Dra. Rini Ambarwati, M.Ds., Kepala SMKN 5 Kota Bandung
majalahsora.com – Poé Juma’ah ping 2 Juni 2017, SMKN 5 Kota Bandung, nu pernahna di Jalan Bojong Konéng, No. 37 A, Kelurahan Sukapada, Kecamatan Bojong Konéng téh, katatamuan wawakil ti Area Manager CSR and Smepp JBB, PT. Pertamina. Tujuanana dina raraga masrahkeun bantuan PKBL (Program Kemitraan dan Bina Lingkungan) ti Pertamina Region JBB (Jawa Bagian Barat), nu salah sahijina ngokolakeun wilayah Bandung.
Bantuanana téh mangrupa peralatan jeung bahan prakték laboratorium keur paket keahlian Analis Kimia. Lamun dirupiahkeun mah nya éta Rp. 160 juta, gedéna téh. Méméhna, basa bulan Pébruari 2017, pihak SMKN 5 Kota Bandung, masrahkeun proposal ka Pertamina, laju dianalis ku Area Manager CSR and Smepp JBB, sabada disatujuan, kira-kira bulan Maret 2017 terus disurvey, kaasup tanya jawab antara pihak Pertamina jeung pihak SMKN 5 Kota Bandung.
Kepala SMKN 5 Kota Bandung dipoto sareng wawakil ti Area Manager CSR and Smepp JBB, guru tur siswana
Program PKBL ti Pertamina téh geus bajalan ti taun 1993 mula, aya sababaraha sektor nu beunang bantuan ti Pertamina ngaliwatan PKBL téh kayaning; pendidikan, kaséhatan, ngarenovasi masjid, sarana prasaran umum, bencana alam, kemasarakatan, megatkeun kemiskinan, jsté. Waragadna hasil nyisihkeun tina kauntungan Pertamina, nu geus diatur ku Kamentrian BUMN.
“Balaréa gé tiasa ngajengkeun bantosan ka Pertamina, mung kedah ngalangkungan sababaraha proses, teu tiasa kitu baé, kalebet SMKN 5 Kota Bandung nu parantos ngalangkungan sababaraha prosés sarta luyu sareng program PKBL Pertamina. Waragadna tina kauntungan Pertamina. Ieu téh salah sawios kadeudeuh Pertamina kanggo masarakat, miharep masarakat téh kedah langkung reueus tur rasa memiliki. Salah sahijina nganggo produk-produk ti Pertamina, alatan artosna uwih deui ka masarakat,” saur Bu Zulfiani Sakani, wawakil ti Area Manager CRS & Smepp JBB Pertamina.
Di laboratorium paket keahlian Analis Kimia SMKN 5
Bantuanana ditarima sacara simbolis ku Bu Rini Ambarwati, M.Ds., Kepala SMKN 5 Kota Bandung, disaksian ku para guru tur siswana. Bu Rini nétélakeun méméhna SMKN 5 Kota Bandung téh ngajukeun proposal nu gedéna Rp. 1 miliar, pikeun sakabéh pakét keahlian nu aya di SMKN 5 Kota Bandung, kayaning; TKBB, TGB, Géomatika, Analis Kimia jeung TKJ.
“Tadina mah ngajengkeun Rp. 1 miliar dina proposalna téh, pikeun sadaya paket keahlian nu aya di SMKN 5 Kota Bandung. Mung kadieunakeun dipilih wé paket keahlian nu leres-leres meryogikeun, nya éta pakét keahlian Analis Kimia, kanggo ngumplitan peralatan tur bahan praktek di laboratorium, pakét keahlian kasabit,” saur Bu Rini téh.
Bu Rini, Kepala SMKN 5 nampi bantuan sacara simbolis ti Bu Zulfi, wawakil Area Manajer CSR & Smepp Pertamina JBB
Ku program PKBL, Pertamina miharep bisa ningkatkeun ajén inajén atikan di Indonésia, hususna di SMKN 5 Kota Bandung. Ku kituna kagiatan diajar jeung ngajar antara guru reujeung siswa di SMKN 5 Kota Bandung téh leuwih ngajaul tur berkualitas.
“Alhamdulillah sim kuring salaku Kepala SMKN 5 Kota Bandung, seja ngahaturkeun réwu nuhun kana bantosan ti Pertamina. Nu munggaran ieu téh. Jumlahna gé diluar ekspektasi sim kuring. Da teu sadaya waragad nu di kokolakeun tina BOS sareng iuran bulanan téh tiasa minuhan pangabutuh sakola dina ngawewegan peralatan tur fasilitas sakola. Ku bantuan ti Pertamina, ngalangkungan program PKBL téh, SMKN 5 Kota Bandung janten kawantu pisan, hatur nuhun,” saur Bu Rini Kepala SMKN 5 Kota Bandung nu visioner téh [MS]***
