Pa Dadang Yani, Kepala SMAN 4 Kota Bandung (tengah) di poto sareng rengrengan guru tur réngréngan Google Indonésia (katuhu kepala SMAN 4 Kota Bandung)
Andir majalahsora.com – Dina UNBK (Ujian Nasional Berbasis Komputer) taun 2017, SMAN 4 Kota Bandung bakal ngalaksanakeun UNBK nu kadua kali. Aya 318 siswa nu baris ngiluan UNBK-na téh. Ti jurusan IPA tujuh kelas, ti jurusan IPS dua kelas.
Pa Agus Ferdiana, S.Pd., Waka. Kurikulum SMAN 4 Kota Bandung
Uji coba cromebook dina simulasi UNBK nu dilaksanakeun di SMAN 4 Kota Bandung
Basa UNBK taun kamari, fasilitas komputerna réréana meunang nginjeum ti orang tua siswa. Alatan kawatesan ku jumlah komputer nu dipimilik ku SMAN 4. Najan kitu harita téh jadi barabé, saméméh jeung sabadana ujianana.
Siswa SMAN 4 Kota Bandung keur simulasi UNBK
Ku kituna ayeuna SMAN 4 Kota Bandung keur tatahar ngumplitan fasilitasna, utamana jumlah komputer. Sakola nu dipingpin ku Bapa Dadang Yani téh, ngahaja meuli komputer anyar, jumlahna aya 108 unit. Waragadna meunang nginjeum ti koperasi sakola.
Pihak Google Indonésia keur diskusi, dina sela-sela kagiatan simulasi UNBK
Rencanana UNBK taun 2017 di SMAN 4, baris dibagi tilu pluh, isuk-isuk, siang jeung pasosoré, akur saperti taun saméméhna. Aya sababaraha tarékah keur nyiapkeun siswana dina nyanghareupan UNBK téh. Salah sahijina aya bimbingan husus ti para guru mata pelajaran nu diujikeun, boh keur jurusan IPA boh jurusan IPS. Siswana teu dipungut biaya, lumangsung unggal poé ti mulang sakola, kira-kira puku 15.00 nepi ka pukul 17.00.
Sa-Indonésia ukur aya 30 sakola nu maké cromebook dina simulasi UNBK
Di sagigireun éta sakola gé ngayakeun sababaraha kali simulasi UNBK, nu kahiji mah dilaksanakeun basa bulan Désémber 2016 kamari. Rencanana rék dua kali deui ngayakeun simulasina téh, nya éta di bulan Pébruari jeung bulan Maret.
Cromebook bisa dipaké keur kagiatan UNBK
“Alhamdulillah kanggo mayunan UNBK taun ayeuna, SMAN 4 Kota Bandung kagungan 108 unit Komputer anyar, kénging nyicil ka koperasi sakola. Kanggo persiapan siswana gé dioptimalkeun. Basa sasih Désémber 2016, siswa SMAN 4 Kota Bandung, ngiringan simulasi UNBK sacara nasional, Alhamdulillah lancar. Salian ti éta kantos uji coba UNBK nganggo cromebook ti google. Basa ujicobana langsung disumpingan ku gegedén Google Indonésia. Insya Alloh sacara teknis mah SMAN 4 siap ngalaksanakeun UNBK. Engkéna baris nganggo opat rohangan, nu dikokolakeun ku lima proktor sareng lima teknisi,” saur Pa Agus Ferdiana, S.Pd, Waka Kurikulum SMAN 4 Kota Bandung.
SMAN 4 Kota Bandung meuli 108 unit komputer anyar keur kagiatan UNBK taun 2017
Masih aya patalina jeung UNBK taun 2017, rencanana SMPN 25 Kota Bandung rék ngalaksanakeun UNBK. Alatan can bisa minuhan jumlah komputer jeung fasilitasna, engkéna baris ngilu nglaksanakeun UNBK di Kampus SMAN 4 Kota Bandung. Kurang leuwih aya 297 siswa, peserta UNBK nu kacatetna téh. [MS]***
