Bapa Suryana, S.Pd, Kepala SMAN 8 Kota Bandung
Léngkong – SMAN 8 Kota Bandung perenahan di Jalan Solontongan No. 3 Kota Bandung, Kelurahan Turangga, Kecamatan Léngkong. Ieu sakola téh salah sahiji SMA Negri favorit, nu jadi pangjugjugan ti suklak ti sikluk ti jauhna. Dina taun ajaran 2016-2017, baris narima 432 siswa anyar keur 12 rombongan belajar.
Drs. Iyus Rustandi, Waka. Kesiswaan nu ogé mancén tugas janten Ketu PPDB SMAN 8 Kota Bandung
PPDB (Pendaftaran Peserta Didik Baru) jalur non akademikna saperti jalur rmp/teu mampu, préstasi, undang-undang guru & inklusif dibuka ti tanggal 15 Juni nepi ka 18 Juni 2016. Nu daftar ngaliwatan jalur rmp/tidak mampu kuotana 84 urang nu daftar ukur 29 urang, ku kituna katarima kabéh, ngaliwatan jalur préstasi, tina kuota 21 urang, merul nu daftar téh aya kana 157 urang, jalur undang-undang guru kuotana 12 urang nu daftar aya 56 urang. Nu daftar ngaliwatan jalur inklusif mah euwueh hiji-hiji acan. Verifikasi datana lumangsung ti tanggal 22-24 Juni 2016. Engkéna abaris diumumkeun tanggal 25 Juni 2016.
Salah sahiji liputan SMAN 8 Kota Bandung
“Alhamdulillah PPDB jalur non akademik taun 2016 di SMAN 8 lumangsung lancar. Sanaos aya waé sepuh siswa nu daftar téh, teu acan ngartos kana aturan sagemblengna, hususna nu jalur préstasi. Cara peniléyanana, rada béntén sareng taung kamari. Ayeuna mah tos jéntré aturanana, sakola mah ukur ngaentri data atanapi sertifikat nu luyu sareng nu katampi ku panitia. Tangtos panitia gé masih aya kakiranganana, mung diminimalisir. Aturan PPDB taun ayeuna langkung jelas. Sakola mah ukur ngalaksanakeun Perwal (Peraturan Pemerintah). Di SMAN 8, jumlah nu daftar ngalangungan jalur préstasi sareng undang-undang guru pendaftarna ngalangkungan tina kuota. Nu jalur afirmasi mah sésana seueur. Ari ningal kituna mah karunya putra guru, seueur nu teu katampi. Mugia aturan PPDB taun ayeuna tiasa diévaluasi deui, sangkan langung saé,” saur Drs. Iyus Rustandi, Waka. Kesiswaan nu ogé mancén tugas janten Ketu PPDB SMAN 8 Kota Bandung.
Dina taun 2016, aya 133 siswa SMAN 8 Kota Bandung nu katarima ka PTN ngaliwatan jalur undangan, kayaning ka ITB, UNPAD, UPI & UGM
Wajar lamun loba calon siswa nu harayang asup ka sakola nu dipingpin ku Bapa suyana, S.Pd. Alatan sakolana mingkin kadieu beuki leubeut ku préstasi, boh akademik, boh non akademikna. Samalah lulusan SMAN 8 Kota Bandung taun 2016, loba nu katarima di PTN (Perguruan Tinggi negri). Babakuna nu ngaliwatan jalur undangan mingkin ngaronjat, jumlahna aya 133 siswa. Katarima di ITB, UNPAD, UPI, jeung UGM. Sa-Kota Bandung mah nempatan réngking kadua sabada SMAN 3 Kota Bandung, jumlahna béda dua siswa, nu asup ka PTN ngaliwatan jalur undanganna téh.
Disagigireun éta fasilitas sakolana gé beuki ngaronjat, kayaning wangunan sakolana katata apik, lingkunganana bararesih, jeung salian ti éta. Komo dina nyanghareupan kamekaran jaman nu sarba digital téh, ayeuna ampir di unggal rohangan geus aya fasilitas wifi-na. Jadi mangsa ngalaksanakeun pangajaran nu ngaliwatan jaringan intenet atawa UDJ (Ujian Dalam Jaringan) geus teu gejed deui, sanajan can sampurna.
“Ayeuna mah janten gancang jaringan internatna téh. Janten pami diajar ngalangkungan internet teu lélét jaringanana. Komo pami sim kuring nuju teu gaduh kuota internét mah, janten tiasa geratisan. Fasilitas sakola tos langkung saé,” ceuk, Kanda, perwakilan siswa SMAN 8 Kota Bandung téh.
Kabéh kaunggulan SMAN 8 Kota Bandung teu leupas tina kondusifna kaayaan sakola. Saperti nu di jéntrékeun ku Bapa Suryana, S.Pd, prinsip sakola mah sakuat tanaga narékahan méré pelayanan nu optimal ka warga sakolana. Unggal aspék silih pakait, kalayan ngawangun kaayaan nu nyaman, bisa ngadeudeul sarta ngali sagala poténsi nu aya di sakola tur optimal keur ngahontal sagala nu dicita-citakeun ku SMAN 8 Kota Bandung. [MS]***
