“Ngawujudkeun Jengléngan Peserta Didik Anu Pengkuh Agamana Luhung Elmuna Jembar Budayana”
Bapa Apéh Sumarna, S.Pd. Kepala SMP Pasundan 6 Kota Bandung
Bapa Apéh Sumarna, S.Pd. Kepala SMP Pasundan 6 Kota Bandung, dipoto sareng alumnina nu ditampi di SMA Negeri 6 Bandung
Sobat Sora, urang ngadongdon SMP Pasundan 6 Bandung anu perenahna di Jalan Sumatra Nomer 41 Bandung. Nepangan kepala sekolahna Bapa Apéh Sumarna, S.Pd. Sora ogé silaturahmi sareng Bapa Cécép Roni Suryana, S.Pd.I, Bapa Dadang, Bapa Suhana, Bapa Hénhén Djoémhana, Bapa Solichin, A.Md, sareng Ibu Diah Nurhayati.
Pa Adang, guru olah raga SMP Pasundan 6 Kota Bandung dipoto sareng siswa-siswi ieu sakola
Program-program Pa Apéh anu kakara mancén kepala di SMP Pasundan 6 Bandung ti taun 2015, di antarana ngaaktifkeun KBM (Kegiatan Belajar mengajar) tepi ka poé Saptu, husus opat mata pelajaran anu biasa di-UN-keun. Ngarencanakeun gerakan tahfizh Alquran Juz Amma, minimal para peserta didik kudu katalar 13 surat-surat pondok. Nyadiakeun perangkat infokus di tiap rohang kelas turta ngabebenah rohang KBM ku cara ngamangpaatkeun pentilasi alami ulah ngandelkeun teuing kipas angin.
Kaayaan diajar di jero kelas
Ngarevisi visi jeung misi sakola anu maneuh saban opat taun sakali, hususna visi-misi SMP Pasundan 6 geusan ngawujudkeun jengléngan peserta didik anu pengkuh agamana, luhung élmuna jeung jembar budayana. Diwacanakeun ogé geusan ngaaktifkeun poé minggu sangkan bisa dipaké kagiatan widang ékstrakurikulér.
Guru nuju ngawulang
Dina ngaronjatkeun SDM para guru, Pa Apéh miharep para guru turun langsung ka lapangan lantaran évaluasi kaberhasilan baris ditoong tina bukti gawé di lapangan. Hal ieu dumasar papagon lawas, Hadé gawé nyata dina tapak, hadé niat atra dina tanggung jawab. Pa Apéh nekenkeun éféktifitas tenaga pengajar sangkan leuwih ngaronjat. Ngupayakeun irit jumlah tenaga pengajar tapi leubeut kamangpaatanana ka peserta didik. Ulah tepi ka sabalikna.
Lab. Komputer
Kagiatan olah raga
Tilu udagan anu dipaké tatapakan Pa Apéh dina ngahangkeutkeun pangwangunan SMP Pasundan 6 anu dipupuhuanana téh, kahiji power kamampuhan keur ngarobah, kadua léngkah ka hareup anu panjang tur jauh, katilu power keur ulun kumawula ka para peserta didik.
Salah sahiji rohangan nu direnovasi
Rohang perpustakanana keur direnovasi
Rencanana, kabéh bangku nu aya di SMP Pasundan 6 Kota Bandung baris maké modél saperti poto di luhur
SMP Pasundan 6 Bandung dikokolakeun ku 30 guru jeung karyawan, total siswana 612 urang. Guru-guruna ti lulusan baragem élmu pangaweruh, anu ngamungkinkeun mampuh nyitak siswa-siswi ngagem pangaweruh, cerdas jeung mibanda akhlak linuhung. Guru-guruna jebolan negeri, guru tetep jeung guru anu diperbantukeun.
Kaayaan rohang guru
Widang kurikulum, taun ajaran 2016-2017, SMP Pasundan 6 Bandung ngagunakeun Kurikulum Tingkat Satuan Pendidikan (KTSP) 2006 keur kelas VII jeung kelas IX. Sedengkeun kelas VII mah ngagunakeun Kurikulum Nasional lantaran SMP Pasundan 6 Bandung ngarupakeun sakola sasaran gawé reujeung SMP Negeri 7, SMP Negeri 44 jeung SMP Juara reujeung pendamping SMP Negeri 2 Bandung.
Bapa Suhana, Bapa Hénhén Djoémhana, Bapa Solichin, A.Md sareng Bapa Cécép Roni Suryana, S.Pd.I
Kagiatan-kagiatan para pserta didik SMP Pasundan 6 Bandung dibekelan ku baragem kagiatan pangrojong kagiatan ékstrakurikulér saperti karawitan, degung, angklung, suling, kacapi, kawih, tari, basket, bola voli, futsal rampak kendang jeung baca tulis Al-quran. Fasilitasna ngawengku kana rohang kelas, laboratorium komputer, laboratorium bahasa, laboratorium IPA, fasilitas kaagamaan, fasilitas olah raga, pabukon (perpustakaan), rohang Osis, UKS, koperasi sakola, kantin jeung sarana masjid anu nampung 300 peserta didik.
Ibu Diah
Udagan-udagan SMP Pasundan 6 Bandung sakumaha béréndél dina misina; nancebkeun kaimanan jeung katakwaan ngaliwatan amalan dumasar ajaran Agama Islam. Nuwuh kembangkeun élmu pangaweruh jeung téhnologi dumasar minat, bakat jeung poténsi peserta didik. Ngaronjatkeun pelayanan turta ngaoptimalkeun sumber daya anu dipiboga kaasup sarana jeung prasarana-na. Ngajalankeun gawé bareng anu harmonis antar warga sakola jeung lembaga séjénna. Ngaronjatkeun pamahaman sikep jeung tingkah laku anu mibanda akar budaya Sunda jeung sikep tanggung jawab dina kahirupan berbagsa jeung bernegara.
Sacara umum dirumuskeun yén tujuan pendidikan SMP Pasundan 6 Bandung, antara lain; Ngabentuk lulusan peserta didik anu mampuh turta biasa ngalakonan solat wajib lima waktu, mapuh maca Al-quran, katalar juz amma keur peserta didik anu ngagem Agama Islam turta mampuh nerapkeun materi pangajaran agama jeung akhlak mulia dina kahirupan sapopoé luyu jeung ageman anu dianutna. Saterusna ngabentuk peserta didik geusan mampuh ngulik, neuleuman katut ka nelaah baragem pasualan diri jeung social sacara ilmiah, kritis, rasional jeung kréatif jeroning hirup kumbuh di satengahing masyarakat luyu rejeung norma agama ogé norma sosial. [MS]***
