ngabiasakeun solat lohor berjamaah di masjid sakola. Salina ti éta ngabiasakeun 3-S: Salam, Senyum, Sapa.
Siswa SMPN 40 sabada reres sholat jum’ah
Program saterusna ngabiasakeun sikep miduli lingkungan. Ku kituna dibentuk tim adiwiyata kalawan sapopoéna pancén nganiléy, rohang jeung aréa mana anu pangtiténna kana kaséhatan jeung kaberesihan lingkungan kelas.
Dra. Hérlina, Waka. Sapras SMPN 40
Husus ka para siswa-siswi diupayakeun kabiasaan konsultasi reujeung para guru, ngadu’a babarengan geusan para siswa-siswi leuwih ngarasakeun diperhatikeun ku sakola. Ogé ngupayakeun giat ngarojong program wali kota dina “Bandung Masagi” nu di seundak ku opat pilar téa.
Kaayaan di jero Masjid SMPN 40 Kota Bandung
Dina wangun fisik, Bu Siti Aisyah anu mancén dines pupuhu ti Bulan Maret 2015 ngaheulakeun bérés-roésna pangwangunan masjid sakola. Berekah saurna, ayeuna keur dikeureuyeuh kantun nganggeuskeun kubahna. Saterasna ngabebenah kudang di aréa tukang wangunan sakola, ngabebenah salokal kelas anyar jeung salokal toilét putri.
Lapang sakola
Anu unik tur ahéng deuih, di SMPN 40 nu ngawengku leuwih ti 1000 peserta didik ditambah 84 guru pleus caraka dilengkepan ku 31 rombel (asup isuk-isuk) jeung 8 rombel SMP Terbuka, aya program terapi hikmatul iman anu maneuh saban poé Juma’ah. Ieu terapi kamangpaatanana keur saurning warga sakola boh para guru boh para siswa-siswina.
Kaayaan kelas di SMPN 40 Kota Bandung
Sora ogé ngobrol reujeung Waka. Sapras SMPN 40, Ibu Dra. Hérlina, saurna SMPN 40 keur ngahangkeutkeun fasilitas infokus di saban kelasna. Nataharkeun rohang multimedia ogé ngaréngsékeun tangga masjid tepi ka lantéy dua, terus nataharkeun proyék jambatan sambungan antar blok kelas. Nambahan RKB (Ruang Kelas Baru) sarta lima toilét,. Nata ulang pataman sakola turta ngubyagkeun tutuwuhan héjo (penghijauan) sakaligus ngawujudkeun sarana green house.
Pabukon SMPN 40 Kota Bandung
Dina widang préstasi panganyarna, Sora ngolongan ka Pa Sugeng Wardoyo, M.Pd, Waka. Kesiswaan. Pa Sugeng nu linggih di komplék Bumi Asri Regency, medar utamana préstasi anu jadi ciri has SMPN 40 nyatana olah raga Bola Voli (Putra): Juara kahiji O2SN SMPN 4 Cup. Juara kahiji SMK Pasundan 3 Cup. Juara II SMA St. Angela Cup. Geus dua taun noron jadi juara O2SN tingkat Kota Bandung, taun 2014 jeung 2015. Dina O2SN ka hareupna nataharkeun target juara kahiji deui. Salian ti éta, Juara II Futsal Putra di SMA Angkasa Bandung. Juara I Futsal Putra di SMK ICB Bandung. Juara Pawéy Obor, dina raraga miéling Bandung Lautan Api (BLA) katagori Lampion awal taun 2016. Jeung nu panganyarna dina awal taun 2016 SMPN 40 nyangking piala dina kagiatan Bripara (Brigade Pengibar Bendera), jrrd.
Kaayaan di rohang TU
Salah sahiji kagiatan di rohang TU
Dina tungtung gempangan, Sora ngolongan deui ka Bu Kepala SMPN 40 perihal pamaké sakola, saurna tandes geusan “Nu jauh urang deukeutkeun. Geus deukeut urang layeutkeun. Geus layeut urang paheutkeun. Pikeun gawé bareng ngawangun bangsa.”
Salah sahiji lorong sakola, tempat ngariung sabada réngsé diajar
“Sawangan ka payun mah teu aya kajabi hoyong SDM para guru sareng para siswa-siswina langkung asak. SDM nu aya geusan dimumulé turta dimekarkeun ku palakon sabilulungan tur sabeungkeutan dina reundeuk,” Kitu saur Bu Siti Aisyah daria, serius tapi santéy.
Siswi SMPN 40 Kota Bandung, narsis heula nya Sobat Sora!
Sacara pribadi, Bu Kepala ogé mibanda motto DUITS; Du’a, Usaha, Ikhlas, Tawakal, Syukur. Diwewegan ku kamandangna geusan ngamotivasi ngawangun karakter religius kalawan wawasan haat kana lingkungan. Heup. [MS]***
