Sobat Sora, biasana dina bulan Romadon téh sok dilaksanakeun kagiatan Sanlat (pasantrén kilat) Romadon, boh di tingkat SD/MI, SMP/ MTs boh di tingkat SMA/SMK/MA. Saperti nu dilaksanakeun di SMKN 7 Kota Bandung, nu dipupuhuan ku Ir. Deudeu Mulyati, M.Si. Lumangsung ti tanggal 9 Juni nepi ka 17 Juni 2016. Dikokolakeun ku Guru Pendidikan Agama Islam, BK sarta Jurusanana.
Pa Danny Kurniadi, Guru PAI, nu janten ketua pelaksana Sanlat Romadon SMKN 7 Kota Bandung taun 2016
Sanlat Romadonna diiluan ku 1200 siswa, ti kelas X jeung XI nu ngawengku opat paket keahlian nya éta, kimia industri, teknologi penyempurnaan tekstil, kimia analis jeung farmasi. Tempat kagiatanana di masjid jeung aula SMKN 7. Ngaran masjidna nya éta Biturahman ari aulana mah di aranan Graha Chemistry, nu diresmikeun ku Ibu Atalia Praratya Ridwan Kamil, 13 Maret 2016 katompérnakeun .
Aya dalapan urang guru nu jadi pematerina téh sarta pembimbing opatan, sadaya ti SMKN 7. Eusi matéri Sanlat Romadonna, nya éta ngeunaan bag-bagan Al Quran, hadist, ahlaq, aqidah jeung sajarah Islam. Waktuna ti pukul tujuh isuk-isuk nepi ka lohor.
“Tujuan dilaksanakeunana kagiatan Sanlat Romadon di SMKN 7 Kota Bandung téh nya éta sangkan siswa neuleuman pangajaran agama Islam, nanjeurkeun kataqwaan para siswa, pembinaan ahlaq, penguatan dina berbusana muslimah pikeun para siswi, getol ibadah sareng ngabiasakeun miara kaberesihan lingkungan. Biasana mah kagiatan Sanlat Romadon di SMKN 7 téh dugi ka dua minggu, mung ningal kondisi ayeuna mah ukur dalapan dinten. Kumargi bentrok sareng kagiatan PPDB, kenaikan kelas, sareng mayunan Boboran Siam” kitu saur Pa Danny Kurniadi, Guru PAI, nu janten ketua pelaksanan Sanlat Romadon SMKN 7 Kota Bandung taun 2016.
SMKN 7 Kota Bandung téh pangajaranana condong kana widang sains, dipiharep ku ayana Sanlat Romadon téh, siswana jaga jadi ahli sains nu ajeg kaimanana. Sanlat Romadon jadi salah sahiji bekel para siswa pikeun ngojayan jaman nu sakieu globalna. Matak kudu aya bekel nu leuwih keur ngeusian kaimananana dina hirup kumbuh di masarakat nu saenyana.
Pa Tatang Husén, S.Pd, Waka. Kesiswaan & Drs. Ucang Usman, staf kesiswaan SMKN 7 Kota Bandung
Bu Hj. Siti Jubaédah, M.Ag, Guru PAI & sekretaris kagiatan Sanlat Romadon SMKN 7 Kota Bandung
“Alhamdulillah, nu kahiji Sanlat Romadon téh salah sawios agenda kesiswaan SMKN 7 nu maneuh unggal taun aya. Kumargi siswana mayoritas muslim, diayakeun wé Sanlat Romadon. Nu kaduana mah ngamangpaatkeun momentum sasih Romadon kanggo ningkatkeun amal ibadah, dieusian ku kagiatan nu matak leubeut ku pahala. Nu katiluna mah, kaimanan urang téh kawas batré hp, sakapeung kaimanan téh keur nyirorot, tah dina sasih Romadon téh kaimanan urang dicarge deui, sangkan leuwih ngaronjat. Nu pamungkas mah SMKN 7 Kota Bandung, ngadeudeul program Bandung Masagi dina widang kaagamaan,” saur Pa Tatang Husén, S.Pd, Waka. Kesiswaan nu someah téh.
Pa Dédé, M.Pd.I, Guru PAI SMKN 7 Kota Bandung
Bu Nuryana, M.Ag, Guru PAI SMKN 7 Kota Bandung
Di sagigireun kagiatan Sanlat Romadon, aya ogé kagiatan Festival Romadon. Lumangsung poé Salasa nepi ka poé Kemis (tanggal 14 nepi ka 16 Juni 2016). Ieu kagiatan téh gaganti Porseni, nu biasana lumangsung unggal ahir semester. Alatan waktuna dina bulan Romadon, mangka kagiatanana diganti ku kagiatan pasanggiri Islami, saperti pasanggiri tahfiz Quran, kaligrafi jeung nasyid.
Pasanggiri kaligrafi, Festival Romadon SMKN 7 Kota Bandung
Tufana Muhalik Jahulan, Ketua OSIS SMKN 7 Kota Bandung
Panitia Festival Romadon, SMKN 7 Kota Bandung
Festival Romadon téh dikokolakeun ku OSIS SMKN 7 Kota Bandung jeung Ikrima. Jumlahna panitiana kurang leuwih aya 50 urang. Juri nu meunteunna nya éta gabungan ti Guru PAI jeung Seni. Unggal kategori marebutkeun juara 1 nepi ka tilu tur hadiah ti panitia. Unggal kelas ngirim saurang perwakilan pikeun pasanggiri tahfiz jeung kaligrafi, ari nasyid mah dina sa-grupna minimal aya 10 urang. Tempat lombana di aula SMKN 7 Kota Bandung. Sapoé hiji, mata lombana téh. [MS]***
