Bu Ulan Sumilan, S.Pd., M.M.P.d., Kepala SDN Buah Batu 1 & 3 (selatan) Kota Bandung
Sobat Sora, urang kenalan sareng kepala SDN Buah Batu I-III Ibu Ulan Sumilan, S.Pd, M.M.Pd sakaligus nganyahokeun program-program anu eukeur jeung bakal dikeureuyeuh salila ieu.
Green house
Basa Sora silaturahmi ka SDN Buah Batu I-III Kemis 31 Maret 2016. kabeneran keur haneuteun ku ayana program kunjungan inohong ti luar negeri (Universitas Oxpord, Inggris) dina raraga program kunjungan warung anak sẻhat (Kantin Sẻhat) kalawan diluluguan ku Prof. Dr. Mick Blowfield sakaligus kunjungan para mahasiswa UNPAD ti Fakultas Kedokteran.
Ngabiasakeun maca
Bu Ulan anu linggih di Komplék Permata Biru turta ngawitan jeneng kepala SDN Buah Batu I- III ti taun 2012 medar program sakola anu dikokolakeunana.
Pabukonna terus dibebenah
Dina widang fisik, anjeunna matéahkeun pabukon (perpustakaan) sacara optimal anu kawitna sistim manual laju dibebenah ngaju kana sistim digitalisasi. Sanggeus dibebenah turta dibébérés sapuratina tepi ka manajemenisasina. Ieu perpustakaan laju diresmikeun ku cara ngulem para pustakawan ti UNINUS, Pa Elih Sudiapermana, Kepala Dinas Pendidikan Kota Bandung sareng Pa Harta Kurniawan, Kepala Bidang PTKSD Dinas Pendidikan Kota Bandung. Saterasna ngabebenah kantin anu perenahna di tengah aréa wawangunan sakola, diupayakeun pola kantin séhat tur berséka. Hal ieu dumasar kana pangalaman Bu Ulan, prihatin ku kaayaan warung-warung sakola anu kurang miduli kana kaséhatan, boh tempat boh dahareunana. Bu Ulan ngaharepkeun sangkan kantin sakolana bener-bener higienis, berséka turta sadar kana kabersihana. Sawatara peresmian kantin séhat mah basa bulan Agustus 2015.
Prof. Dr. Mick Blowfield, ti Inggris, basa nganjang ka kantin sehat SDN Buah Batu 1 & 2 Kota Bandung
SDN Buah Batu I-III anu perenahna di Jalan Jéndral Ibrahim Adji Nomer 45 nyangking prédikat sakola adiwiyata tingkat provinsi (April 2015) turta keur hangkeut-hangkeutna tatahar nuju kana sakola adiwiyata nasional.
Kepala Sekolah, Guru SDN Buah batu 1 & 3 (Selatan), dipoto sareng Prof Dr. Mick Blowfield ti Oxford Univesity Inggris
“Ku ngajéngléngna pabukon (perpustakaan) pola digitalisasi di SDN Buah Batu I-III, . Diharepkeun para siswa-siswi turta warga sakola umumna, daék leukeun ngeureuyeuh neuleuman rupa-rupa buku bacaan. Nyempetkeun dina sajongjongan mah maca, nelaah turta nerapkeun dina kahirupan sapopoéna. Saluyu reujeung ngaran pabukonna “BESTARI” wancahan tina “Belajar Lestari” tegesna mibanda kaluhungan pangaweruh dibarengan kajembaran pangalaman anu asak tapi teu adigung-adiguna. Dumasar kana falsafah paré, mingkin kolot mingkin tumungkul (tawadhu), lantaran cirining jalmi sugih pangarti jembar panalar nyatana kaajrihan ka Nu Kawasa, loma turta haat ka sasama. Beuki tambah pangarti beuki karasa sisipna diri di payuneun Gusti,” saur Bu Ulan anu saméméhna ngawulang di SDN Ciporéat Kota Bandung.
Bu Ulan basa nampi kunjungan mahasiswa kedokteran UNPAD
Dina pamaké sapopoéna, Bu Ulan nandeskeun ka sugrining warga sakola geusan ngarojong program wali kota Bandung nya éta “Bandung Masagi” nu diwangun ku opat pilar weweg: Agama, Budaya, Lingkungan turta Béla Nagara. [MS]***
