Dra. Nita Hidawati, M.M.Pd., Kepala SMPN 21 Kota Bandung
majalahsora.com – Pangumuman kalulusan SMP, sa-kuliah Indonésia diumumkeun poé Juma’ah ping 2 Juni 2017. Kaasup di SMPN 21 Kota Bandung nu dipingpin ku Dra. Nita Hidawati, M.M.Pd. Kalulusan taun 2017 ayeuna, kacatet siswa kelas IX-na lulus 100%, jumlahna aya 258 urang. Ieu sakola téh pernahna di Gg. Lumbung II, Kecamatan Babakan Ciparay.
Poé éta kénéh pihak sakola ngondang orang tua siswa, tempatna di aula sakola, ngabéwarakeun ngeunaan kalulusan palaputrana nu geus nyuprih élmu salila tilu taun. Di sagigireun éta, nyosialisasikeun ngeunaan cara daftar ka SMA reujeung SMK Negri, dina taun ajaran 2017-2018 ayeuna. Kayaning cara daftar sacara non akademik reujeung non akademik.
“Alhamdulillah tadi sepuh siswa kelas IX sareng nu ngawakilanana sarumping, SMPN 21 Kota Bandung hasil ngaluluskeun 258 siswa. Mudah-mudahan tiasa ngalajengkeun sakola ka sakola nu dicita-citakeunana. Nu katampi di sakola negrina miharep langkung nikel,” saur Bu Nita téh, di rohang damelna.
Patalina reujeung kagiatan PPDB taun ajaran 2017-2018 di SMPN 21 Kota Bandung, nu aya dina papayung Dinas Pendidikan Kota Bandung ,nu dipingpin ku Dr. H Elih Sudiapermana téh, rencanana baris narima 160 siswa anyar, nu engkéna sumebar di lima rombel (rombongan belajar).
“Insya Alloh SMPN 21 baris nampi siswa anyar pikeun lima kelaseun sakelasna ngawadahan 32 urang. Sim kuring salaku Kepala Sekolah miharep taun ajaran 2017-2018, kagiatan belajar mengajarna tiasa lebet enjing-enjing sadaya, pami dipersentaseukeun mah, jalur akademik dalam kota 60%, luar kotana 10%. Non akademikna, ngalangkungan jalur RMP 20%, préstasi 5%, undang-undang 4.5%, sareng PDBK 0,5%,” saur Bu Nita deui.
Nu ngalantarankeun SMPN 21 Kota Bandung dina taun ajaran 2017-2018 narima siswa anyarna leuwih saeutik téh, sangkan bisa ngalaksanakeun kurikulum 2013. Alatan jam diajarna leuwih euyeub. Syaratna kudu asup isuk-isuk kabéh. Ogé keur nanjeurkeun kualitas sakola, sangkan bisa basaing reujeung sakola negri lianna di Kota Bandung hususna, di Indonésia umumna. [MS]***
