Dra.Hj. Nelly Krisdiyana, M.M.
majalahsora.com, Kota Cimahi – Kapilih jadi “sakola model” tangtu waé jadi kareueus pikeun hiji instansi sakola mah, lantaran nu ngaranna sakola “percontohan” mah tangtu waé dipandang leuwih punjul kualitasna ti batan sakola lianna. Tapi disagigireun kitu téh pikeun SMAN 3 Cimahi mah jadi hiji kabeungbeurat sabab gedé tanggungjawabna kudu jadi conto hadé keur sakola binaanana (sakola imbas).
“Namung tangtos aya mangfaatna ditunjuk janten “sekolah model” téh, kumargi dipasihan tanggel waler nu ageung, SMA 3 janten langkung gaduh komitmen dina ngaronjatkeun kualitasna ti ngawitan ngabébérés administrasi, kinerja, niley ulangan siswa gé kedah énggal-énggal dibagikeun supados aranjeunna tiasa ngaroris kakiranganana,” saur Kapala Sakola SMAN 3 Cimahi Dra.Hj. Nelly Krisdiyana, M.M., basa ditepungan ku Sora di kantorna.
Mangpaat lianna saur Nelly, méré motivasi ka tiap individu pangeusi sakola ti mimiti guru, karyawan TU, kepala sakola jeung ka siswa sangkan dina réngkak paripolah sapopoé jadi tuladan,” Para siswa dipépélingan sangkan dina istirahat atanapi gentos jam palajaran ulah aya nu luntang-lantung di luar alesan rék ka jamban, komo mun aya sémah mah, dipahing pisan ulah ngisinkeun kana lébél sakola modél tapi kudu jadi conto nu hade,” Kitu saurna.
Kagiatan Pendampinghan & Pengimbasan Sekolah Model Dalam Penerapan SPMI
Ayana sakola model, saur Nelly, luyu jeung tungtutan Permen No. 28 taun 2015, nu bagalna dina pamustunganana sakabéh satuan pendidikan wajib ngaimplementasikeun sistem pendidikan ku jalan ngaronjatkeun “mutu internal”.
Sataun ti harita sabada ngaliwatan sababaraha seleksi di tingkat kabupatén/kota, SMA 3 Cimahi lolos seleksi nepi ka tingkat nasional laju kapeto jadi sakola “percontohan” di tingkat nasional. Ari kagiatanana teu ngan ukur ngaronjatkeun kualitas akademis tapi non akademis kudu diundakkeun. Jeung kabeneranana téh cék anjeunna, SMA 3 Cimahi mah taya kasulitan dibawa ka tingkat propinsi jeung kota gé lantaran loba kaunggulanana. Di antarana ku ayana bantuan Rp. 200 juta ti pamaréntah keur “Sekolah Percontohan Kewirausahaan” jadi loba kréatifitas-kréatifitas wirausaha siswa nu suksés, boh sacara individu boh sacara kelompok. Bentuk wirausaha nu taun ka tukang meunang aprésiasi ti Netty Heryawan (Istri gupernur Jabar) di antarana, ternak lélé, nila, hidroponik, dina palajaran fisika jeung kimia nyieun sabun kecantikan. Samalah geus aya koperasi siswa nu nampung kréatifitas siswa nu bisa dijual di koperasi kayaning katuangan, kertas daur ulang, jsté.
Cecep Saeful, S.Pd., guru basa Sunda di poto di kelas
Nepi ka taun 2017 ieu geus ngaduakalian SMAN 3 Cimahi jadi Sakola Model, disagigireun terus “patareman” gawé reujeung jeung lima sakola lianna kayaning; SMAN 1 Cimahi, SMAN 5 Cimahi, SMA Kartika XIX-4 Cimahi, SMA Santa Maria 3 jeung SMA Muhammadiyah I Cimahi. Sakola nu pernahna di Jl. Pasantren No. 161 Kota Cimahi téh terus ngaronjatkeun kualitas internalna dina sagala widang atikan akademis jeung non akademis.
