H. Aa Sudaya,M.Pd., Kepala SMAN 1 Margahayu Kabupatén Bandung
majalahsora.com – Sobat Sora, taun 2017 ayeuna, 108 SMA negri swasta sa-Kabupatén Bandung rempeg ngalaksanakeun UNBK. Nu dilaksanakeun ti tanggal 10 nepi ka 13 April 2017. Eta téh préstasi nu luar biasa, sanajan nyedek persiapanana téh. Lamun nempo sataun ka tukang, SMA nu ngalaksanakeun UNBK di Kabupatén Bandung téh, ukur sasakola, nya éta SMA Bina Bangsa School, nu aya di Cimenyan.
Buruan Kampus SMAN 1 Margahayu
Taun ayeuna SMAN 1 Margahayu Kabupatén Bandung, baris ngalaksanakeun UNBK (Ujian Nasional Berbasis Komputer) nu munggaran. Ayeuna keur nyiapkeun sagala rupana. Kayaning nyiapkeun sarana jeung prasarana, saperti komputer, jaringan internet, listrik, jeung réa-réa deui. Salian ti éta, ogé nyiapkeun SDM-na, nya éta proktor jeung téknisina.
Guru SMAN 1 Margahayu teu weléh ngaping siswa didikna dina nyangahreupan UNBK taun 2017
“Sabada SMA/SMK dikokolakeun ku Dinas Pendidikan Propinsi Jawa Barat, UNBK ayeuna téh janten salah salawios program nu diprioritaskeun. Alatan kanggo ngirangan ujian berbasis keretas sareng patlot. Targétna diiluan ku 80 % SMA sareng SMK sa-Jabar. Kalebet SMAN 1 Margahayu,” saur H. Aa Sudaya, Kepala SMAN 1 Margahayu nu ngarangkep janten Ketua MKKS (Musyawarah Kerja Kepala Sekolah) SMA sa-Kabupatén Bandung.
Pemantapan salah sahiji jam tambahan pikeun siswa ti guruna
UNBK di SMAN 1 Margahayu baris diiluan ku 426 siswa kelas XII, ti jurusan MIPA jeung IPS. Ku kituna sakola keur nyiapkeun unit komputerna. Kira-kira rék nyiapkeun 142 unit komputer. Rohangan nu dipakéna aya lima, serverna aya genep.
Aya 426 siswa kelas XII SMAN 1 Margahayu, nu baris ngiluan UNBK taun 2017
Keur nyiapkeun para siswana, ti béh ditu kénéh geus mimiti dibéré jam tambahan. Nya éta pemantapan ti guru-guru mata pelajaran nu baris di UNBK-keun. Di sagigireun éta aya kagiatana try out. Targétna aya opat kali try out. Nepi ka ayeuna geus dua kali try out. Ngan try outna masih ngaliwatan keretas jeung patlot.
SMAN 1 Margahayu rék nyiapkeun leuwih ti 142 komputer keur UNBK siswa didikna
Dina try out nu kaopat, rencanana rék maké komputer. Tujuanana sangkan siswa kelas XII apal kana konten-konten UNBK. Salian ti persiapan keur siswa, sakola gé tatahar keur nyiapkeun SDM-na, nya éta persiapan proktor, teknisi jeung pengawas. Ambéh dina prak-prakanana leuwih apal kana manajemen tur langkah-langkah gawé dina kagiatan UNBK.
Pelaksanaan UNBK di SMAN 1 Margahayu rencanana rék lumangsung tilu pluh. Hartina aya nu asupna isuk-isuk, beurang jeung pasosoré.
“Persiapan kanggo pelaksanaan UNBK 2017 téh, karoas abot awalna mah. Pangpangna kanggo ngumplitan fasilitasna. Salian ti éta, tangtos bakal mayunan rupaning masalah sareng kakirangan, dina sagala unsur nu aya patalina sareng UNBK. Kayaning unsur komputer, komputer server, jaringan komputer, proctor, teknisi, jrrd. Eta hal téh sakedik-sakedik baris diropéa tur disampurnakeun, mangsa mayunan UNBK nu saenyana,” saur Pa Aa téh.
Jaga siswa SMAN 1 Margahayu jadi jalma suksés
Nilik kana persiapanana mah mémang bangga jeung réa ngaluarkeun waragad. Ngan loba pisan hal positif nu baris kaala dina pelaksaan UNBK-na téh komo jaga kahareupna mah. Di antarana ngurangan pamakaian keretas, teu gejed ku distribusi soal, jrrd. Tapi nu paling utama mah ajén inajén kejujuranana leuwih luhung. Alatan pesertana téh moal bisa silih béjaan jeung silih tiron, ku sabab soalna béda-béda sanajan diukna pagigir-gigir. Ku kituna SMAN 1 Margahayu ngadeudeul pisan program Dinas Pendidikan Propinsi Jawa Barat, nu dipingpin ku Pa Ahmad Hadadi téh. [MS]***
