Ibu Ulan Sumilan, S.Pd, M.M.Pd, Kepala SDN Buah Batu Selatan 1, 3, 4, 7 & 9 Kota Bandung
Buah Batu – Rebo, tanggal 22 Juni 2016, Majalah Sora ngahaja silaturahmi ka SDN Buah Batu Selatan 1, 3, 4, 7 & 9, kadituna mah urang sebat SDN Buah Batu Selatan wé nya. Harita nepangan Ibu Ulan Sumilan, S.Pd, M.M.Pd, salaku kepala sekolahna. Ngobrol santéy di rohang damelna nu bararesih. Tah warta lengkepna mah aos wé nya.
Keur masang teralis beusi
SDN Buah Batu Selatan, pernahna di Jalan Ibrahim Adjie No. 45 Kota Bandung. Jumlah siswana kawilang réa, kira aya 1200-an siswa keur kabéh tingkatanana. Asupna dibagi dua pluh, isuk-isuk jeung siang.
Di ieu lorong baris dipasang kanopi, sangkan kaiuhan mangsa hujan jeung panas
Dina raraga ngaronjatkeun kualitas SDN Buah Batu Selatan, Bu Ulan saparakanca, terus ngeureuyeuh ngawangun infrastrukturna. Sababaraha bulan ka tukang SDN Buah Batu Selatan ngawangun perpustakaan Bestari nu diresmikeun ku Kepala Dinas Kota Bandung, Bapa Elih Sudiapermana. Salian ti éta ngawangun kantin séhat.
Kantin sehat
Hancaeun saterusna nya éta, ngabebenah saluran cai tur filterna, alatan kualitas cai di SDN Buah Batu Selatan kurang alus. Salian ti éta ogé rék nyieun jamban anyar. Da salila ieu, jumlahna masih kurang, utamana di lantéy dua jeung tilu, nu can boga jamban. Rencanana rék ngawangun opat jamban, lantéy dua jeung lantéy tilu masing-masing dua siki. Tujuanana sangkan para siswa nu aya di éta lantéy teu barabé mangsa hayang ka cai. Sakabéh jambanna téh bakal leuwih ti dalapan siki.
Pa Elih Sudiapermana, Kadisdik Kota Bandung ngaresmikeun Perpustakaan Bestari SDN Buah Batu Selatan
Rencanana di luhureun perpustakaanana baris di wangun masjid nu legana 56 m2
Disagigireun hal di luhur, SDN Buah Batu Selatan dina mangsa ayeuna baris ngawangun gapura sakola tur rohang satpamna. Gapurana dioméan, sacara éstétika bakal leuwih geunah katempona. Kitu ogé jeung rohang satpam nu representatif, sangkan tugas satpam leuwih optimal dina nalingakeun kaayaan sakola sarta wargana, alatan sok aya urang luar nu teu pupuguh asup ka sakola.
Gedong SDN Buah Batu Selatan
“Dina mangsa reureuh kagiatan diajar, Ibu ngahaja ngabebenah sakola. Aya tilu nu diprioritaskeunana téh, nya éta gapura sareng rohang satpam, jamban sareng saluran caina, nu saterasna mah masjid sakola. Rencanana masjidna diwangun di luhureun perpustakaan Bestari. Legana 7×8 m2. Desainna modéren minimalis. Mudah-mudahan dina taun ieu tiasa laksana. Insya Alloh kanggo waragad jamban baris aya bantosan ti pamaréntah. Eta téh pangdeudeul ti Pa Beni, salaku Kasie. Sarana Prasarana Dikdas, Dinas Pendidikan Kota Bandung,” saur Bu Ulan, nu mottona silih asah, silih asih, silih asuh téh.
Green House
Ngaronjatkeun ajén inajén lingkungan, kaberesihan jeung kaséhatan warga SDN Buah Batu Selatan gé jadi salah sahiji udagan ieu sakola. Méméhna geus dilélér penghargaan Adiwiyata Kota Bandung. Ayeuna keur tatahar sangkan hasil jadi sakola adiwiyata tingkat propinsi jeung nasional.
Bu Ulan sareng Pa Elih Sudiapermana, Kadisdik Kota Bandung basa nampi penghargaan Adiwiyata Kota Bandung
Aya sababaraha unsur sangkan SDN Buah Batu Selatan bisa ngahontal préstasi di widang lingkungan nu leuwih luhung téh. Salah sahijina pangdeudeulna ti tim keberesihan tur gorong-gorong Kelurahan Cijawura. Saminggu tilu kali ngakutan runtah ieu sakola. Runtahna beunang dikumpulkeun, salah sahijina sabada kagiatan GPS (Gerakan Pungut Sampah) nu dilaksanakeun saban poé Senén, Rébo sarta Juma’ah. Sakola gé aktif kordianasi jeung RT-na.
Desain Gapura
Keur ngurangan volume runtah, ti sababaraha waktu ka tukang siswana diusahakeun sina mawa bekel jeung inuman ti imahna séwang-séwangan. Samalah pikeun kelas tilu, opat jeung lima mah ti béh ditu kénéh dibéré misting tur wadah inuman ti PIP Aspirasi. Disagigireun éta PIP Aspirasi gé méré bantuan mangrupa baju muslim jeung tas.
Desain pos satpam
Lulusan SDN Buah Batu Selatan angkatan 2015-2016, ampir 78 peresénna nuluykeun ka sakola negeri, sésana nuluykeun ka pasantrén jeung ka sakola swasta. Taun ajaran 2016-2017 SDN Buah Batu Selatan baris nampa 200 siswa. Dipiharep dina taun ajaran anyar téh, sagala program nu direncanakeun ku Bu Ulan tinekanan. Pangpangna keur ningkatkeun préstasi jeung kualitasna. Hal éta teu leupas ti pangdeudeul warga sakola ogé komite sakolana, nya éta Bapa Jumhari,S.Pd, Kepala SMP Madya Kota Bandung manten. [MS]***
