H. Asép Rusmana, S.Pd., M.M.Pd., Kepala SMKN 3 Balééndah
Balééndah – Senén ping 30 Januari 2017, Majalah Sora silaturahmi ka SMKN 3 BE (Balééndah), nepangan Kepala Sekolahna, H. Asép Rusmana, S.Pd., M.M.Pd. Sanaos nuju sibuk, anjeunna masihan lolongkrang waktu ka Majalah Sora. Diwawancara ngeunaan alih kelola SMK/SMA ka Propinsi Jawa Barat tur persiapan UNBK (Ujian Nasional Berbasis Komputer) taun 2017.
Drs. Taufik Hidayat, Waka. Kesiswaan SMKN 3 Balééndah
SMKN 3 BE (Balééndah) pernahna di Jalan Adipati Agung No. 34, Balééndah, Kabupatén Bandung. Dina anggang ahir Désémber 2016 nepi ka Januari 2017 keur riweuh ku rupa-rupa kagiatan, utamana mémérés administrasi guru, tenaga administrasi tur karyawan ieu sakola, nu alih kelola ti Dinas Pendidikan dan Kebudayaan Kabupatén Bandung ka Dinas Pendidikan Propinsi Jawa Barat.
Pa Wildan Zauzi, S.S., Guru Basa Sunda & Proktor UNBK SMKN 3 Balééndah
Salian ti hal di luhur, ayeuna SMKN 3 BE gé tatahar minuhan fasilitas keur kagiatan UNBK nu munggaran dilaksanakeun di ieu sakola.
Komputer anyar SMKN 3 Baleendah keur kagiatan UNBK taun 2017
Alatan kitu, H. Asép Rusmana, S.Pd., M.M.Pd., serius naker nyiapkeun sarana jeung prasaranana. Kayaning ngoptimalkeun jaringan internet, tur jumlah komputerna. Haneut kénéh SMKN 3 BE meuli 135 unit komputer anyar. Engkéna baris dipaké ku siswa kelas XII nu jumlahna 328 urang ti kompetensi keahlian Agribisnis dan Kultur Jaringan Tanaman, Bisnis Manajemen Pemasaran, Akuntasnsi sarta Administrasi Perkantoran.
Pa Saeful Rohman, A.Md., (ngadeg) teknisi
Rencanana séjénna, salian ti dipaké sacara internal, fasilitas komputer jeung sagala hal nu aya patalina jeung UNBK di SMKN 3 BE téh, baris diinjeum ku salah sahiji SMP jeung SMA nu aya disabudeureun ieu sakola.
Lapang SMKN 3 Baleendah
“Sabada SMA sareng SMK dikokolakeun ku Dinas Pendidikan Propinsi Jawa Barat, mudah-mudahan langkung majeng sareng seueur perobihan nu positif. Hususna kanggo SMKN 3 BE, ngadeudeul pisan program ti pamaréntah pusat sareng propinsi. Salah sawiosna ngalaksanakeun UNBK. Sanaos waragadna ageung, alhamdulillah ku niat nu saé, sakola lalaunan tiasa minuhan fasilitas sapras UNBK. Insya Alloh proktor sareng teknisi UNBK gé tos siap,” saur H. Asép Rusmana Kepala SMKN 3 BE. Nu nyepeng papagon hirup “Nyieun Kahadéan keur Nagara”, téh.
Kayaan di kelas SMKN 3 Balééndah
Méméh prung kagiatan UNBK nu saenyana, april 2017, siswa SMKN 3 BE engkéna dibekelan heula. Rencananana aya sosialisasi jeung try out sababaraha kali.
Pabukon SMKN 3 Balééndah
Tah Sobat Sora, ieu mah béja lianna, nya! Saprak SMKN 3 BE dipingpin ku H. Asép Rusmana, réa pisan perubahanana. Nu katémbong mah tangtu tina sisi wangunan sakola. Ayeuna mah leuwih katata apik, leuwih bararesih jeung garareunah, sanajan can sampurna.
Ayeuna aya sababaraha wangunan sakola nu keur dikeureuyeuh pangwangunanana. Kanyaning kantin sakola, jembatan nu nyambungkeun antar kelas nu aya di lantéy dua, masjid sakola, toko paragi kagiatan teaching factory, jrrd. [MS]***
