Pa Daduk Kepala SMK Telkom Bandung (rompi beureum) dipoto dina kagiatan EBAN sareng siswa SMK Telkom Bandung
Dayeuh Kolot – Kepala SMK Télkom Bandung, Bapa Daduk Merdika Mansur, S.T, M.M, ngadadarkeun program-programna. Utamana anu keur dihangkeutkeun dina taun ieu, nya éta program kelas internasional, sakola anu mibanda ikatan dinas SMK Télkom Bandung. Program kasebut udaganana geusan nuju kana standar internasional. Kahiji neueulkeun kana penguasaan basa asing (basa Inggris), kadua sertifikasi internasional ogé katiluna ngabentuk kapribadian anu ngawengku manajemen, integritas jeung ekselént. Alatan éta, kelas ikatan dinas mibanda seléksi anu ketat, tina 180 siswa disaring jadi 80 siswa, tina 80 disaring deui jadi 34 siswa pilihan. Anu 34 siswa kasabit disadiakeun pamondokan (asrama). Full tilu taun haratis biaya sakola kaasup pakéan seragamna. Kacatet tepikeun ka ayeuna siswa-siswi-na ampir datang ti tiap wewengkon sa-indonésia, aya nu ti Tulungagung, Tangerang, NTT, Jakarta jeung ti wewengkon séjénna.
SMK Télkom Bandung dina taun ayeuna muka kelas ikatan dinas gawé bareng jeung télkom aksés kalawan tujuan nuju ka sakola anu mibanda standar internasional. Dina kagiatan pembiasaan basa asing (Inggris) geus dihangkeutkeun pelatihanana saminggu dua kali di luar KBM (kegiatan belajar mengajar). Ku kituna, kelas ikatan dinas anu jumlah siswa-siswina 34 urang mibanda pembiasaan dua basa (blingual). Keur saban kelasna dua jam pelatihan basa, jurusanana jaringan aksés (JA) gawé bareng jeung Télkom Aksés. Lulusan kelas ikatan dinas baris meunang sertipikat TIFO (Telkom Instalasi Fiber Optic). Tujuanana taya kajaba geusan nyanghareupan gebyarna perékonomian masarakat Eropa (MEA). Jinekna, kelas ikatan dinas téh geus ditataharkeun ti tangéhna geusan jadi karyawan tetap di perusahaan Télkom. Luyu jeung tujuan awal munculna, nalika aya gawé bareng jeung DUDI (dunia industri). Séjén ti éta husus keur siswana ditekenkeun ogé geusan nalar Quran (tahfizh Quran). Di antarana tepi ka ayeuna geus aya anu mampuh nalar dua juz, lian ti éta ngabina kadisiplinan, bimbel keur nyinghareupan ujian nagara kelas X kalawan bingbingan para alumni Télkom University.
EBAN salah sahiji kagiatan unggulan di SMK Telkom
Pa Daduk (lahir 1973) anu pituin Jember (Jatim) nokohkeun Pa BJ. Habibie salaku tokoh inspiratip, hobi kana olah raga lari. Méméh jeneng Kepala di SMK Telkom Bandung, kantos saba pulo Indonésia salaku peneliti transmisi satelit taun 1997 tepi ka 2013. “Hiji nagara baris mesat maju saupama tingkat pendidikan rahayatna leuwih luhur,” kitu saurna. Harepanana ka pamaréntah, hayang ngawujud sistem informasi masarakat guna ngawangun adaptasi masarakat dina kasadaran hukum, ngabiasa wanoh jeung daék maca KUHP turta ngawasa kana peraturan daérah (perda).
Visi SMK Telkom nya éta ngajadikeun SMK mibanda tarap jeung kelas internasional, anu pinunjul, cerdas, luhur martabat turta micinta lingkunagnana. Di antara misi-na geusan ngawujudkeun lulusan anu iman jeung takwa ka Alloh SWT, rancagé, mibanda kaluhungan budi pakerti jeung kompetensi anu luyu jeung widang kaahlianana. Ngamekarkeun institusi kalawan nerapkeun manajmen mutu ISO 9001-2008 kalawan suplémén ISO 9004:2000 ISO 14000 jeung ISO 16000 sacara konsistén. Ngamekarkeun kurikulum nasional babarengan jeung pengguna tamatan sarta memvalidasi nyaluyukeun tungtutan pasar kerja jeung kamekaran iptek. Ngajalankeun diklat ngaliwatan cara ngawawanoh competency based training jeung production based training keur méré luang wiraswasta atawa jadi karyawan dihiji industri sakaligus ngahangkeutkeun gawé bareng jeung DUDI (dunya industri), perguruan tinggi katut ka instansi kasabit.
Sora kenalan jeung wawakil ti para siswa-siswi ikatan dinas SMK Telkom Bandung, Nadia Hasna Aulia, kelas X-TJA-3 ti Jalan Raya Lémbang No. 13, lulusan SMP Kartika 19-2 Gegerkalong Bandung. Rajasa Darma, kelas X-TJA-3, lulusan SMPN 50, jalan Cisaranten Wétan No. 69. Radén Ayu Salma Nadiyah, kelas X-TJA-3, alumni SMP BPI Bandung anu nganjrek di Jalan Batu Permata, No. 7 Bungabakung Bandung kalawan apingan kepala asrama-na, Bapa Yoga Pratama nu geus ngahontal S2 di UPI.
Nadia, mimiti asup kelas ikatan dinas téh atas pangrojong mamahna. Sanggeus lulus seléksi kelas regular, nyobaan daftar ka kelas ikatan dinas hasilna lulus kalawan nyugemakeun. Bagja, ku margi tiasa ngabantos perékonomian kulawarga ku cara sakola turta diasramakeun di SMK Télkom Bandung. Soal pangabetah kumaha, panan jauh ti ortu? Sora ngolongan. Sagala rupa ogé ari didadasaran ku ihlas mah tangtu baris nyaman. Betah teu betah diciptakeun ku urang-urang kénéh. Nya aya waktuna inget ka ortu nalika keur teu damang, kitu cék Nadia. Rajasa mah béda deui, ieu jajaka putra ka 8 ti 11 dulur téh mimitina ditawaran sakola SMK Telkom ku nu jadi lanceuk. Harepanana, hayang nuluykeun ka sakola penerangan. Para siswa ikatan dinas, diasramakeun di 35 kamar ti jumlah kamar 75 lokal. Sakamarna duaan. Jadwal kagiatanana padet, boh dangdanan boh kadisiplinan ngarujuk kana kabiasaan para paskibra, utamana aya apél pagi pukul 6.30 jeung apél malam, pukul 19.30.
“Kanggo abdi mah, naon rupi élmu pangaweruh kéngeng ti SMK Télkom téh baris janten modal kanggo kahirupan ka payunna. Sajabi ti éta, nambih pisan luang tur wawasan dina pangaweruh jaringan aksés,” cék Rajasa jeung Radén Ayu Salma, mungkas obrolanana.[MS]***
