Tatti Rustati, M.M.Pd., Kepala SMAN 14 Bandung
majalahsora.com, Kota Bandung – Kepala SMAN 14 Kota Bandung, nya éta Dra. Tatti Rustati, M.M., téh, kaasup kepala sakola wanoja nu motékar jeung loba préstasina. Naon sababna? Alatan anjeunna suksés mawa ieu sakola ngaraéh rupa-rupa préstasi. Di antarana dina widang lingkungan, taun 2016 katompérnakeun, hasil mawa Piala Adiwiyata Mandiri tingkat nasional, di Kabupatén Siak Propinsi Riau. Eta téh piala paripurna pikeun sakola nu berpréstasi dina widang lingkungan.
Sabada, SMAN 14 suksés jadi sakola Adiwiyata Mandiri, dina ping 31 Oktober 2016 nu kaliwat (harita SMA/SMK masih dikokolakeun ku Disdik Kota Bandung, red), Elih Sudiapermana, salaku Kepala Dinas Pendidikan Kota Bandung, méré pangajén keur SMAN 14, nya éta piagam Bandung Masagi salaku sakola Berbudaya Lingkungan.
Tintin Komariah, M.Pd, (kenca) salah sahiji guru SMAN 14 nu ngadeudeul program kepala sakolana
Di sagigireun éta, Tatti gé sacara pribadi kungsi dilélér pangajén ti Propinsi Jawa Barat, kapilih jadi kepala sakola Peduli Lingkungan, taun 2016. Harita penghargaanana dipasrahkeun ku Netty Héryawan, garwa Gubernur Jawa Barat, 5 Novémber 2016, di Bandung.
Salian ti suksés dina widang lingkungan, Tatti gé terus ngahangkeutkeun pelayan prima ka warga sakolana. Utamana dina hal fasilitas wangunan. Ku anjeunna, sakola téh diwangun kalayan merenah tur geunah. Kiwari ieu sakola geus ngabogaan wangunan nu pantes jeung representatip, sacara kualitas mah, tohaga wagunanana téh.
Cék Tatti, préstasi jeung bajalanna program-program anjeunna di SMAN 14 téh, moal ngawujud lamun teu dideudeul ku wakasek, guru, karyawan, siswa tur warga sakolana.
Wangunan anyar nu baris diresmikeun ku Ahmad Hadadi Kepala Dinas Pendidikan Propinsi Jawa Barat
Patalina jeung kaayaan wangunan di ieu sakola, sacara umum mah geus minuhan standar nasional. Samalah ayeuna aya wangunan anyar, nu pernahna di gigireun lapang upacara. Ngajajar aya UKS, dalapan toilet siswa dalapan toilet siswi, rohang ganti pakéan siswi, sarta aya gudang keur nyimpen peralatan olah raga.
Kahareupna di luhureun rohangan kasabit, aya rencana rék diwangun rohangan keur ekskul ieu sakola. “Mudah-mudahan wangunan anyar SMAN 14 kota Bandung téh tiasa langkung mangpaat sareng tiasa diresmikeun ku Kadisdik Prop Jabar, nya éta Dr. H. Ahmad Hadadi. Alhamdulillah anjeunna pami teu aya pamengan dinten Rebo ping 20 Séptémber 2017,” cék Tatti, Kepala SMAN 14 Kota Bandung. [SR]***
