Yudi Hendrayadi S.Pd., M.Pd, Kepala SMA Nasional Bandung
majalahsora.com, Kota Bandung – Poé Rebo, tanggal 27 Séptémber 2017, SMA Nasional Kota Bandung ngayakeun kagiatan nongton bareng (nobar) film G-30 S/PKI yasana sutradara Arofin C. Noer. Nu kiwari keur ramé jadi kontroversi jeung jadi padungdengan dimamana. Kagiatan nu lumangsung di aula ieu sakola téh dihadiran ku sakabéh siswa jeung guru. Di antarana rawuh Kepala Sakola SMA Nasional Yudi Hendrayadi S.Pd., M.Pd jeung pupuhu panitia kagiatan Toni Basuki, S.S., Wakil Kapala Sakola Bidang Kurikulum.
Nurutkeun Yudi sakumaha nu keur ramé di media kajadian PKI memang aya nu pro jeung kontra, nu antukna nimbulkeun kapanasaran para siswa, generasi ngora ayeuna. Nya antukna dipasilitasan wé ku sakola diputer dina bulan Séptémber da kapanan kajadian PKI (Gerakan 30 September) téh dina bulan Séptémber jeung kabeneran cenah di sakola gé aya waktu kosong (masa jeda) saminggu, ku sabab aya kagiatan PTN (Penilaian Tengah Semester). Teu diliburkeun tapi dieusi ku kagiatan order education nya salahsahijina ku kagiatan nobar film G-30-S/PKI. Para siswa gé dibéré tugas pikeun nyatet hal-hal nu pentingna tina eusi film ditulis din LKS.
Suasana nobar film G-30-S/PKI
“Janten tujuanana mah kanggo ngawanohkeun film dokumenter PKI ka balaréa utamina ka warga SMA Nasional Bandung, supados tiasa nganalisa/ngimeutan nyalira kana hal-hal nu janten pro sareng kontrana. Sagédéngeun éta saluyu sareng misi sakola yén SMA Nasional mah kapanan sakola nu gaduh wawasan kebangsaan, tah ku kituna wajib masihan panerangan ngeunaan bahaya latén komunis ka para siswa salaku calon pamingpin bangsa, ulah dugi ka paham komunis hirup deui ngaburantakkeun simpay tatali NKRI,” kitu cék kepala sekolahna téh.
Karakter kebangsaan saur Yudi, terus dicoba diintergrasikeun kana sakabéh mata pelajaran. Di antarana kana pembiasaan. Aya pembiasaan kaagamaan jeung pembiasaan kebangsaan. Pembiasaan kaagamaan, méméh lumangsungna KBM (kegiatan belajar mengajar) para siswa kalayan dipingpin langsung di puseur sora, ngaji Qur’ an jeung maca Asamaul Husna.
Kampus SMA Nasional Bandung
Ari Pembiasaan Kebangsaan mah geus jadi kawajiban sabab geus aya talatah ti panaratas SMA Nasional, nu kabeneran jadi pejuang kamerdekaan. SMA Nasional memang sacara kalembagaan ngadeg taun 1949, opat tahun sabada Indonesia m.erdeka, Nu naratasna dua pejuang kamerdekaan Pa Surasto (Suargi) sareng Pa Agus (Suargi). Aranjeunna talatah omat-omatan sangkan terus ngabangun jiwa-jiwa kabangsaan ka generasi panerus bangsa, “Tah nya ku sakola ditarjamahkeun ku misi SMA Nasional JUARA (Jujur, Unggul, Agamis, Rajin, Amanah) ditambih ku Berwawasan Kebangsaan,”pokna
Pembisaan kebangsaan ieu cék Yudi, geus jadi ciri nu mandiri SMA Nasional. Unggal poé, saacanna asup kelas sabada kagiatan kaagamaan, para siswa dibariskeun sina nyaranyi Indonesia Raya kitu ogé saméméh marulang para siswa kudu heula nyaranyi lagu-lagu wajib, “ Cindekna sasieureun-sabeunyeureun sakola nerapkeun karakter-karakter kebangsaan ka para siswa supados di mana para siswa lulus janten pejuang-pejuang mangsa kiwari,”kitu harepan kepala SMA Nasional, nu kacatet jadi alumni Biologi UPI.
Griselga & Claudia siswa SMA Nasional Bandung
Sapamadegan jeung hal éta Toni Basuki salaku pupuhu panitia kagiatan brukbrak ka Sora, leupas tina unsur-unsur politik, ku ayana nobar film PKI téh jiwa nasionalisme para siswa dipiharep jadi kageuing deui jeung terus dilarapkeun dina kahirupan bermasyarakat
Tah kumaha pamanggih para siswa.Griselga Bekarinaka kelas XI MIPA waléh ka Sora, ku ayana film dokumenter ieu inyana jadi apal jeung bisa diajar tina kajadian G-30-S/PKI, “Abdi janten apal kana sajarah pemberontakan PKI sareng kumaha perjuangan bangsa ieu dina ngalawan PKI nu teu ngagem agama,” kitu saurna.
Apep Ketua OSIS SMA NAsional Bandung
“Filmna seru sareng urang janten apal kumaha sesahna merjuangkeun bangsa ieu. Numawi urang kedah ngajén kana perjuangan para pahlawan ku jalan ngeusianana ku rupi-rupi préstasi nu nyeungitkeun sareng ngamajengkeun bangsa sanés ku hal-hal nu negatip,” kitu cék Claudiasari kelas XI IPS 2.
Ku kituna Apep salaku Ketua OSIS SMA Nasional umajak ka para siswa sangkan ulah tigebrus kana paham komunis nu geus nyata-nyata kejem ngahalalkeun sagala cara. [Asep GP] ***