Kapakéna jadi sakola mode,l tangtuna gé SMAN 3 Cimahi nohonan kana pasaratan-pasaran nu ditangtukeun. Salah sahijina komitmen ngundakkeun kualitas ku jalan nyoko kana dokumen nu geus aya. Unggal taun ditalek kana komitmen, lamun teu komitmen diereunkeun jadi sakola model. Sakola model gé kudu gampang diakses ku sakola-sakola imbasna sarta dirojong ku lingkunganana. Kitu cék Mohammad Duduh Salahudin Widiaiswara Pendamping LPMP (Lembaga Penjamin Mutu Pendidikan) Jabar Pada Pendampingan 2, nu harita keur ngayakeun kagiatan Pendampingan dan Pengimbasan Sekolah Model Dalam Penerapan SPMI (Sistem Penjaminan Mutu Internal) di SMAN 3 Cimahi. Rawuh ogé harita Hj.Yeppa Rosdja S.Pd, Pupuhu TPMPS SMAN 3 Cimahi.
Pabukon SMAN 3 Cimahi
Mémang payus jadi sakola modél téh sabab SMAN 3 Cimahi loba ngaraéh rupa-rupa panghargaan, di antarana Sekolah Ramah Anak (sekolah percontohan) Provoinsi Jabar, Juara Pelayanan Publik Terbaik sa-wilayah Kota Cimahi, Parkir Terbaik sa- Jabar, Sekolah Percontohan Pendidikan Karakter , Juli 2017 kamari gé jadi Sekolah Percontohan Bindikel (Pembinaan Pendidikan Keluarga), dua kali noron jadi Juara Sekolah Sehat di tingkat provinsi, jsté.
Tapi nalika aya tawaran seleksi keur “adiwiyata” mah ditolak cenah gé sabab persiapanana loba nyita guru jeung siswa jadi ngaganggu kana palajaran. Tapi lamun Bindikel jeung Sekolah Model mah teu bisa mungpang cenah da ditunjuk langsung, sok sanajan sarua ngaganggu kana palajaran sabab guru nu kalibet dina kagaiatan éta gé kapaksa kudu ninggalkeun kelas, ninggalkeun siswa digantian ku tugas-tugas.
Buruan sakola
Seni jeung Olah Raga jadi Kokojo
Awalna siswa daptar ka SMAN 3 Cimahi téh lain pédah akademikna, sok sanajan tempatna hésé disorang ku angkot tapi saur Nelly, patempatanana pikabetaheun, jamban waé aya 35 rohangan jeung préstasi seni katut olah ragana leubeut pisan.
Nu ngaranna kagiatan seni ti mimioti upacara adat, desain grafis, tari, paduan suara, nepi ka gamelan rchestra (adumanis gamelan jeung Arumba katut alat-alat band ) “SMALUCHI” nu kungsi tandang magelaran di acara INA Craf Malaysia, Hotel Homan, Braga jeung kagiatan gedé lianna, nyampak di SMAN 3 Cimahi.
Masjid sakola, dipake aktifitas kaagamaan kayaning sholat Duha
Cék kepala sakolana, sacara akademis, SMAN 3 Cimahi mémang can ngajaul kualitasna, tapi taun ieu siswa nu katampa di perguruan tinggi negeri undak. Tina 325 siswa nu ngilu ujian, 100 urang (30%) katampa di PTN kayaning ITB, Unpad, UPI, IPB, salian ti éta aya nu lolos ka Akmil.
Salah sahiji tarékah keur ngaronjatkeun kualitas akademis, keur terus diundakkeun, utamana dina “pemantapan” palajaran pikeun kelas XII nu rék UN jeung ngilu SMPTN, diambah ku tés psikologi sangkan siswa teu salah milih fakultas/jurusan di paguron luhur.
UKS SMAN 3 Cimahi
Pasilitas-pasilitas nu aya di SMAN 3 Cimahi di antarana: Lapang olah raga basket, tenis lapangan, voli, badminton, pinpong. Lian ti éta aya green house, pangolahan kompos, kulah lele jeung nila, kebon ubar-ubaran , hidroponik, kantin sehat (7), koperasi siswa, UKS, rohangan tata boga, kantin jujur nu geus jalan genep taun sarta lab fisika, kimia jeung biologi, “Nya cekap sementawis mah kanggo 1264 siswa ti 36 rombel (rombongan belajar) mah nya,” cék kepala sakola, nu kacatet jadi alumni PMPKN IKIP ‘79 mungkas wangkongan jeung Sora. [Asep GP] ***
