Dr. Ir. H. Ahmad Hadadi, M.Si., Kepala Dinas Pendidikan Jawa Barat
majalahsora.com – Poé Senén 17 April 2017, Di Aula Lt. IV Dinas Pendidikan Jawa Barat, haneuteun aya kagiatan pelantikan Kepala SMA/SMK Negri anyar. Lumangsung ti pukul 08.30 nepi ka réngsé. Aya 21 urang Kepala Sekolah anyar, nu diistrénan langsung ku Dr. Ir. H. Ahmad Hadadi, M.Si., salaku Kepala Dinas Pendidikan Jawa Barat téh. Jolna ti BP 3 wilayah I, II, III, IV, VI, jeung VII, kayaning ti Kota Dépok, Kota Bogor, Kabupatén Bogor, Kabupatén Bekasi, Kota Bekasi, Kabupatén Sukabumi, Kota Sukabumi, Kabupatén Bandung Barat, Kota Cimahi, Kabupatén Garut, Kota Tasikmalaya jeung Kabupatén Pangandaran,
“Tos sakedahna, kagiatan pelantikan Kepala Sekolah anyar SMA/SMK, lumangsung di lingkungan Disdik Jabar téh. Pangpangna mah kanggo calon Kepala Sekolah nu tos umuran, hawatos engkéna, bilih kaugeur ku régulasi nu lumaku. Sateuacanna tos ngalangkungan penilaian ulang, luyu sareng usulan ti Disdik kabupatén kota-na. Salian ti éta, salah sawios pangajén ti Dinas Pendidikan Jawa Barat kanggo aranjeunna nu tos lolos verifikasi kanggo mingpin satuan pendidikan sacara definitif,” saur Pa Ahmad Hadadi, téh.
Sabada kagiatan kasabit di luhur, rencanana unggal bulan baris aya pelantikan Kepala Sekolah anyar deui. “Jabatan Kepala Sekolah téh, sanés jabatan pretise tapi amanah. Tugas tambahan guru kanggo mingpin sakola. Insya Alloh saban bulan aya pelantikan Kepala Sekolah deui, boh kanggo nu anyar atanapi rotasi mutasi, kanggo penyegaran. Apan aya ogé nu pangsiun,” pokna déui.
Di Jawa Barat kira-kira aya 748 SMA/SMK, Negri, acan kaasup sakola filial, atawa sakola anyar nu sumebar di 27 kabupatén kota. Ku kituna dipiharep Kepala Sekolah téh bisa méré conto keur para guru, murid jeung warga sakolana. Di sagigireun éta Kepala Sekolah téh kudu bisa ngokolakeun anggaran, kagiatan, jsté. [MS]***
