Pa Hasan Iskandar, M.Pd., Kepala SMK PU Negri Bandung Propinsi Jawa Barat
Batununggal – SMK PU Negri Bandung Propinsi Jawa Barat, perenahna di Jalan Garut 10 Bandung, tukangeun kantor KPU (Komisi Pemilihan Umum) Propinsi Jawa Barat. Ieu sakola ngawengku genep program keahlian/jurusan, nya éta TGB (Téknik Gambar Bangunan), TITL (Téknik Instalasi Tenaga Listrik), TKR (Téknik Kendaraan Ringan), TKJ (Téknik Komputer & Jaringan), TP (Téknik Permesinan) jeung TSP (Téknik Survey Pemetaan/Géomatika).
Bu Tuti, Keplala TU
Géomatika, TGB jeung TKJ téh, mangrupa program keahlian favorit di sakola nu dipingpin Ku Pa Hasan. Dina PPDB taun 2016, SMK PU baris narima 369 siswa anyar keur sawelas kelaseun. Nu katarima ngaliwatan jalur non akademik aya 94 urang tina kuota 102 urang. Otomatis nu daftar ngaliwatan jalur non akademik, saperti rmp/teu mampu, undang-undang guru jeung préstasi katampa kabéh. Nu ngaliwatan jalur inklusif mah euweuh nu daftar saurang-urang acan.
Dina poé kadua, Salasa (28/6/2016) kagiatan PPDB jalur akademik 2016 di SMK PU, lumangsung lancar. Sawatara geus aya 310-an nu daftar jadi calon siswa anyarna téh. Saperti ilahar syarat-syarat pendaftaranana mah. Salian ti éta aya cék pisik, lumaku keur calon siswa anyar awéwé jeung lalaki. Rohanganana dipisahkeun. Baju jeung calana dilaan, nepi ka nyésa calana jero wungkul. Ngahaja bisi aya tatoan atawa urut dianting dina awakna. Lamun aya nu kanyahoa, mangka dianggap gugur. Hal éta téh keur taki-taki jaga kahareupna, tungtutan ti perusahaan–perusahaan, mangsa digawé.
“Alhamdulillah kagiatan PPDB jalur non akademik sareng akademik téh lancar. Dinten kahiji pendaftaran kamari (27/6/2016) ramé pisan teu sapertos ayeuna rada sepi. Syarat-syaratna mah tos jéntré dina perwal PPDB. Sacara pisik aya tés buta warna, tato, anting, jeung salian ti éta. Kanggo jurusan géomatika mah jangkung calon siswa awéwé minimal 150 cm, kanggo lalaki 160 cm,” kitu saur Pa Sukijo, S.Pd., Ketua PPDB SMK PU ogé mancén tugas janten Waka. Kesiswaan.
Taun kamari SMK PU ngaluluskeun 292 urang siswa. Kurang leuwih 89 peresénna katarima gawé, sésana kuliah, jeung salian ti éta. SMK PU nu geus opat taun jadi sakola negri téh, unggal taunna sok méré béasiswa keur siswa berpréstasina. Ngahaja dibibita ku éta hal, sangkan leuwih ngagedur sumanget diajarna téh. Béasiswana mangrupa potongan SPP (Sumbangan Pembinaan Pendidikan), lumaku keur kabéh tingkat. Lamun juara kelas aya potongan SPP salila sabulaneun, juara program keahlian/jurusan potongan SPP dua bulaneun, juara umum sakola potongan sabulaneun. Kitu ogé keur jalur non akademik, nu jadi juara tingkat kota, propinsi jeung nasional.
Pa Yaya (kénca), guru olah raga nu ngetes pisik
Drs. Zulkifli sareng Pa Sukijo, S.Pd.
“Mudah-mudahan engkéna siswa anyar nu katampi di SMK PU, janten jalmi nu masagi, boh ahlaq, boh akademik, boh nu sanésna utamana dina hal nu positif. Sakola nyiapkeun sagala rupi pelayanana. Patalina sareng PPDB, taun ayeuna langkung tartib sareng lancar,” saur Pa Hasan, Kepala SMK PU Negri Bandung Propinsi Jawa Barat. [MS]***
