Dr. Hj. Yeni Gantini, M.Pd, Kepala SMAN 20 Kota Bandung
majalahsora.com – Sobat Sora, basa taun 2016 kamari SMAN 20 Kota Bandung kaasup sakola nu ngalaksanakeun UNBK (Ujian Nasional Berbasis Komputer). Ku kituna loba pangalaman nu geus kaala ku sakola nu dipingpin ku Dr. Hj. Yeni Gantini, M.Pd téh, mangsa ngalaksanakeun UNBK-na.
Nilik kana éta hal, rencanana dina UNBK taun 2017, ieu sakola nu aya di Jalan Citarum No. 23, Kecamatan Bandung Wetan, baris ngalaksanakeun sacara dua pluh baé.
Dra. Hj. Euis, M.Pd., Waka Humas SMAN 20 Kota Bandung
“Alhamdulillah SMAN 20 Kota Bandung tos mitembenyan UNBK, basa taun 2016. Harita pelaksanaanana lumangsung lungsur langsar. Dibagi tilu pluh. Mung pami ningal waktos mah, karunya ka siswana, kumargi anu pluh katilu mah wangsulna téh burit teuing,” saur Hj. Yeni Gantini, Kepala SMAN 20 Kota Bandung.
Sangkan bisa ngalaksanakeun UNBK sacara dua pluh, ayeuna SMAN 20 Kota Bandung keur ihtiar ngawewegan jumlah komputerna. Kurang leuwih ayeuna geus aya 120 unit komputer. Rencanana mah rék nepi ka 140 komputer. Hartina kudu nyiapkeun 20 unit deui. Sésana téh rék ngoméan komputer nu aya sarta meuli nu anyar.
Pa Héndi Syahmadi, M.Pd., Waka Kurikulum SMAN 20 Kota Bandung
Jumlah siswa kelas XII nu rék ngiluan UNBK taun ayeuna kira-kira aya 282 siswa, ngawengku jurusan IPA jeung IPS. Sangkan leuwih siap nyanghareupan UNBK, sakola méré pemantapan ka para siswana téh. Eta téh mangrupa program sakola nu dikokolakeun ku bidang kurikulum. Nepi kaayeuna pemantapanana geus asup minggu ka-15. Satutas pemantapan sok aya try out, pikeun ngaevaluasi hasil pemantapanana. Rencanana dina ping 4 Maret 2017 rék ngalaksanakeun try out deui.
“Pemantapan téh salah sawios program sakola, nu maneuh mangsa mayunan ujian sapertos UNBK. Tujuanana kanggo ningal kamekaran siswa SMAN 20 Kota Bandung dina mayunan UNBK. Hasil try outna nu kahiji baris didugikeun ka sepuh siswa. Salian ti kanggo persiapan UNBK, ogé kanggo bidik jurusan,” saur Pa Héndi Syahmadi, M.Pd., Waka Bidang Kurikulum SMAN 20 Kota Bandung.
Dina UNBK taun 2017 SMAN 20 Kota Bandung rék nyipakeun 140 unit komputer
Hasil try out nu kahiji téh rencanana jadi salah sahiji patokan keur bidik jurusan. SMAN 20 rék ngondang orang tua siswa ka sakola. Tanggal 18 Pébruari 2017 sawalana téh. Salian ti éta sakola gé ngondang pihak katilu pikeun ngaronjatkeun otak kiri jeung kanan siswa SMAN 20 Kota Bandung.
“Mudah-mudahan ku kagiatan bidik misi sareng ngondang pihak katilu, dina taun ayeuna seueur siswa SMAN 20 Kota Bandung nu katampi ka perguruan tinggi negri, ngalangkungan jalur ondangan. Sacara tradisi mah siswa SMAN 20 Kota Bandung téh seuseueurna milih ka ITB, lamun teu katampi sok kuliah di Maranatha sareng Unpar, nyandak jurusan akuntansi atanapi tehnik. Samalah sateuacan lulus siswa SMAN 20 Kota Bandung ayeuna tos seueur nu katampi di éta kampus swasta,” saur Pa Hendi deui.
Siswa SMAN 20 Kota bandung keur try out hasil pemantapan
Balik deui kana persiapan UNBK taun ayeuna, rencanana SMAN 20 Kota Bandung, rék nyiapkeun tujuh rohangan. Nu semebar di tilu lantéy wangunan ieu sakola. Unggal lantéy aya dua rohangan nu dipaké keur kagiatan UNBK-na téh, katambah hiji laboratorium komputer. Keur jaringanana, geus boga opat server rencanana rék nambahan saserver deui. Watt listrikna gé kaitung lumayan badag nya éta 30.000 watt.
Persiapan nu sakitu seriusna téh moal jalan lamun teu dideuduel ku kabéh pihak, kaasup kepala sekolahna. Geus loba préstasi nu kahontal ku ieu sakola téh, salah sahijina jadi sakola Berbudaya Literasi sa-Kota Bandung taun 2016 kamari, salian ti éta kapilih jadi Sekolah Induk Jabar Smart School, nu ngabina 59 SMA Negri di Jawa Barat, jeung réa-réa deui pokona mah.
SMAN 20 Kota bandung salaku sakola Induk Jabar Smart School
Harepan Bu Yeni salaku kepala sekolah téh miharep UNBK taun ayeuna lancar. “Insya Alloh siswa kelas XII SMAN 20 mah, tos wanoh kana kamekaran téknologi. Tos sering ngalaksanakeun kagiatan nu patalina sareng internét, kayaning ujian dalam jaringan, ulangan harian nganggo internét, jsté. Mudah-mudahan persiapan sareng pelaksanaanana suksés, teu aya masalah. Ti ayeuna teras tatahar sangkan siap manyunan UNBK-na. Kayaning siap fasilitasna, siap proktorna, siap teknisina, pokona mah teu aya halangan harungan. Nu utama siswa SMAN 20 tiasa ngahontal nu dicita-citakeunana, aamiin,” saur Hj. Yeni, kepala sekolah nu soméah téh. [MS]***
