Bapa Deddy Mizwar, Wakil Gubernur Jawa Barat, masrahkeun Al Quran ka Drs. Dadang Yani Zakaria, Kepala SMAN 4 Kota Bandung
majalahsora.com – Sobat Sora, isuk-isuk poé Salasa, tanggal 14 Pebruari 2017 di SMAN 4 Kota Bandung haneuteun ku kagiatan Islami. Nya éta Festival Ghifari. Eta kagiatan téh geus lumangsung tilu taun noron. Nu digagas ku Bu Endang Yuli, Guru PAI kelas XII. Tujuanana pikeun nangkel budaya Hari Valentine. Nya éta perayaan hari kasih sayang téa, nu kurang cocog jeung budaya urang.
Bapa H. Deddy Mizwar, basa biantara di Festifal Ghifari SMAN 4 Kota Bandung
Acarana diluuhan ku H. Deddy Mizwar, Wakil Gubernur Jawa Barat, Dr. Ir. H. Ahmad Hadadi, M.Si, Kepala Dinas Pendidikan Jawa Barat, H. Dadang, Kepala Bidang SMA Disdik Jabar, Bu Mia, Sekdis Disdik Kota Bandung, Camat Andir, Kapolsek Andir, jrrd.
Dr. Ir. H. Ahmad Hadadi, M.Si., Kepala Dinas Pendidikan Propinsi Jawa Barat
Dina bubuka acarana, aya pintonan ti siswa SMAN 4 Kota Bandung, rampak ngahaleuangkeun tilu lagu religi, di antarana lagu jagalah hati. Di dirigenan ku Ibu guruna, matak hélok pokona mah. Kompak boh basa nyanyi jeung gerakanana téh.
Drs. Dadang Yani Zakaria, Kepala SMAN 4 Kota Bandung
Bu Endang Yuli, M.Pd, Guru PAI SMAN 4 Kota Bandung, dipoto sareng caroge tur anak asuhna (poto tina internet)
“Sajarahna aya Festival Ghifari téh, pikeun ménténgan siswa SMAN 4 Kota Bandung, sangkan teu ngareuah-reuah Hari Valentine. Ku éta perayaan téh réa rumaja nu sasab ngarayakeun hari kasih sayang ku hal negatif, malah condong ngalakukeun perzinahan,” saur Bu Endang Yuli, Guru Pendidikan Agama Islam kelas XII, nu ngarangkep janten Ketua Pelaksanana.
Pamilon Festival Ghifari SMAN 4 Kota Bandung
Basa H. Deddy Mizwar ngadugikeun biantara dina Festival Ghifari jeung miéling Maulid Nabi Muhammad SAW, anjeunna kalintang bagjana, ku kagiatan Islami nu diayakeun di SMAN 4 Kota Bandung. Ku ieu acara anjeunna miharep generasi ngora kudu bisa ngeunteung ka Nabi Muhammad SAW. Sangkan jadi jalma nu jujur dibarung ku ahlaq nu hadé.
Juri nuju sibuk menten pamilon fashion show
Dina sela-sela biantarana Pa Deddy Mizwar gé, ngadugikeun kareuwasna, alatan nempo kaayaan jero SMAN 4 Kota Bandung, nu lalega tur rindang. Cék anjeunna ari nempo ti luar mah, kaayaan SMAN 4 Kota Bandung téh jiga nu hareurin tur pasaliwer réa kendaraan.
poto kagiatan fashion show Festival Ghifari SMAN 4 Kota Bandung
Ku kasumpingan Bapa Deddy Mizwar dina acara Festival Ghifari téh, salah sahiji kebanggan pikeun warga SMAN 4 Kota Bandung. Ku sabab teu sagawayah bisa sumping kitu waé, da anjeunna téh, salah sahiji tokoh, artis, sarta orang nomer dua di Jawa Barat.
