Dr. Hj. Yeni Gantini, M.Pd, Kepala SMAN 20 Kota Bandung
Sobat Sora, urang ngalanglang ka SMAN 20 anu dikepalaan ku Dr. Hj. Yéni Gantini, M.Pd. SMAN 20 téh dina ahir-ahir ieu keur ngahangkeutkeun maju kana sakola adiwiyata mandiri. Saengeus lulus adiwiyata tingkat provinsi jeung nasional. Ayeuna kurang leuwih ngabina 15 sakola, dina hal népakeun miara lingkunganana.
Pa Oded (Wakil Walikota Bandung) dina acara education expo 2016 di SMAN 20 Kota Bandung (net)
Salian ti éta, SMAN 20 Bandung keur nataharkeun program nanjeurkeun minat baca para siswa-siswi-na. Ku kituna digelar program reading challenge, dina sabulan dikudukeun maca sababaraha buku bacaan, boh buku pangaweruh umum boh buku bacaan sastra.
Dra. Hj. Euis, M.Pd, Waka Humas
SMAN 20 ogé ngalalanyahan program Education Expo (pameran pendidikan), dilaksanakeun ping 14 Januari 2016 katompernakeun, kalawan dihadiran ku para inohong Kota Bandung, saperti Pa Odéd M Danial, Wakil Walikota Bandung, Ibu Hj. Rita Kabid SMA/SMK Dinas Pendidikan Kota Bandung, para kepala sekolah katut ka para orang tua siswa-siswi, jrrd. Teu kapalang donator ieu program téh antusias pisan tur kacida leubeutna boh ti para orang tua siswa, boh ti 38 perguruan tinggi.
Pa Dedi Mulyana, S.Pd. Waka. Kurikulum
“Ku sadaya kagiatan nu lumangsung di SMAN 20, diharepkeun yén SMAN 20 langkung maju tur nanjung ti ayeuna dugi ka kapayunna. Kantenan ping 18 April 2016 badé lungsur bantosan perangkat komputer, sarana toilét pleus sarana taman, nu Insya Alloh tamanna baris dijejeran ku Walikota Bandung. Ku kituna leuwih nanceb moto sakola, Bersih Hati (Berkualitas, Sehat, Hijau Indah)” kitu saur Dra. Hj. Euis, Waka. Humas SMAN 20 Kota Bandung.
Siswana keur latihan UNBK
Malahan programna anu gumebyar haneut kénéh nyatana program Jaksa Masuk Sekolah (JMS), anu dina prungna ngadongkapkeun lima jaksa sakaligus ti pihak kejagung Republik Indonesia. Udaganana simpel, taat hukum, sadar hukum turta nyegah hukuman. Ieu kagiatan teu weudeu meriah turta ubyak gebyarna, kalawan dihadiran ku teu kurang-kurang ti para peserta didik SMP jeung SMA, saperti ti SMPN 2 Bandung, SMPN 7 Bandung, SMPN 5 Bandung, SMAN 3, SMAN 5 jeung SMAN 8. Teu kaliwat hadir ogé para pejabat negara, wawakil walikota Bandung, katut ka para orang tua siswa-siswi.
Latihan UNBK di SMAN 20 Kota Bandung
Kumaha enggoning tatahar nyinghareupan UNBK? Dipairan ku Waka.Kurikulum, Bapa Dédi Mulyadi, S.Pd, SMAN 20 relatip siap tandang makalangan, boh para siswa-siswi-na boh para guru-na. Ti anggangna mindeng diayakeun simulasi ngeusian soal ujian, anu soal-soalna katut ka tokénna ti Kemendikbud, diayakeun gladi bersih, perangkat komputer alanyar katut softwerna (80 perangkat ditambah unit komputer bantuan) kalawan jaringan anu dipakéna speedy jeung indihome. Cindekna, tos disosialisi ti tebihna kénéh.
Jaksa Masuk Sekolah (net)
Nyakitu sterilisasi rohang UNBK, engkéna dibagi tilu sési, guru proctor saurang, dina hal ieu Pa Dédi Mulyawan, S.Pd ku anjeun. sarana listrik ngagunakeun gentset. Lila proses UNBK dirancang genep poéeun. Pengawasna digunakeun pola pengawas silang, salapan urang pengawas, tilu rohangan jeung tilu sési. Mata pelajaranana basa Indonésia, basa Inggris, matématika, fisika, kimia, géologi, sosiologi turta ékonomi. Alhasil dijamin murni, turta moal kajadian soal-soalna nukang nonggong jeung anu geus diajarkeun ka para siswa-siswi ti masing-masing guru-na.
Taman sakola
Basa dikolongan ku Sora, naon baé kaéféktivitasan UNBK téh? Boh Ibu Kepsek Dr. Hj. Yéni, boh Dra. Hj. Euis, boh Bapa Dédi mertélakeun kalawan sapuk saurna satuhu kana rarancang aturan pamaréntah, dina perihal dunya atikan (pendidikan) ku nandonkeun basis téhnologi (BT) ti taun 2010 kénéh. Dina penyelenggaraanana, ari ku cara UNBK mah leuwih gancang turta leuwih rikip. Nya kitu deui dina waragad (dana) bakal leuwih ancin (irit). [MS]***
