Kepala SMKN 15 Kota Bandung, Drs. Slamet Heryadi, M.Pd
majalahsora.com, Kota Bandung – Di tungtung kulon Jalan Gatot Subroto Bandung , kencaeun jalan, saméméh parapatan lima aya sakola nahun, wawangunanana gé antik titingal Walanda, yasana arsitek Frans Johan Lowrens Ghijels ahli planolohi Walanda, baheulana mah dipaké Kweek School Voor Onderwinzer.
Numutkeun sajarahna SMKN 15 ngalaman sababaraha ganti ngaran jeung pungsi. Sabada Kweek School Voor Onderwinzwer tanggal 15 Februari 1952 ngaranna robah jadi Indoeenheidts Verbond (Gabungan Indo Unit Kesatuan Indonesia / GIKI ).
Kaayaan di rohang BK
Sataun ti harita jadi Sekolah Guru Atas (SGA) Negeri II Bandung. Harita mah ngaran jalanna ge Jalan Papandayan, taun 60-an kakara robah jadi Jalan Gatot Subroto. Laju dina tanggal 22 April 1978 robah deui jadi SPG Negeri I. Saterusna dumasar SK Kakanwil Depdikbud Propinsi Jawa Barat No. 114 b/I02/Kep/R83 SPG Negeri I ti mimiti tanggal 1 September 1983 dipaké Sekolah Guru Olahraga (SGO) Negeri. Ti dinya robah deui jadi Sekolah Menengah Pekerjaan Sosial (SMPS) Negeri. Tah dina taun 1997 kakara robah jadi SMK Negeri 15 Bandung Kelompok Kesejahteraan Masyarakat Bidang Keahlian dan Program Keahlian Pekerjaan Sosial. Katompernakeun tahun 2003 ditambah deui ku Keahlian Pariwisata dengan program Keahlian Akomodasi.
Perpustakaan teu weleh haneuteun
Tah naon waé nu geus dipilampah ku SMNK 15 kiwari dina enggoning numuwuhmekarkeun kualitas atikan siswa jeung lulusanana, Majalah Sora ngahaja nganjang ka sakolana di Jl. Gatot Subroto No.4 Kota Bandung.
Saur Drs. Slamet Heryadi, M.Pd, Kapala Sakola SMKN 15 Bandung, sakolana satekah polah terus ngaronjatkeun mutu, kualitas atikanana sacara teori jeung praktekna, boh pikeun siswa boh guru, nu sipatna praktet di sakola atawa praktek kerja industri (PKL).
UKS-Ngarawat Siswa nu Kurang Sehat
Nu kaduana ngundakkeun mutu siswa ku kagiatan-kagiatan nu sipatna non akademik (ekskul) .Sakola satékah polah ngaronjatkeun “minat & bakat” ku kagiatan eskul ku jalan ngayakeun kagiatan–kagiatan jeung kompetisi, boh nu diayakeun ku pihak sejen boh ku sakola.
“Alhamdulilah prestasi nu diraéh ku jurusan Pekerjaan Sosial dina LKS Lomba Kompetisi Sosial taun 2017 Juara Tingkat 1 Nasional. Program kaahlian nu sanesna unggul di futsal, taekwondo sareng teater (basa Sunda/Indonesia),” Pokna reueus. Jadi ku ayana eskul téh berkah cenah bisa ngamalirkeun bakat & minat siswa.
Ngolah kasehatan para siswa
Lian ti kitu SMNK 15 gé ngayakeun gawé bareng jeung kominitas Jaga Séké sangkan para siswa mikahéman kana lingkungan atawa ngayakeun pagelaran seni Sunda atawa pasanggiri, cohagna sakola muka jaringan jeung pakumpulan atawa komunitas-komunitas sarta para siswana dirojong sangkan wanter miluan saniskara kompetisi nu diayakeun ku sakola (Porseni) atawa di luar séjén.
“Ku ayana rupi-rupi kagiatan ieu dipiharep bakal mekarkeun poténsi sareng ngaronjatkeun rasa percaya diri sarta jiwa kapamimpingpinan para siswa,” kitu harepan kepala sekolah nu soméah téh.
Kagiatan siswa multimedia
Tangtu waé dina ngokolakeun sakolana, SMKN 15 gé nyoko kana 8 Standar Nasional Pendidikan, saperti; Standar Kompetensi Lulusan, Standar Isi, Standar Proses, Standar Pendidikan dan Tenaga Kependidikan, Standar Sarana dan Prasarana, Standar Pengelolaan, Standar Pembiayaan pendidikan, jeung Standar Penilaian Pendidikan. Upamana waé kiwari keur ngalaksanakeun UTS nya ngandung harti aya standar nu dijalankeun, nya éta Standar Penilaian Pendidikan, kitu ogé kahareupna bakal nyoko kana penileyan nu dipaké ku pamarentah dina Ujian Nasional Berbasis Komputer (UNBK).
