Drs. Ajab Mustajab, Kepala SMP Pasundan 3 Kota Bandung nu visioner
Sobat Sora, pareng silaturahmi ka wewengkon SMP Pasundan 3 anu perenahna di Jalan Bapa Husén Belakang No. 4, hareupeun Rumah Sakit Advent, Bandung. Nepangan kepala sekolahna, Drs. A. Mustajab anu mancén pupuhu ti taun 2013 alihan ti SMP Pasundan 8 Kota Bandung sareng ti SMP Pasundan 2 Kota Bandung. SMP Pasundan 3 dikokolakeun ku 50 urang guru jeung caraka, 300 siswa/i peserta UN katut ka sajumlah 885 peserta didik, siswa jeung siswi.
Katerangan poto (kénca ka katuhu): Pa Endang Supriatna (bendahara), Pa Dadang Budiman (Wakasek. Kurikulum), Bu Ina (Wakil Kepala TU), Pa Eska Mulyana (TU), Pa Muhammad Rizki (TU).
Program-program anu keur dikeureuyeuh nya éta kuriak ngabebenah insprastruktur, wangunan kelas aréa hareup, wangunan masjid jrrd. Taun 2016-2017 neueulkeun unggulna kualitas warga sakola boh para peserta didik boh para guruna. Rarancangna geusan ngabagi dua tina jumlah sakabéh peserta didik anu engkéna baris dikompetisikeun masing-masingna. Tangtu dideudeul ku hadiah sakeur peserta didik anu unggul tur nyongcolang dina UN.
Buruan hareup SMP Pasundan 3 Kota Bandung, beuki geulis satutas dibebenah
Drs. A. Mustajab meupeujeuhan para guru sangkan dina ngajar kudu natapakan kana RPP (Rencana Prosés Pembelajaran) sacara optimal.
Harepan Drs. A. Mustajab taya kajaba geusan ngaoptimalkeun méntalitas para guru dina ngalaksanakeun pancén ngajarna. Di SMP Pasundan anu dipingpinna, ngalarang para guru ngajual LKS. Udaganana nu penting sakabéh warga sakola ngalaksanakeun bener heula, soal alus engké ogé baris nuturkeun.
Kaayaan taman sakola
Ditanya ngeunaan UN taun 2016, anjeunna nerangkeun, utamana neueulkeun kasiapan jeung kaparigelan para guru (guru opat mata pelajaran; Basa Indonésia, Basa Inggris, Matématika jeung IPA) sangkan ariatna dina ngabimbing para peserta didik nu nyanghareupan UN, di antarana ku cara nambahan jam pelajaran. Boh seméster 1 boh seméster dua-na masing-masing 5 jam. Para guru dina ngalaksanakeun pancénna kudu bener-bener napak kana SKL (Standar Kompeténsi Lulusan), ngupaya ayana pemantauan guru opat mata pelajaran sarta ngawacanakeun masang CCTV di saban kelas anu ditangtukeun. Malahan dina raraga nyanghareupan ujian nagara 2016 para peserta didik SMP Pasundan hususna para peserta UN anu jumlahna 300 siswa/i kumpul di Masjid Raya Cipaganti Jl. Cipaganti Bandung (Senén, 2 Méi 2016) Dina éta acara anu lumangsung ti pukul 07.00 tepi ka pukul 09.00, para peserta didik kalawan hidmat ngabandungan tausyiah Ustad Drs. Solihat, M.Pd.
Adu manis pulas tembok nu modéren tur minimalis, matak geunah nu nempona
“Biasana para siswa/i sok hariwang mun nyanghareupan UN téh. Muga waé ku ayana ieu tausyiah, para siswa bakal leuwih tenang. Kantun pasrahkeun ka Gusti Alloh SWT, nu penting mah tangtosna kedah siap mental boh rohani boh jasmani. Ogé kedah soson-soson ngapalkeun,” kitu saur Drs. A. Mustajab. Intina éta acara awur bekel ka para peserta didik malar leuwih daria dina diajar, kitu deui prak-prakanana. Engké pas ujian nasional geus enya-enya siapna.
