Drs. H. Agus Rusdiana, M.Si, Kepala SMK Merdéka Kota Bandung
Dina kasempetan Rebo pabeubeurang, Sora ngalanglang ka SMK Merdéka anu perenahna di Jalan Pahlawan Nomer 54 Bandung. Kaleresan tiasa silaturahmi sareng pupuhuna, kepala SMK Merdéka, Bapa Drs. H. Agus Rusdiana, M.Si.
Pa H. Agus, basa di China ngalaksanakeun gawé bareng jeung salah sahiji perguruan tinggi
Drs. H. Agus giak ngadadarkeun kasiapan sakola pingpinanana, dina raraga UNBK anu bakal datang. Saurna, kasang tukang SMK Merdéka ngilukeun peserta didikna kana ujian nagara “berbasis” komputer méméhna maké cara konvénsional, lantaran nuturkeun turta ngigelan kamajuan jaman. Ogé nyaluyukeun kana program pamaréntah anu ngararancang dunya atikan ku kamutahiran téhnologi.
Pa Sudaryono, S.Pd, Waka. Kurikilum di salah sahiji ruangan UNBK SMK Merdéka Kota Bandung
Sacara umum saurna, SMK Merdéka anu dieuyeuban ku 597 siswa-siswina geus siap. Leuwih ti sataun ka tukang nyinghareupan UNBK. Tujuh lab geus disayagakeun ti ayeuna kénéh. Ditambah 215 unit komputer pleus sababaraha unit cadanganana anu dirojong ku daya listrik ti dua sumber, kurang leuwih 40 rébu watt siap ngawal para peserta UNBK. Jaringanana ogé teu kapalang, ngagunakeun jaringan internét “berkapasitas” 100 MB ditambah 1 komputer 15 server cadangan. Dilengkepan ku tujuh proktor. Hiji lab hiji proktor. Hiji rohang, hiji pengawas. Pengawas silangna ti SMK Pasundan 2 Bandung. Teu kaliwat ngandelkeun opat urang téhnisi.
Salah sahiji béngkél unggulan SMK Merdéka Kota Bandung
Kamandang Drs. H. Agus anu geus pulang anting umroh kana kagiatan UNBK, nya éta langkung éfisién dina prak-prakanana, langkung irit boh dina rohangan boh dina peralatanana. Teu merlukeun keretas jeung minim biaya cetak. Para siswa-siswi langkung fokus konséntrasina kana soal-soal saban mata pelajaran. Ngalatih tingkat kapercayaan turta kajujuran para siswa-siswi. Ngabiasakeun profésionalisme para siswa-siswi dina nyinghareupan imformasi jeung téhnologi.
Motor paragi prakték siswa SMK Merdéka, bantuan ti Honda Astra
SMK Merdéka geus dicalonkeun jadi SMK rujukan, baris dijadikeun conto ku pirang-pirang SMK sa-tatar Bandung hususna. Ku kituna dihangkeutkeun pangwangunan sarana-prasarana, sarana belajar jeung sarana pabéngkélan.
Bengkél paragi prakték kendaraan roda opat
“Alhamdulillah, SMK Merdéka geus mibanda dua béngkél; Béngkél mobil, dideudeul ku pausahaan Daihatsu, béngkél motor dideudeul ku pausahaan Honda Astra. Astra ti tangéhna kénéh ngarojong ku cara masihan dua unit sepéda motor. Masing-masingna minimal mibanda hiji lab, saur Drs. H. Agus anu kungsi cepeng kapangurusan di MKKS Kota Bandung taun 2000-2015.
Cucun (XII-SM-3), Ibu Desi, W. S.Pd, (BK), Ibu Pipin S. S.Pd (Kaprog AP) & Hardianto (XII-SM3)
Kumaha moto sakola anu janten cecepengana? Sora ngolongan. Drs. H. Agus nandeskeun, Geusan ngupayakeun saléngkah leuwih maju ti sakola-sakola séjénna.
Bengkel praktek kelistrikan sepeda motor SMK Merdeka
Drs. H. Agus Rusdiana anu lingih di Antapani, ningkatkeun gawé bareng sacara internasional jeung sababaraha nagara saperti, China, Jepang, Thailand. Eta kagiatan utamana tukeur silang para peserta didik (pertukaran pelajar) jeung neruskeun sakola (kuliah). Pedaran Drs H. Agus Rusdiana, M.Si diharaminan ku Waka. Kurikulum Bapa Sudaryono, S.Pd, Ibu Dési Wijayanti, S.Pd (guru BK), Ibu Pipih Sopiah, S.Pd (Kaprog AP).
Pa Dédé Suwanto, S.Pd, Waka. Kesiswaan
Balik deui kana warta kasiapan nyinghareupan UNBK. Para peserta didik SMK Merdeka pada umumna moal geumpeur deui, lantaran geus pamilier reujeung anu ngaranna perangkat komputer. Sebut wé Cucun Cutarsa, kelas XII-SM-3 jeung Muh. Hardianto, kelas XII-SM-3. Ieu dua siswa geus bener-bener siap, boh sacara moril boh dina enggoning nyinghareupan UNBK. [MS]***
