Setia Untung Arimuladi, salaku Kepala Kejaksaan Tinggi Prop. Jabar, alumni SMAN 10 Bandung angkatan 1979-1980
majalahsora.com, Kota Bandung – Poé Sénén isuk-isuk, 11 Séptémber 2017, Setia Untung Arimuladi, salaku Kepala Kejaksaan Tinggi Prop. Jabar, jadi pembina upacara bendéra di SMAN 10 Kota Bandung, nu dipupuhuan ku Ade Suryaman, S.Pd., M. M. Keur Untung, geus ngaduakalian jadi pembina upacara di sakola nu pernahna di Jalan Cikutra téh, dina raraga program Jaksa Masuk Sekolah (JMS).
Ade Suryaman, Kepala SMAN 10 Bandung (kénca) & Dede Amar, Kepala BP 3 Wilayah IV Disdik Prop. Jabar
Mangsa méré amanat, ngadadarkeun ngeunaan Nawa Cita, hususna poin nu kadalapan, ngeunaan pembentukan karakter, utamana generasi ngora Indonésia. Cék Untung pentingna nguatan karakter bangsa téh, keur nyingkahan hal-hal negatip nu baris ngaruksak méntal generasi ngora, pangpangna ngeunaan perundungan/bullying ku senior ka junior, nu keur haneuteun. Ti SD nepi ka SMA sok aya baé perundungan téh.
Mangsa ngeleberkeun bandéra
Harita, Untung méré sababaraha conto ngeunan kasus perundungan, nu nyababkeun sababaraha pelajar ngalakukeun kekerasan boh méntal boh fisik ka babaturan sakolana. Samalah aya nu nepi ka tilar dunya. Nu jadi sababna téh, biasana ukur masalah sapélé. Kawas dengdam pédah diléléwé, silih ngaléléwé, gara-gara nagih hutang sarébu pérak, pédah kaperego maok hapé, jsté. Ku kituna teu bisa diantep kitu baé, alatan éta hal téh geus ngalanggar hukum pidana.
Siswa SMAN 10 Bandung
Nu ngalantarankeun para rumaja ngalakukeun perundungan téh, salah sahijina nya éta faktor keluarga, alatan kurangna perhatian ti kolotna. Nempo kolotna ngalakukeun hal kasar, tuluy diturutan mangsa di sakolana. Di sagigigreun éta faktor ékonomi, kecemburuan sosial, jrrd.
Peserta upacara bendera Jaksa Masuk Sekolah di SMAN 10 Kota Bandung
Ka para siswa SMAN 10 Kota Bandung nu jadi peserta upacara, Untung ngingetan, yén sakabéh manusa, mangsa lahir ka alam dunya téh, boga ajén nu sarua, nya éta ngabogaan hak asasi manusa nu akur. Nu kudu dihormat tur dihargaan. Teu ngabedakeun hak nu beunghar jeung nu miskin, alatan di Indonésia sakabéh warga negarana boga hak hidup jeung hak merdéka tina bertindak sapanjang teu ngalanggar masalah hukum nu luyu jeung undang-undang nu lumaku.
Ade Suryaman, (kénca) basa nampi bantosan ti Setia Untung, Kepala Kejati Jabar
Cék Untung, nu meunang ngawatesan hak asasi manusa téh nya éta hukum nu aya dijero peraturan perundang undangan, lain pribadi-pribadi nu ngarasa dirina leuwih punjul ti batan nu lianna. Kayaning ngarasa jago, pinter, beunghar, jsté.
Setia Untung, Kepala Kejati Jabar masrahkeun bantuan keur pangwangunan Masjid SMAN 10 Kota Bandung
Ka para peserta upacara bendera, hususna para siswa SMAN 10 ti kelas X nepi ka XII, Untung méré talatah ka maranéhna salaku penerus bangsa, sangkan kudu silih asah asih asuh, ulah ngabéda-bédakeun jeung papada babaturan. Masih cék Kejati, jaga 10 nepi ka 20 taun ka hareup nasib para siswa nu ayeuna hadir ngiluan upacara téh moal sarua. Ku kituna kudu boga niat sangkan bisa ngabagjakeun kolot jeung nagara.
M. Iqbal, Ketua Pelaksana Reuni Emas SMAN 10 (jaket biru), masrahkeun pangajén ka Setia Untung salaku alamuni SMAN 10 Bandung nu berdedikasi & loyalitas ka SMAN 10. Salian ti éta, ogé masrahkeun 10 pangajén keur guru tur alumni SMAN 10 Bandung nu berdedikasi tur loyalitas lianna, nu dipasrahkeun saban taun. Taun 2017 ayeuna nu munggaran
Untung gé miharep lembaga sakola hususna SMAN 10 Kota Bandung bisa méré pengawasan ka peserta didikna. Kitu ogé sakola kudu méré pamahaman ka orang tua siswana, sangkan aranjeunna leuwih merhatikeun para putrana.
Poto babarengan siswa SMAN 10 Bandung
Patalina jeung sumpingna Kepala Kejati Jabar ka SMAN 10 Kota Bandung, Adé Suryaman salaku kepala sekolahna, ngarasa reueus tur atoh. “Sim kuring ngarasa bagja, SMAN 10 Bandung katatamuan Pa Setia Untung, salaku Kepala Kejati Jabar. Reueusna alatan anjeunna téh alumni SMAN 10 ongkoh, nya éta angkatan 1979-1980. Komo tiasa janten pembina upacara benderana. Dipiharep anjeunna tiasa janten motivasi kanggo siswa SMAN 10 hususna, yén SMAN 10 Kota Bandung téh tiasa ngalahirkeun generasi nu tiasa babakti ka nagara sapertos Pa Kepala Kejati,” cék Adé.
Pihak SMAN 10 Kota Bandung nu meredih langsung ka Kejati Jabar sangkan ngontrol pangwangunan & revitalisasi perkantoran SMAN 10 Bandung
Satutas upacara bendéra, Kepala Kejati Jabar téh, laju masrahkeun bantuan keur kagiatan agama Islam di Masjid SMAN 10 Kota Bandung, kayaning Al Qur’an, mukena, sarung sarta méré waragad keur pangwangunan masjidna. Laju, nilikan wangunan perkantoran utama SMAN 10 Kota Bandung, nu keur direvitalisasi, ogé ngaresmikeun laboratorium kewirausahaan budidaya ikan, disarengan ku Dédé Amar salaku Kepala BP3 Wilayah IV, Disdik Prop. Jabar, Bambang, salaku Ketua Komite Sekolah, M. Iqbal, salaku Ketua Panitia HUT Emas SMAN 10, jrrd .
Kepala Kejati Jabar ngaresmikeun laboratorium kewirausahaan budidaya ikan di SMAN 10
“Alhamdulillah sakola nuju sibuk ngawangun gedung perkantoran utama, langsung kontrolna ku Kepala Kejati. Pihak sakola nu meredih pangwangunan perkantoran utama SMAN 10, sangkan dikontrol ku kejaksaan. Salian ti éta SMAN 10 Kota Bandung salaku sakola rujukan di Jawa Barat gé, ngagaduhan laboratorium kewirausahaan budidaya ikan, langsung diresmikeun ku Pa Setia Untung,” cék Kepala SMAN 10 téh.
Poto Kagiatan
[MS]***
