H. Asép E Firdaus, S.Pd, M.Si, Kepala SMK Pasundan 2 Banjaran Kabupatén Bandung
Sobat Sora, urang ngalanglang ka SMK Pasundan 2 Banjaran anu perenahna di Jalan Stasiun Timur No. 62 Banjaran Bandung. Tangtuna nepangan heula ka kepala sekolahna Bapa H. Asép E Firdaus, S.Pd, M.Si (teureuh Cicadas 10 Nopémber 1961) di kantorna. Harita diréncangan ku Bapa Déni Purana, S.E, M.M, ti Yayasan Perguruan Tinggi Pasundan.
Program-programna sakumaha katerangan Waka Humas, Bapa Utép Wawan, S.Pd, S.T anu nganjrek di wewengkon Sasak Dua Banjaran. SMK Pasundan 2 Banjaran nempat dina aréa anu legana 3.713 méter persegi, 1.341 peserta didik, 38 rombel. Kagiatan belajarna dua pluh; Ti pukul 6.30 tepi ka pukul 12.15 jeung ti pukul 12.30 tepi ka 17.45. Visina pertéla geusan nataharkeun tanaga kerja tingkat menengah anu mibanda iman, singer tur rancagé sarta mampuh bersaing di éra globalisasi. Kagiatanana ngahangkeutkeun pelatihan guru perihal téhnik sepéda motor, ujian kompéténsi peserta didik jeung agénda kunjungan industri husus keur peserta didik kelas X.
Rohang praktek di SMK Pasundan 2 Banjaran kawilang kumplit
Dina widang préstasi, Waka. Kesiswaan, Bapa Péndi Epéndi, S.Pd, S.T méré impormasi panganyarna ka Sora. SMK Pasundan nyangking juara I tingkat nasional dina kagiatan lomba karya ilmiah (Fisika) anu diayakeun di UPI, bulan Pébruari 2016. Juara I olah raga bola voli sa-kabupatén Bandung. Wakil bola voli putra Jawa Barat dina tingkat propinsi anu diayakeun di Kota Kuningan. Juara I LKS keterampilan listrik sa-kabupatén turta ngawakilan tingkat propinsi di Cibinong Bogor, juara II LKS jurusan komputer tingkat kabupatén, jeung réa-réa deui préstasi séjénna.
Dina hal ieu, Waka. Kesiswaan nekenkeun kadisiplinan ka para peserta didik katut ka warga sakola pada umumna sangkan datang ka sakola tepat waktu, disiplin boh dina dangdanan boh dina seragam. Saterusna ngupayakeun tetep ngalaksanakeun kagiatan diajar sok sanajan guruna teu hadir, bisa ku cara diskusi antar siswa, bedah buku atawa ngamangfaatkeun pabukon (perpustakaan sakola). Lian ti éta ngupayakeun suasana sakola jeung masarakat warga sakola katut ka sabudeureunana kondusip. Nu matak urusan parkir diajangkeun ka warga luar sakola gawé bareng jeung polsék kalawan harepan ayana kaharmonisan lingkungan sakola.
Bengkel Sepeda Motor
Laboratorium listrik
Lulusan SMK Pasundan 2 Banjaran 5 peresén kuliah, 25 peresén karyawan/i, 10 peresén wirausaha, sasésana pagawé negeri, jsté. Anu ahéng, lulusanana aya anu suksés jadi juragan siomay (pabrik siomay), sebut wé Kang Jéjén warga Sindangpanon Banjaran, H. Iip di wewengkon Mekar Rahayu salaku pengusaha serum jeung mebelér. SMK Pasundan 2 Banjaran ogé ngarupakeun SMK swasta munggaran marengan SMK séjénna anu diilukeun kana UNBK, kitu cék TU-na Asép Saéfulloh, Pa Ano Sudirman juru rawat rohang mesin, Pa Kurnia, A.Md, guru produktif permesinan frais.
Ngobrol jeung Waka. Kurikulum, H. Aép Suparlan urang Banjaran lelewek Alun-alun. Sora meunang sababaraha impormasi anu tumali jeung programna, antara lain; ngalaksanakeun naon rupa anu geus diguratkeun dina kurikulum sapertina baé ngarékrut para guru, ngarékrut penjadwalan jeung pembagian kelas. Nekenkeun SDM para guru sakurang-kurangna S-1 turta liniér dina widangna. Lima jurusan program keahlian unggulan anu masing-masingna mibanda pasangan (mitra kerja sama); Tehnik Instalasi Pemanfaatan Tenaga Listrik pasanganana jeung PT. Sintelindo Bekasi, Tehnik Pemesinan pasanganana jeung PT. Dukaka, Tehnik Kendaraan Ringan (TKR) pasanganana jeung Suzuki, Tehnik Komputer Dan Jaringan, pasanganana PT KGI(Cakrawala Global Impormatika), Tehnik Sepeda Motor, pasanganana jeung Yamaha.
Fasilitas SMK Pasundan 2 Banjaran ngawengku kana wangunan permanén, rohang prakték, rohang pabukon (Perpustakaan), Rohang perpustakaan berbasis internét, sarana ibadah (masjid/musola), sarana olah raga jeung hot spot aréa.
Misi SMK Pasundan 2 Banjaran nya éta ngadu maniskeun imtaq jeung imték, nyiptakeun tenaga kerja anu handal, mampuh ngajalankeun wirausaha mandiri sarta mapuh neruskeun pendidikan ka perguruan tinggi. Ngembangkeun didikan humanistik anu nekenkeun kana kapribadian, ajén-ajén moral, spiritual jeung religius. Ngipuk, nuwuh kembangkeun turta ngamumulé budaya Sunda; Boh bahasa, kasenianana boh sajarahna.
Mobil jieunan siswa & guru SMK Pasundan 2 Banjaran. Mesinna make mesin motor
Kagiatan maneuh nyatana sakumaha harepan Paguyuban Pasundan, Pengkuh agamana, luhung élmuna, jembar budayana. Ngupayakeun pangembangan daya nalar peserta didik, ngawangun karakter jeung katerampilanana, ngaliputi kagiatan Latihan Dasar Kepemimpinan Siswa (LDKS), kapramukaan, kasenian, ékstrakurikulér; Bola Voli, méngbal (sépak bola), footsal jrrd.
Lokasi prakték kerja industri (prakerin); aditya isticom, anugrah, bapapsi pemkab Bandung, bhakti global computer, biro umum pempropda jabar, butik PC, dinas P&K Kab. Bandung, dinas sumber daya air pertambangan & energy pemkab Bandung, d’lima dwi putra comp, expo computer, kacabpel Telkom Banjaran, kacabpel Telkom Soreang, kr tech computer, prima parahiayangan comp, primatama computer, PT Askes cab Soreang, PT indaco intigo, PT Indonesia Power UBP Saguling SU PLTA Lamajan, PT INTI, PT PLN (Persero) UPT Bandung Timur, jsb-na.
Basa petugas TU, Asép Saéfullah ditanya kumaha kiat Pa H. Asép E Firdaus, salila mupuhuan SMK Pasundan 2, “Alhamdulillah saé turta kacida geténna ka warga sakola hususna ka para guru, rumawat, mémérés turta ngabebenah wangunan sakola, dalah ka jumlah calon siswa pendaftar ogé tingkat kadua saenggeus SMK nu aya di wewengkon Lémbang,” kitu pokna. [MS]***
