Drs. Asep Turniawan, M.M. Kepala SMAN 12 Kota Bandung (Plt)
majalahsora.com – Sobat Sora, pelaksanaan UN (ujian nasional) tingkat SMP nu maké keretas jeung patlot téh kiwari terus dikurangan. Kaasup di Kota Bandung. Pangpangna mah keur ngurangan pamakéan keretas. Lamun sagala rupa kagiatan ujian jeung diajar terus-terusan maké keretas, lila kalilaan leuweung téh bakal dugul. Salian ti éta, ngahémat biaya ekspedisi, nu bisa méakeun waragad miliaran rupiah.
Ku ngamangpaatkeun kamajuan téknologi, mangka dunya atikan bisa leuwih maju jeung leuwih efektif. Saperti kagiatan UNBK (Ujian Nasional Berbasis Komputer) taun 2017 ayeuna, nu munggaran dilaksanakeun keur tingkat SMP negri di Kota Bandung. Saperti SMPN 30 Kota Bandung, nu dipupuhuan ku Ibu Herlina.
Pelaksanaan UNBK SMPN 30 Kota Bandung téh, baris nginjeum tempat jeung fasilitas SMAN 12 Kota Bandung, nu rék ngaduakalian ngalaksanakeun UNBK. Alatan SMPN 30 acan bisa minuhan jumlah komputer keur kagiatan kasabit. Pelajaran nu di UN-keunana téh pelajaran basa Indonésia, matematika, basa Inggris jeung IPA.
“Salaku peyelenggara pendidikan pamaréntah, SMAN 12 Kota Bandung moal ngahésé-hésé sakola nu baris ngalaksanakeun UNBK di SMAN 12 Kota Bandung. Salami teu bentrok sareng kagiatan atanapi program SMAN 12. Komo SMPN 30 Kota Bandung, nu tatanggian. Pokona mah bakal dideudeul sacara optimal. Kanggo kamajuan anak bangsa, geratis” saur Pa Asép Turniawan, Kepala SMAN 12 Kota Bandung (Plt), tandes.
Bu Herlina, Kepala SMPN 30 Kota Bandung
Méméh prung kana UNBK SMP nu saenyana, nu baris dilaksanakeun tanggal 2, 3, 4 jeung 8 Méi 2017, siswa kelas IX SMPN 30 Kota Bandung geus sababaraha kali ngalaksanakeun simulasi UNBK di SMAN 12 Kota Bandung. Tanggal 27-28 Pébruari 2017 jeung 20-21 Maret 2017. Sacara umum mah euweuh masalah, bajalan lancar.
“Bapa salaku Plt Kepala SMAN 12 Kota Bandung, nu mancén tugas ti ahir Januari 2017, rumaos reueus ka Kepala nu sateuacanna boh Pa Dedy Chrisdiarto, boh Pa Suryana nu tos nyiapkeun komputer sareng fasilitasna. Atuh salami dipingpin ku Bapa, Bapa baris neraskeun program nu saé sareng ngadeudeul program pamaréntah, hususna program ti Dinas Pendidikan Propinsi Jawa Barat dina nyukséskeun UNBK taun 2017. Kanggo SMAN 12 Kota Bandung mah badé ngaduakalian,” Saur Pa Asép, deui.
Pa Asép, nu ngarangkep janten Pengawas SMA di Dinas Pendidikan Propinsi Jawa Barat gé ngécéskeun ka singsaha waé sakola boh SMA boh SMK negri jeung swasta nu geus minuhan fasilitas keur ngalaksanakeun UNBK, ulah sok ngahésé-hésé sakola nu rék nginjeum fasilitasna. Salila ieu gé maranéhna réa dibantuan ku pamaréntah, salah sahijina ngaliwatan dana BOS (Bantuan Operasional Sekolah). [MS]***
