Andir – Sobat Sora, urang ulin yu ka SMA Pasundan 3 Kota Bandung. Ieu sakola téh, perenahna di Jalan Kebon Jati No. 31, Kelurahan Kebon Jeruk, Kecamatan Andir. Dina taun-taun ka hareupna, SMA nu dipingpin ku Pa Solihin, S.Pd., M.M., (mancén tugas ti 15 Juni 2016) téh, baris ngaronjatkeun kualitas sakolana, boh dina hal SDM, boh dina hal sarana. Anjeunna miharep SMA Pasundan 3 bisa dipercaya deui ku masarakat.
Pa Solihin, S.Pd., M.M., Kepala SMA Pasundan 3 Kota Bandung nuju nampi calon siswana
Aya sababaraha program sakola nu nuju kana ronjatan kualitas SMA Pasundan 3 Kota Bandung téh. Kayaning, numerapkeun kadisiplinan, pelayanan dina kagiatan belajar mengajar, ngaakomodir bakat siswana, jeung réa-réa deui.
Salian ti hal di luhur SMA Pasundan 3 Kota Bandung gé keur tatahar sangkan siswana jadi leuwih réligius. Di antarana ku tarékah, ngabiasakeun siswana ngaji, sholat wajib, apal asmaul husna, hafidz Al Qur’an. Tujuanana keur ngawangun karakter tanggung jawab, boh ka dirina, boh ka Indung Bapana.
Pa Cori Karimun & Pa atep Munawar, S.Ag., (Wakil Ketua PPDB taun 2016-2017)
Kamajuan sakola gé teu bisa lésot tina kagiatan ekstrakurikulérna, alatan kitu sakola nyadiakeun rupa-rupa ekskul, saperti bintalis, komputer club, seni tari modéren jeung tradisional, karawitan, penca silat, Téatér Sénapati, vocal grup, pramuka, pmr, paskibra, jeung salian ti éta.
Fasilitas sakola ayeuna dikeureuyeuh dikumplitan. Gedong sakolana lega sarta kondusif, laboratorium komputer, laboratorium sains, pabukon, alat seni modéren jeung tradisional, studio band, lapangan olah raga, masjid, ruang ekskul, jeung réa-réa deui.
“Bapa nembéan janten Kepala SMA Pasundan 3 Kota Bandung. Ayeuna neraskeun program kepala sekolah sateuacanna. Dina taun ajaran 2016-2017, baris mémérés kaayaan sakola. Bapa miharep SMA Pasundan 3 Kota Bandung tiasa janten sakola andelan masarakat, amin,” kitu saur Pa Solihin, Kepala Sekolahna. [MS]***