“Sakola tos dua kali noron ngalaksanakeun UNBK, sakola mah siap ngayakeun inovasi-inovasi nu dikedahkeun ku pamarentah. Kanggo pembelajaran sakola gé tos berbasis IT . Jadi di SMKN 15 mah para guru téh ngayakeun variasi ku saniskara metodelogi, dugi ka suasana pembelajaran téh pikabetaheun. Badis hiji taman nu éndah asri. Sakola kedah jadi imah kadua, nu maparin panyalindungan sareng ngatik hal-hal nu saé ka para siswa,” kitu saur kapala sakola wong grage (terah Cirebon).
Kaayaan di kelas
Pendidikan Karakter
Salaku sakola pariwisata SMKN 15 nu numerapkeun “Budaya 5 S”, salam, sapa, senyum, sopan, santun, dipiharep bakal jadi pamuka jalan para siswa jeung lulusanana dina adaptasi di masarakat jeung jadi modal mekarkeun dirina dina mangsa hareup
Sakola gé baheula kungsi ngayakeun pendidikan karakter & bela Negara (PKBN), tapi diganti ku pendidikan kepramukaan nu maneuh dilaksanakeun unggal poé Juma’ah. Da Senén mah geus rutin upacara bandera. Cohagna atikan karakter nu sakirana bakal numuwuhkeun kacinta ka NKRI atawa rasa nasionalisme ieu terus dihangkeutkeun.
UTS berbasis IT
Kituna téh bari teu poho jasmani ge diolahragakeun sangkan kapala sakola, guru, karyawan, siswa sehat jasmani jeung ronanina. Jadi di SMKN 15 mah aya olah fisik, olah rasa jeung olah rasio, gumulung gawé bareng seja ngawujudkeun SDM nu unggul. Guru gé dibére Program Keahlian Ganda sarta ngalatih guru ka industri dina wangun “on the job learning”, jsb. “Sadaya eta dipiharep janten jalan gede sasapuan dina medalkeun lulusan nu berahlakulkarimah, berbudipekerti, kompeten sarta mampuh adaptasi sareng lingkunganana,” kitu saur kepala sekolah, lulusan STKS sareng S-22 Administrasi Pendidikan UPI mungkas wangkongan.
Prestasi
Préstasi panganyarna nu diraéh ku SMKN 15 Bandung sakumaha nu ditepikeun ka Sora ku Wakasek Kesiswaan Neneng Euis Kartini, M.Hum. Di antarana; juara futsal ka-4 se-Kota Bandung, juara terapan I Kompetensi Adu Bikin Indomie Uniq antar Sekolah se-Kota Bandung, juara II Kompetensi Adu Bikin Indomie Uniq antar Sekolah se-Kota Bandung, Harapan II Cooking Battle 4 Plus “ Making Bad SMK Pariwisata se- Jawa Barat Akademi Tata Boga”, Juara III Cooking Battle III Plus “Making Bad SMK Pariwisata se-Jawa Barat Akademi Tata Boga, Harapan II Bina Komponen SMA/SMK/MA Regu Pengibar Bendera Tiungkat Kota Bandung, ping 5 Maret 2017, nu diayakeun ku Beureum Bodas EO.
Pangwangunan kelas di SMKN 5 Bandung
Jumlah tanaga pendidik SMKN 15 Bandung ngawengku 33 PNS jeung 37 urang tenaga pendidik non PNS sarta jumlah siswana 989 urang (2017-2018). Sakabéhna bacacar nempatan 4 jurusan Pekerjaan Sosial (Peksos), Perhotelan (PH), Tata Boga jeung Multimedia.
Lulusan SMKN 15, cék Heti Yulianti guru matematik jeung BKK (Bursa Kerja Khusus), sumebar di sakuliah nusantara jeung mancanagara , aya nu jadi chep di kleub kawentar Dubai, Abu Dhabi, Kapal Pesiar jeung hotel-hotel sarta restoran di bali jeung sakuliah nagri.Sedengkeun lulusan ti Peksos aya nu di Kemensos, lulusan nu liana neruskeun ka PGSD jeung Bahasa Inggris UPI sarta manajemen riset, jsb-na. [Asep GP]***