poto pintonan lagu-lagu religi ti siswa SMAN 4 Kota Bandung
“Alhamdulillah, SMAN 4 Kota Bandung, tiasa ngenalkeun tur mintonkeun kamonésan SMAN 4 Kota Bandung ka Pa Deddy Mizwar. Komo mangsa peralihan ka propinsi mah. Ieu téh anugerah, karunia. Digampilkeun itu ieuna, salah sawiosna du’a ti para siswa SMAN 4 Kota Bandung nu saroléh. Méméhna SMAN 4 Kota Bandung tos katatamuan Pa Ridwan Kamil, Walikota Bandung, Bu Atalia, garwa Kang Emil, ayeuna ku Pa Deddy Mizwar. Insya Alloh ka payunna Pa Ahmad Héryawan, Gubernur Jawa Barat tiasa amengan ka SMAN 4 Kota Bandung. Sareng mudah-mudahan atuh Pa Jokowi, Presiden Republik indonesia tiasa ngalongok ka SMAN 4 Kota Bandung, aamiin,” saur Bu Riatinda, M.M.Pd., Waka Humas SMAN 4 Kota Bandung, bari nyawang harepan.
poto guru, tata usaha sareng karyawan SMAN 4 Kota Bandung nu nyukseskeun Festival Ghifari taun 2017
Ibu Riatinda, M.M.Pd., Waka Humas SMAN 4 Kota Bandung
Pa Yudi, salah sahiji guru SMAN 4 nu sibuk ngadokumentasikeun kagiatan Festival Ghfari
Acara puncak Festival Ghifari taun ayeuna, nya éta aya perlombaan fashion show nu diiluan ku siswa ieu sakola. Tujuanana sangkan siswa SMAN 4 Kota Bandung, hususna nu wanoja jadi apal kana raksukan tur tata cara maké baju Islami nu saenyana. Kabandungan harita ku Majalah Sora, para pamilonna katempo pédé mangsa leumpang tur ngagaya dihareupeun juri sarta ditonton ku papada babaturanana.
Annisa jeung Rike, patandang fashion show Festival Ghifari
“Seueur manfaatna ku ieu acara teh. Salah sawiosna acara fashion show, tiasa ngamekarkeun bakat siswa SMAN 4 Kota Bandung, hususna dina widang fashion. Patalina ku kagiatan Fetival Ghifari, anak-anak empat langkung nanjung pemahaman agamana. Ku kituna moal ngareuahreuah Valentine Days,” cék, Rike Kelas XI IPS 1 jeung Annisa ti kelas XI IPS 4.
Leubeutna kagiatan Islami di SMAN 4 Kota Bandung téh, karasa hasilna, salah sahijina bisa neken kenakalan siswa di ieu sakola. Lamun nilik kana tempatna mah, ieu sakola nu dipingpin ku Drs. Dadang Yani Zakaria téh, di kulilingan ku tempat nu kurang hadé. Ku kituna ieu sakola hasil dilélér jadi Sekolah ter-Religi sa-Kota Bandung, basa ahir taun 2016 kaliwat.
“Alhamdulillah SMAN 4 Kota Bandung kapilih janten Sekolah ter-Religi sa-Kota Bandung, taun 2016. Warga sakolana ngadeudeul pisan. Insya Alloh kagiatan nu aya patalina sareng kagiatan kaagamaan hususna Islam tiasa teras najeur di SMAN 4 Kota Bandung. Nu rutin mah kagiatan sholat berjamaah, pangaosan warga sakola, remaja masjid, unggal sasih sok ngondang penceramah, sareng nu lianna,” saur Drs. Dadang Yani Zakaria, Kepala SMAN 4 Kota Bandung téh.
Tah kitu Sobat Sora, warta ti SMAN 4 Kota Bandung téh. Mudah-mudahan tarékah nu dikokolakeun ku SMAN 4 Kota Bandung téh réa mangpaatna tur apanjang apunjung. Jaga ka hareupna loba calon penerus bangsa ti ieu sakola nu boga karakter nu punjul. Komo bari nyaho kana bagbagab agama Islam mah. [MS]***
