Poto payun, kénca ka katuhu, Drs. H. Bambang Haryono, ketua komite sakola SMAN 10 Bandung, Brigjen TNI. Eka Wiharsa, Komandan Secapa AD, Ade Suryaman, S.Pd., M.M., Kepala SMAN 10 Bandung & Kolonel. Pramudya AD, salaku Pamen Ahli Bidang Pendidikan
majalahsora.com, Kota Bandung – Salah sahiji aspek maju jeung mundurna hiji bangsa téh, gumantung ka generasi ngorana. Lamun generasi ngora jeung nonomanna geus teu paduli, mikanyaah jeung micinta ka lemah caina, jaga éta bangsa téh, kahareupna aya bahan jadi tumpur. Kaasup nu kiwari kaalaman ku nagara Indonesia, alatan keur dieundeuk-eundeuk ku rupa-rupa hal négatip, kayaning seracen, narkoba, jsté.
Ku kituna dina raraga nyingkahan rasa kamelang kasabit sarta numuwuhkeun jiwa nasionalismeu, SMAN 10 Kota Bandung nu dipingpin ku Adé Suryaman, S.Pd., M.M., téh, ngayakeun kagiatan Pendidikan Karakter dan Latihan Dasar Kepemimpinan (PKLDK) pikeun siswa kelas X-na. Lumangsung salila tilu poé ti Juma’ah nepi ka Ahad, ping 22-24 Séptémber 2017. Tempatna di Secapa TNI AD, nu pernahna di Jalan Hegarmanah, Gegerkalong. Kagiatanana dipupuhuan ku Dra. Lilis Lisnawati.
Drs. Dede Amar, M.M.Pd., Kepala BP-3 Wilayah 4 Disdik Prop. Jabar basa méré sumenget ka para siswa SMAN 10 Bandung
Secapa TNI AD téh, tempat pelatihan komando pikeun tentara-tentara pinilih ti pangkat sersan kepala, sersan mayor jeung pembantu letnan dua, keur ngahontal pangkat letnan dua. Sanajan lokasi pelatihanana di Secapa, cék Adé, taya saeutik ogé kagiatan militerisasina, nu aya mah ngatik ngeunaan béla nagara, kapamingpinan, radikalisme, baris-berbaris, kadisiplinan, kamandirian, kaagamaan, numuwuhkeun jiwa korsa. Di sagigireun éta, aya kagiatan outbond dina poé panungtunganana.
“Alhamdulillah, ieu kagiatan téh dideudeul pisan ku orang tua siswa kelas X. Alatan ti awal mula ajaran taun 2017-2018, tos lebet kana RKAS (Rencana Kegiatan & Anggaran Sekolah) tur parantos disawalakeun sareng sepuh siswa, pokona mah bruk brak. Panampian ti sepuh siswana saé, ngadeudeul sacara moril tur materil. Mangsa prung sapertos ayeuna, ka Secapana langsung dijajapkeun ku sepuhna, janten aruningaeun,” cék Adé téh, basa diwawancara sabada pembukaan kagiatan PKLDK 2017.
Acara pembukaan PKLDK-na (Juma’ah, 22/9/2017), diresmikeun ku Kolonel. Pramudya AD, salaku Pamen Ahli Bidang Pendidikan. Harita Drs. Dédé Amar, salaku Kepala BP-3 Wilayah 4 Disdik Jabar, Drs. H. Bambang Haryono, salaku ketua komite sakolana, perwakilan guru nu jadi panitia, hadir ngaluuhan acara pembukaanana. Harita gé Komandan Secapa TNI-na, nya éta Brigjen TNI. Eka Wiharsa, ngahaja sumping ngabagéakeun kepala sakola, ketua komite sakola tur réngréngan panitia guru ti SMAN 10.
Cék Adé, program PKLDK téh, luyu jeung program kurikulum di SMAN 10 Bandung. Kurang leuwih aya 450 siswa lalaki jeung awéwé nu diatik tur dilatih salila tilu poé dua peutingna téh. Pesertana salian ti meunang materi ngenaan atikan PKLDK ogé meunang fasilitas kayaning més, dahar, jrrd.
Pematerina jolna ti anggota TNI Secapa. Pikeun siswa nu ngilu dina éta kagiatan, engkéna baris meunang peunteun, utamana keur mata pelajaran PKN jeung sajarah alatan éta kagiatan téh aya kolérasina jeung pelajaran kasabit.
Poto kénca ka katuhu, Drs.Warsidi, M.Si, salaku Wakasek Kesiswaan, Dra. Lilis Lisnawati, Ketua Pelaksana PKLDK & Drs. Syahrial, Pembina Osis
Mangsa taun ajaran 2016-2017 kagiatan sarupaning kitu téh kungsi dilaksanakeun di ieu sakola. Ngan tempat jeung pelaksanaanana di jero kampus SMAN 10. Kagiatanana gé ukur sapoé. Ari nu méré materina mah tetep ti Secapa AD.
“Salaresna kagiatan sapertos kieu téh tos maneuh aya di SMAN 10. Namung wandana teu kawas ayeuna. Apan ayeuna mah sadaya pesertana full diatik tur mondok di tempat pelatihan tentara Secapa. Salian ti éta ogé, kantos mangsa SMAN 10 dikokolakeun ku Disdik Kota Bandung, aya kagiatan sapertos kieu. Namung aya béntenna, tempatna di Secapa, tapi pematerina mah ti Disdik Kota Bandung,” cék, Lilis, Ketua Pelaksnana.
Balik deui kana kagiatan PKLDK taun 2017 di Secapa, Adé salaku Kepala SMAN 10 ngarasa reueus tur muji syukur ka manten-Na, ku sabab kagiatanana bajalan kalayan lungsur langsar. Samalah aya salah sahiji orang tua siswa nu muji kana éta kagiatan, samalah ménta diayakeun saban genep bulan sakali.
Poé Ahad pasosoré (24/9/2017) kagiatan PKLDK SMAN 10, taun 2017, resmi ditutup. Nu jadi petugas upacarana para siswa nu geus diatik tur dilatih dina kagiatan kasabit, Drs.Warsidi, M.Si, salaku Wakasek Kesiswaan nu jadi pembina upacara penutupanana. Satutas ngiluan éta kagiatan, sakabéh pesertana meunang sertifikat PKLDK, nu langsung ditanda tangan ku Brigjen TNI. Eka Wiharsa, Komadan Secapa AD.
Kumpulan poto kagiata PKLDK
[SR]***
