Lobi SMKN 1 Katapang Kabupaten Bandung
Katapang – Kagiatan UASBK (ujian ahir semester berbasis komputer) di SMKN 1 Katapang geus dilaksanakeun salila dua kali. Lumaku keur kabéh mata pelajaran normatif jeung adaptif. Diiluan ku 1700 siswa, ti kabéh tingkatan jeung salapan kompeténsi keahlian nu aya di ieu sakola nu dipingpin ku Dra. Hj. Adah Rodiyah, M.M.Pd.
Kagiatan UASBK di SMKN 1 Katapang Kabupatén Bandung
UASBK-na dibagi tilu pluh, unggal tingkatan méakeun waktu salila saminggu. Basa Majalah Sora ka ditu ping 5 Désémber 2016, giliran kelas XII nu munggaran keur ujianna téh, dua minggu ka tukangna mah dilaksanakeun keur kelas sapuluh jeung sawelas.
Siswa SMKN 1 Katapang Kabupatén Bandung, keur latihan méméh UASBK
Taun ayeuna aya sawelas rohangan nu dipaké keur UASBK-na téh, jumlah komputer nu disadikeunana kurang leuwih aya 250 unit. Salianti éta aya sababaraha siswana nu mawa laptop pribadi.
Pa Ediya Muhsin, S.Pd., M.Pd., Waka Kurikulum SMKN 1 Katapang
“Alhamdulillah kagiatan UASBK sareng UNBK (Ujian Nasional Berbasis Komputer) di SMKN 1 Katapang tos dua kali dilaksanakeun. Nya éta basa taun ajaran 2014-2015 sareng 2015-2016 ngalaksanakeun UNBK. Sacara umum mah teu aya masalah. Samalah ku ayana ujian paperless (henteu maké keretas) téh tiasa langkung ngahémat waktos sareng biaya. Mung tetep kedah dideudeul ku sadaya guru, kanggo langkung ngawasa programna, kukituna bakal karaos optimal. Salian ti éta Bapa ngawakilan ti SMKN 1 Katapang miharep fasilitas IT-na langkung saé, mudah-mudahan aya bantosan ti sadaya pihak. Tujuanana dina raraga ngudag sakola berbasis IT nu langkung kompetén,” saur Pa Ediya Muhsin, S.Pd., M.Pd., Waka Kurikulum SMKN 1 Katapang. [MS]***
