Pa Ahmad Heryawan, Gubernur Jawa Barat, nu ngarangkep jadi Dewan Pembina AMS
majalahsora.com, Bandung – AMS (Angkatan Muda Siliwangi), salah sahiji organisasi nonoman nu aya di Jawa Barat hususna sarta Indonésia umumna, mangsa poé Salasa ping 20 Juni 2017, ngayakeun kagiatan buka bersama shaum Romadhon 1438 H.
Kang Noeri Ispandi Firman, salaku Ketua Umum AMS
Harita Kang Noeri Ispandi Firman, salaku Ketua Umum AMS, nétélakeun yén acara kasabit téh keur ngaraketkeun tali silaturahmi, alatan AMS téh ayeuna mah lain ukur dipimilik ku urang Sunda wungkul tapi ogé geus dipimilik ku masarakat Indonésia. Sanajan kitu teu poho kana purwadaksina, tur nyepeng pageuh papagon AMS nya éta, Silat, Sholat jeung Siliwangi.
Poto kenca ka katuhu Kang Uu Rumana, Ceu Popong, Bu Netty, Pa Aher, Sesepuh Jabar, Kang Noeri tur Pa Sandiaga Uno
Acarana lumangsung di Gedong Pakuan, diluuhan ku Déwan Pembina AMS, Bapa Ahmad Heryawan, inohong tur sesepuh Jawa Barat, kayaning Kang Cécé Padmadinata, Ceu Popong, Kang Uu Rukmana, Pa Haris, salaku Wakil Ketua DPRD Prop. Jabar, sesepuh, ketua tur pengurus AMS lianna, salah sawiosna Kang Yogas, ogé inohong AMS wanoja, nya éta Bu Euis Purnama, jrrd. Sarta katatamuan ku Pa Sandiaga Uno, Wakil Gubernur Jakarta nu kapilih dina pilkda 2017, katompérnakeun.
PA Haris, Wakil Ketu DPRD (kenca), Pa Cece Padmadinata (katilu ti kenca), Bu Euis Purnama sareng Kang Yogas (katuhu)
Pa Ahér salaku Gubernur Jawa Barat nu ngarangkep jadi Dewan Pembina AMS, ngécéskeun AMS salaku organisasi nonoman nu istiméwa. Alatan moal aya organisasi nonoman nu aya dina papayung Kodam langsung. “FKPPI, organisasi nonoman nu langsung dipapayungan ku Kodam mah. Tah di Jawa Barat Kodam Siliwangi teh boga dua organisasi kepemudaan, salian ti FKPPI, aya AMS. Dina katentaraan mah, sing saha anu jadi tangtara satuan Siliwangi, mangka boga ajén nu nikel, salah sahijina gedé wawanénna, atawa pasukan berani mati, kitu ogé AMS,” saur Pa Ahér dina pangbagéana.
Pa Aher nuju masrahkeun santunan ka budah yatim
Saur Pa Ahér, kiwari nu disebut urang Sunda téh lain ukur nu teureuh Sunda wungkul, tapi urang luareun Sunda nu lahir di Sunda tur nyaah ka Sunda, atawa urang nu ngumbara di tanah Sunda tapi miara tur mekakarkeun kasundaan. Patalina jeung kabhinékaan, anjeunna negéskeun tos salempang, alatan nu hirup di Jawa Barat mah, hirup guyub, teu pahiri-hiri. Kitu ogé jeung AMS nu ayeuna sumebar di Nusantara, tur pengurusna lain saukur urang Sunda, tapi geus Nyunda.
Kang Noeri, nuju masrahkeun santunan ka budak yatim
Salian ti acara buka bersama jeung silaturahmi, kagiatan kasabit téh dieuyeuban ku kagiatan méré bantuan ka budak yatim nu jolna ti panti asuhan Muhammadiyah, dipasrahkeun ku Pa Ahér tur Kang Noeri. [SR]***
