Cimahi Tengah – Sanlat (Pasantren Kilat) Romadon 1437 H di SMPN 6 Kota Cimahi nu dipingpin ku Pa Wahyudin Muharam, M.Pd, lumangsung genep poé. Jejerna Raih Berkah dan Magfiroh, keur ngawujudna bersih hati, bersih pikiran, bersih ucapan, bersih perbuatan sarta bersih lingkungan.
Pa Wahyudin Muharam, M.Pd, Kepala SMPN 6 Kota Bandung
Kagiatanana dibagi dua sési. Sési kahiji keur kelas tujuh dilaksanakeun ti tanggal 13 Juni nepi ka 15 juni 2016. Sési kadua keur kelas dalapan ti tanggal 16 Juni nepi ka 18 Juni 2016. Lumangsung ti pukul tujuh isuk-isuk nepi ka pukul hiji pasisiang. Tempatna di koridor sakola, nu salin rupa jadi tempat Sanlat, katempo karpét diamparkeun minuhan lantéy koridor. Salian ti éta ogé di kelas.
Pa Dasép Kurniawan, S.Ag, Guru PAI nu ngarangkep janten ketua pelaksana Sanlat taun 2016, Bu Sri Izati, S.Pd sareng panitia Sanlat SMPN 6 Kota Cimahi
Ieu kagiatan téh geus maneuh dilaksanakeun unggal taun. Taun ayeuna diiluan ku 750 siswa. Pematerina guru agama SMPN 6 Kota Cimahi, aya ogé pemateri ti luar, nya éta ti Smart With Islam. Materina aya tauhid, fiqih ibadah sarta ahlaq. Kagiatanana dieusi ku tadarus, sholat lohor berjamaah, sholat duha berjamaah, sarta bakti sosial.
Panitia Sanlat SMPN 6 Kota Cimahi dipoto sareng Dra. Cucu Suarsih (acuk beureum)
“Sanlat Romadon téh saur abdi mah saé pisan. Tujuanana kanggo ningkatkeun ahlaq nu saé, hususna kanggo abdi umumna kanggo sadaya siswa SMPN 6 Kota Cimahi. Salian ti éta janten apal kana tata cara natepan nu leres, wulu nu leres, sareng bekel kanggo urang di ahérat,” kitu cék Khaifa Nisa Salsabila salaku Ketua OSIS SMPN 6 Kota Cimahi.
Khaifa Nisa Salsabila, Ketua OSIS SMPN 6 Kota Cimahi sareng ketua Irmani Nurul Ilmi.
Dina ahir kagiatan aya bakti sosial. Ngondang anak yatim, ti tilu yayasan panti asuhan nu aya di Cimahi. Engkéna para siswa méré parcel keur anak yatim. Parcélna meunang udunan, mun dijumlah jambléh leuwih ti saratus parcélna téh. Salian ti éta parcélna gé dilombakeun, meunang mapaésan para siswa.
Parcél beunang mapaésan siswa SMPN 6 Kota Cimahi. Eusina rupa-rupa, aya katuangan, sirop, sabun, odol, jrrd
“Alhamdulillah lancar kagiatan Sanlat taun ayeuna téh. Pa Wahyudin salaku Kepala SMPN 6 Kota Cimahi nu anyar ngadeudeul pisan kana ieu kagiatan. Mudah-mudahan materi Sanlat nu didugikeun ka para siswa tiasa numerap ka para siswa,” saur Pa Dasép Kurniawan, S.Ag, Guru PAI nu ngarangkep janten ketua pelaksana Sanlat taun 2016. [MS]***
