Sumur Bandung majalahsora.com – SMAN 3 Kota Bandung siap ngalaksanakeun UNBK sacara dua shift. Sacara SDM, proctor, operator, sarana jeung prasaranana, téréh nyukupan keur éta kagiatan. Komputer nu disadiakeunana aya 275 siki keur 360 siswa nu ngiluan UNBK.
Rencanana SMPN 5 Kota Bandung gé rék ngalaksanakeun UNBK di SMAN 3 Kota Bandung. Kurang leuwih aya 400 peserta UNBK ti SMPN 5 Kota Bandung nu rék ngiluna téh. Mangsa nginjeum fasilitas SMAN 3 Kota Bandung, pihak SMPN 5 Kota Bandung, teu dipénta biaya sapérak-pérak acan alias geratis.
Aya patalina dina kagiatan UNBK, SMAN 3 Kota Bandung kapeto ngayakeun pelatihan pikeun proctor sarta operator ti sakola sa-Jawa Barat. Kabeneran Proctor ti SMAN 3 Kota Bandung jadi pematerina. Kagiatanana lumangsung sacara bertahap. Basa tanggal 1 Pebruari 2017 aya 50 sakola, tiap kota, kabupatén ngirimkeun opat SMA, engkéna proctor sarta operator nu dilatih nepakeun deui informasina ka sakola lianna.
“Insya Alloh, SMAN 3 Kota Bandung siap ngalaksanakeun UNBK taun 2017 sacara dua shift. Dina raraga nyukseskeun UNBK di Jawa Barat, sangkan Jabar Kahiji. Mung tetep kapayunna sakola miharep bantosan langsung ti Pamaréntah Jawa Barat. Kanggo ngawewegan fasilitas UNBK. Salami ieu waragadna masih nganngo artos sakola sanaos aya bantosan ti pamaréntah pusat,” saur Pa Andang Segara, Kepala SMAN 3 Kota Bandung. [MS]***
