Firman Adam, S.Pd., M.M.Pd., Sekretaris Dinas Pendidikan Jawa Barat
majalahsora.com, Kota Bandung – Poé Kémis 7 Séptémber 2017 katompernakeun, di Taman Musik gédéngeun SMAN 5 Kota Bandung téh, haneuteun ku kagiatan ngareuah-reuha Hari Pembelajaran Di Luar Kelas sa-Asia Pasifik. Acarana dialpukahan ku kepala sekolah sarta guru SMAN 5 Bandung. Kagiatanana diiluan ku sakabéh siswa kelas X jeung XI SMAN 5 Kota Bandung.
Drs. H. Suparman, M.M.Pd., Kepala SMAN 5 Kota Bandung
Acarana diluuhan ku Sekrétaris Dinas Pendidikan Jawa Barat, Firman Adam, S.Pd., M.M.Pd., Pengawas ti Disdik Prop Jabar, Herlina, Kepala SMAN 5 Kota Bandung, Drs. H. Suparman, M. M. Pd., guru tur perwakilan siswa ti 15 SMA nu aya di Kota Bandung, jrrd.
Jajang Priatna, S.Pd., M.M., Guru SMAN 5 Bandung nu jadi Ketua Pelaksanana
Dina éta kasempetan Firman Adam salaku Sekrétaris Dinas Pendidikan Jawa Barat téh, muji kana kagiatan nu diayakeun ku SMAN 5, alatan di Jabar nu ngareuah-reuah kagaiatan kasabit téh diwakilan ku SMAN 5 Kota Bandung.
Suhendri, Guru SMAN 5 Bandung, Dharma Nirwana, Kasubag Tata Usaha SMAN 5 Bandung & Sonny Sam, Guru SMAN 5 Bandung
“Luar biasa, anémo siswa SMAN 5 Kota Bandung nu aub dina ieu kagiatan. Sim kuring salaku Sekrétaris Dinas Pendidikan Jabar, ngadeudeul pisan kana pembelajaran di luar kelas. Ayeuna mah teu kabaud ku diajar di lebet kelas wungkul. Contona dinten ayeuna (7/9/2017), siswa SMAN 5 Kota Bandung tiasa ngalaksanakeun kagiatan pembelajaran di luar kelas, tiasa nilikan lingkungan sabudeureun tur ngamangfaatkeun taman nu aya di Kota Bandung, hususna kanggo pembelajaran. Mangsa sim kuring sakola kénéh gé, tos aya pembelajaran di luar kelas téh, harita mah ka kebon, da teu usum taman kawas ayeuna,” cék Firman Adam, Seksdisdik Prop. Jabar téh.
Hj. Yenny Warnika, M.Pd., Wakil Manajamen Mutu SMAN 5 Kota Bandung (katuhu)
Kagiatanana dipupuhuan ku Jajang Priatna, S.Pd., M.M. Acarana meriah, dieuyeuban ku rupa-rupa kagiatan, di antarana aya gema tahfidz, ti siswa-siswi SMAN 5 Kota Bandung nu geus apal Al Quran, aya nu apal 1 juz, 2 juz, 15 juz jeung aya saurang nu geus apal 30 juz, salian ti éta aya rampak jaipongan, gebyar membaca, lima berkarya, motivasi, angklung, paduan suara, maca sajak, vocal grup, pasanggiri stand up comedy, apresiasi literasi, digital karya siswa, band 5, jsté.
Firman Adam nuju ningalan poto hasil karya ekskul Press Lima
Drs. H. Suparman, M.M.Pd., salaku Kepala SMAN 5 Kota Bandung, ngadeudeul pisan kana kagiatan pembelajaran di luar kelas, salah sahiji alesanana sangkan siswa teu bosen, alatan kateterusan diajar di jero kelas baé. “Kagiatan pembelajaran di luar sekolah atanapi kelas téh kacida seueur mangpaatna, tiasa ngaronjatkeun préstasi akademis jeung non akademis,” pokna.
Poto Kagiatan:
[SR]***