Méméh dibangun tur direnovasi
sabada di renovasi tur diwangun
“Sim kuring ngarasa bungah ku ayana ieu acara tausyiah. Muga waé para siswa téh leuwih ngaronjat dina ngalarapkeun ajén-inajén spiritual ngalaksanakeun ujian nasional, masing tetep tenang tur pokus. Katambah deuih beuki gariat dialajarna,” cék Ustad Solihat.
Kumaha ari cék siswa, dina nyikepan kagiatan istighosah jeung tausyiah téh? “Abdi pribadi sareng réréncangan sadayana Insya Alloh tos siap mayunan UN. Sing saha waé anu badé mayunan UN manawi tiasa ngatur waktos kanggo diajar sareng anu utamina mah jujur dina ngajalankeun UN,” cék Asti anu dienyakeun ku Adelia.
Pa Ajab Mustajab, terus mémérés kaayaan sakola pikeun méré pelayanan nu optimal
SMP Pasundan 3 Kota Bandung mibanda status terakreditasi A, dumasar sertifikat SK Penetapan Hasil Akreditasi BAP-SM No. 02. 00/151/ BAP-SM/SK/XI/2015 anu ditetepkeun dina kaping 12 Nopémber 2015. Kurikulumna ngawengku kana hiji kurikulum pamaréntah dumasar kana struktur program kurikulum SMP anu lumarap dina danget ieu. Kaduana kurikulum YPDM Pasundan dumasar Agama Islam jeung budaya Sunda. Katilu pendidikan komputer atawa perangkat internet geusan ngarojong kana téhnologi komunikasi global.
Ekstrakurikulérna di antarana: pramuka, paskibra, PMR, baskét, voli, futsal, LaPas (Kaligrafi/BTQ), karawitan, seni tari jeung paduan suara.
Fasilitasna internet, laboratorium komputer, laboratorium IPA, Pabukon (perpustakaan), Gedung belajar dua lantéy, sarana ibadah (masjid), lapangan olah raga, ajang kagiatan OSIS, ajang kagiatan PMR, ajang kagiatan pramuka, ajang kagiatan kasenian, lahan parkir katut ka satpam.
“Program-program nu ayeuna dikeureuyeuh ku Pa Ajab, saé pisan. Anjeunna teras-terasan mémérés sarana sareng prasarana sakola. Eta sadaya tangtos kanggo kamajuan SMP Pasundan 3 Kota Bandung.,”saur Pa Endang sareng Bu Ina.
“Bapa salaku guru di SMP Pasundan 3 Kota Bandung reueus ningal kamajuan sakola. Salami kapamingpinan Pa Ajab, mesat pisan kamajuanana. Anjeunn tegas sareng visioner. Sacara SDM teras-terasan ditingkatkeun. Bapa ngawakilan guru-guru SMP Pasundan 3 Kota Bandung, miharep sadaya guru tiasa ngalaksanakeun kawajibanana sacara optimal sareng sauyunan ngamajukeun SMP Pasundan 3 Kota Bandung,” saur Pa Dadang, Wakasek. Kurikulum.
Sababaraha program di SMP Pasundan 3 Kota Bandung, nya éta méré bantuan mangrupa uang SPP geratis, keur para peserta didik renking 1 di kelasna, keur para peserta didik anu mibanda préstasi dina widang olah raga tingkat kabupatén/kota, keur para peserta didik anu mibanda préstasi dina widang seni tingkat kabupatén/kota, keur para peserta didik anu teu mampuh sacara ékonomi, keur peserta didik yatim piatu ti kulawarga anu teu mampuh. Lian ti éta baris dibébaskeun tina biaya sakola ogé baris dideudeul seragam geratis ti pihak sakola.
Dina ngabenenah sarana prasarana, Drs. A. Mustajab muji syukur ka Gusti Alloh lantaran keur ngeureuyeuh maju ka réngsé utamana rehab kelas, salapan rohang. Alhasil geus lima lokal anu diréhab tur dibébérés salila Drs. A. Mustajab mingpin SMP Pasundan 3. Sawatara wacana ka hareupna geusan ngararancang wangunan jero jadi dua lantéy jeung mapas wangunan muka supagi rata turta ngalegaan buruan hareup. [MS]***
